Čamu karalevu pachavajuć u śvincovaj trunie i ŭ kolki heta abydziecca kaźnie? Piać faktaŭ pra pachavańnie Lizaviety II

Pachavańnie karalevy budzie pieršym dziaržaŭnym pachavańniem z 1965 hoda

Dziaržaŭnaje pachavańnie — heta ŭračystaja publičnaja cyrymonija, jakaja pravodzicca ŭ honar ludziej, jakija mieli ahulnanacyjanalnaje značeńnie. U adroźnieńnie ad astatnich publičnych pachavańniaŭ, dziaržaŭnaje pravodzicca ŭ adpaviednaści sa strohimi praviłami pratakołu i zvyčajna ŭklučaje ŭ siabie relihijny padtekst i elemienty vajskovych tradycyj. Apošni raz takaja cyrymonija pravodziłasia ŭ Vialikabrytanii ŭ 1965 hodzie — heta było pachavańnie byłoha premjer-ministra Uinstana Čerčyla.

Śmierć Lizaviety II abydziecca brytanskaj ekanomicy nie mienš čym u 6 miljardaŭ funtaŭ

Na hety momant dakładny košt pachavańnia nazvać niemahčyma. Hetaja infarmacyja moža być apublikavanaja ŭ budučyni, ale, chutčej za ŭsio, jana patrapić pad dziejańnie zakona «Ab dziaržaŭnaj tajamnicy». U adnoj z krynic havorycca, što śmierć karalevy (z ulikam vydatkaŭ na samu cyrymoniju raźvitańnia, dni žałoby i karanacyju Karła III u nastupnym hodzie) budzie kaštavać padatkapłatnikam kala 6 młrd funtaŭ.

Karaleva budzie pachavanaja ŭ śvincovaj trunie

Truna Lizaviety II była vyrablenaja bolš za 30 hadoŭ tamu firmaj Henry Smith, jakaja taksama stvaryła truny dla hiercaha Edynburhskaha, Fredzi Merkjury i Džymi Chiendryksa. U 2005 hodzie Henry Smith začyniłasia i adkaznaść za zachoŭvańnie truny dy budučaje pachavańnie ŭziała na siabie kampanija Leverton and Sons.

Dakładnyja detali vyrabu ciapier ličacca zhublenymi, adnak ekśpierty miarkujuć, što truna była zroblenaja z redkaha čareščataha duba, a łatunievyja ručki i inšyja dadatkovyja prystasavańni byli vyrablenyja na birminhiemskim liciejnym zavodzie Newman Brothers.

Admietnaja rysa karaleŭskaj truny — śvincovaja abrobka, jakaja praduchilaje traplańnie vilhaci i dazvalaje zachavać cieła na praciahu hoda. Hetaja tradycyja ŭzychodzić jašče da viktaryjanskaj epochi, kali cieły pačali źmiaščać u hiermietyčnyja truny i chavać nad ziamloj u sklepach. Takaja truna ciažejšaja za zvyčajnuju — dla taho, kab nieści jaje, nieabchodna vosiem čałaviek zamiest šaści.

Čakajecca, što na pachavańnie pryjeduć kala 500 vysokapastaŭlenych asob z roznych krain

Sky News paviedamlaje, što aficyjnyja zaprašeńni nakiravali bolšaści suśvietnych lidaraŭ, akramia pradstaŭnikoŭ Rasii, Biełarusi i Mjanmy. Rasija zastałasia biez zaprašeńnia z-za vajennaha kanfliktu na terytoryi Ukrainy, Biełaruś — z-za padtrymki dziejańniaŭ Rasii. Mjanma sutyknułasia z zachodnimi sankcyjami paśla taho, jak letaś zrynuła cyvilny ŭrad. Akramia taho, lidar kirujučych hienierałaŭ Mjanmy nieadnarazova naviedvaŭ Maskvu z pačatku vajny. U toj ža čas na pachavańnie zaprasili prezidenta Brazilii Žaira Bałsanaru, viadomaha ultrapravymi idejami i tym, što jon spryjaŭ maštabnaj vysiečcy lasoŭ Amazonii, jakaja była pryznana ekałahičnaj katastrofaj.

Trunu prynca Filipa pieramieściać, kab jon byŭ pachavany pobač z žonkaj

Kaplica Śviatoha Hieorhija, dzie pachavanyja mnohija členy karaleŭskaj siamji, była zasnavanaja ŭ 1475 hodzie karalom Eduardam III. U joj jość niekalki asobnych pachavańniaŭ: karaleŭski sklep (the Royal Vault), ałtar (the Altar) i miemaryjalnaja kaplica Albierta (the Albert Memorial Chapel). Muž Lizaviety II, prync Filip, na dadzieny momant spačyvaje ŭ Karaleŭskim sklepie, adnak jahonuju trunu pieraniasuć u miemaryjalnuju kaplicu karala Hieorha VI, dzie budzie pachavanaja karaleva.

• 72
• 0
• 7
• 16
• 19
• 25
• 12
• 0