Vajenkama zvolnili z-za pamyłak pry mabilizacyi ŭ Chabaraŭskam krai
Kiraŭnik Chabaraŭskaha kraju Michaił Dziehciaroŭ adchiliŭ ad pasady vajennaha kamisara Juryja Łajko paśla taho, jak pałova mabilizavanych u rehijonie była pryzvanaja pa pamyłcy. Ekśpierty ž nazyvajuć «vinavatym» u aŭralnaj mabilizacyi sam ukaz Pucina, dzie niama nijakich abmiežavańniaŭ dla pryzyvu.
Pavodle Dziehciarova, usiaho ŭ rehijonie pryzvali niekalki tysiač čałaviek, a pałovu ź ich užo viarnuli nazad, bo jany «nie adpaviadajuć kryteryjam adboru dla pastupleńnia na vajennuju słužbu pa kantrakcie».
Raniej paviedamlałasia, što ŭ Chabaraŭskim krai pryzvali mužčynu z šyzafrenijaj, a taksama žychara, jaki vychoŭvaje dačku-invalida.
U toj ža čas, jak paviedamiŭ deputat haradskoj dumy Chabaraŭska Vasil Charytonaŭ, dyrektaraŭ chabaraŭskich škoł na naradzie 2 kastryčnika abaviazali padać śpisy supracoŭnikaŭ, ź jakimi kiraŭniki «hatovyja rasstacca i addać na front».
«Dyrektary škoł nie majuć prava padać nulavyja śpisy, heta ciahnie skasavańnie ź imi pracoŭnych dahavoraŭ. Ludzi vyrašajuć maralna etyčnuju dylemu znachodziačysia ŭ zaležnym stanoviščy», — napisaŭ Charytonaŭ.
Raniej vajenkama adchilili ad pasady ŭ Mahadanskaj vobłaści. U rehijonie pamyłkova mabilizavali 69 čałaviek, dźvie treci ź jakich akazalisia starejšymi za 45 hadoŭ. Pa słovach adnaho z mabilizavanych, ich pa pozvach pryvieźli va Uładzivastok, dzie paśla miedycynskaha ahladu vyrašyli adpravić nazad u Mahadan.
Kala 300 pamyłkova mabilizavanych žycharoŭ Jakucii viarnulisia dadomu, paviedamiła TASS.
Ułady RF majuć namier mabilizavać 300 tysiač reziervistaŭ dla vajny z Ukrainaj. Pry hetym ŚMI paviedamlajuć, što kolkaść mabilizavanych moža pieravysić miljon čałaviek. U bolšaści rehijonaŭ nazirajucca parušeńni pry praviadzieńni mabilizacyi.
Ekśpierty nazyvajuć «vinavatym» u aŭralnaj mabilizacyi sam ukaz Pucina, dzie niama nijakich abmiežavańniaŭ.
Ciapier čytajuć
Što viadoma pra byłoha palitviaźnia Sakałoŭskaha, jaki pamior u Bierlinie ŭ 47 hadoŭ1
Kamientary