Čamu Wildberries u Biełarusi praciahvaje brać hrošy za viartańnie tavaru
Niadaŭna ŭ ŚMI zajavili, što niekatorym klijentam Wildberries stała dastupnaja opcyja biaspłatnaha viartańnia tavaraŭ. Novaŭviadzieńnie pavinna było zakranuć klijentaŭ z vysokim adsotkam vykupu zakazaŭ — bolš za 50%. Ale čytačy sutyknulisia z roznymi situacyjami: u kahości praciahvajuć śpisvać hrošy za viartańnie tavaraŭ, niahledziačy na vysoki pracent vykupu, a kamuści pašancavała atrymać usiu sumu paśla viartańnia. Myfin raźbiraŭsia, što adbyvajecca.
«Viartańnie płatnaje, ale ciapier chacia b papiaredžvajuć pra heta»
Minčanka Jana pakupki na Wildberries robić, jak kažuć, redka, ale trapna. Tamu ŭ jaje vielmi dobry pracent vykupu — bolš za 60%. Dziakujučy čamu i prystojnaja źnižka. Žančyna miarkuje, što taksama z-za hetaha ŭ jaje jość mahčymaść afarmlać zakaz bieź pieradapłaty — takaja opcyja dastupnaja nie ŭsim.
— Ale mienavita tamu ja nikoli raniej nie źviartała ŭvahi, ci śpisvalisia ŭ mianie niejkija srodki pry viartańni, kali jano ŭsio ž zdarałasia. A niadaŭna vyrašyła kupić niekalki rečaŭ, pačała źbirać košyk i zaŭvažyła ŭnizie pad kožnaj pazicyjaj prypisku «Admova ad tavaru — 3 r.00 k.».
— Raniej, nakolki pamiataju, takoha papiaredžańnia nie było. Ale nie vyklučaju, što hetyja 3 rubli śpisvalisia. Dobra choć, što ciapier papiaredžvajuć!
«Z płatnym viartańniem niama sensu zakazvać pa drobiazi»
Maładaja mama z Hrodna, Maryna i raniej aktyŭna zakuplałasia praz markietpłejsie, a z maleńkim dziciem hety vid šopinhu naohuł staŭ daminavać. Ale spantannych pakupak jana sabie ŭžo nie dazvalaje.
— Raniej, kali viartańnie było biaspłatnym, možna było ŭziać reč dadomu i prymierać. Kali nie padyšło — viarnuć. Z 2022 usio stała značna bolš składana. Ale ŭsio roŭna praciahvaju zakuplacca tut. Uvažliva čytaju ŭmovy pry zamovie — zvyčajna pradaŭcy papiaredžvajuć ab płatnym viartańni.
Ja niadaŭna dačce zakazvała paru drobiaziaŭ: holfy dla małych, paviazki. Ahulnaja suma zamovy — krychu bolš za 16 rubloŭ. I pakazana, što admova/viartańnie płatnaje — 6 rubloŭ.
— Kali suma ŭsioj pakupki nievialikaja, niama sensu zakazvać pa drobiazi. Ci tady ŭžo vybirać toje, što dakładna voźmieš.
«Kali ŭ asabistym kabiniecie nie napisana, što viartańnie płatnaje, značyć, jano biaspłatnaje»
Kaciaryna karystajecca pasłuhami markietpłejsa ŭžo vielmi daŭno. Pilna naziraje za tym, jak mianiajucca praviły dla klijentaŭ. I raić uvažliva čytać umovy zamovy niepasredna ŭ asabistym kabiniecie.
— Kali ŭ asabistym kabiniecie nie napisana, što viartańnie płatnaje, značyć, jano biaspłatnaje. Usio prosta. Jak ja zrazumieła z navin, pryjdziecca płacić hrošy za viartańnie ci nie, zaležyć ad adsotku vykupu: kali jon vyšejšy za 50%, to za viartańnie tavaru z vas ničoha nie voźmuć, kali mienš za 50% — to 3 rubli. Ale ŭ mianie niadaŭna byŭ niezvyčajny vypadak. Navat pry pracencie vykupu mienš za 50% paśla viartańnia tavaru mnie viarnuli ŭsiu sumu pakupki. To bok, za zvarotnuju łahistyku ničoha nie śpisali.
Jak prakamientavali situacyju supracoŭniki Wildberries
U troch roznych punktach vydačy tavaru Wildberries supracoŭnicy dali adzin i toj ža adkaz: admova ad tavaru i viartańnie tavaru zastalisia płatnymi — kaštujuć 3 rubli.
— Ci mała što na roznych sajtach pišuć. Usia aficyjnaja infarmacyja publikujecca na sajcie kampanii. Niejkich zajaŭ, što viartańnie stała biaspłatnym, nie było. Moža, było niedzie ŭ Kazachstanie tam, Rasii abo jašče inšaj krainie. Ale nie ŭ nas. U Biełarusi ničoha nie źmianiałasia, — prakamientavali supracoŭnicy markietpłejsa.
Taksama jany rastłumačyli, što pad admovaj razumiejecca i admova ad tavaru ŭ punkcie vydačy, i viartańnie pakupki pa skančeńni niekatoraha času. Ale kali prychodzić niajakasny tavar, to 3 rubli spačatku aŭtamatyčna śpisvajucca, a potym ich možna viarnuć, kali napisać zvarot u asabistym kabiniecie.
Aficyjny kamientaryj ad pres-słužby Wildberries atrymać nie ŭdałosia.
Hałyhina prymusili apraŭdvacca za zvarot da siłavikoŭ u 2020-m17
Hałyhina prymusili apraŭdvacca za zvarot da siłavikoŭ u 2020-m
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary