«Stary Olsa» adśviatkavaŭ dzień narodzinaŭ

Fest «Halšanski zamak» prajšoŭ u subotu ŭ staražytnym miastečku na Ašmianščynie. Jaho praviadzieńnie było prymierkavana da 10-hodździa stvareńnia hurta «Stary Olsa».

Fiestyval raspačaŭsia ź vitalnych słoŭ arhanizataraŭ. Jany z aptymizmam havaryli pra toje, što heta na pavinien być adnarazovy prajekt. «Halšanski zamak» musić stać brendam, pad jakim štohod buduć źbiracca amatary staražytnaj muzyki.

Kancert pačaŭsia z vystupleńniaŭ kalektyvaŭ mastackaj samadziejnaści Ašmianščyny. Zaŭždy ździŭlajusia, kali baču ŭ rajonach ludziej, jakija śpiavajuć narodnyja pieśni. Ździŭlusia, bo pastajanna kažuć pra admirańnie kultury, a jana praciahvaje žyć navat u samych addalenych vioskach. Bo kultura — heta nie tolki vystupleńni opiernych vykanaŭcaŭ, teatralnyja pastanoŭki. Heta taksama i tyja kabiety, što śpiavajuć pieśni svaich pradziedaŭ na rodnaj movie. Ale zusim inšyja adčuvańni źjavilisia ŭ Halšanach, kali paśla «Kupalinki» sa sceny pačała danosicca «salanka» z savieckich piesień «Katiuša», «Ech, dorohi…», «Dień Pobiedy». Paśla takoha nasamreč zadumaješsia.

Chaciełasia b paraić arhanizataram nadalej pravodzić taki fiestyval značna raniej, da prychodu chaładoŭ. To i ludziej budzie bolš, dy i nastroj u ich budzie lepšy. Chacia nielha skazać, što hledačy nadta sumavali. Dla ich byli arhanizavanyja paciechi: niechta kataŭsia na kani, chtości z łuka stralaŭ, kidaŭ dzidu.

Adnoj z zabavaŭ staŭ aŭtamabil lidera hurta «Stary Olsa» Źmitra Sasnoŭskaha. Heta «Maskvič» 1951 hoda. Stajali čerhi, kab sfatahrafavacca pobač. Taki rarytet nie kožny dzień ubačyš u Minsku, a tym bolš u Halšanach.

Vybar miastečka dla praviadzieńnia fiestyvalu zrazumieły. Histaryčnaje miesca. Zachavalisia ruiny zamka. Jak uvieś čas sa sceny adznačaŭ Źmicier Sasnoŭski, tut vielmi «adekvatnaje načalstva», jakoje adrazu pahadziłasia zładzić mierapryjemstva.

Taki fest zdolny pryciahnuć uvahu ludziej da zamka, da prablemy jaho razbureńnia. Ale zaraz zamak adyšoŭ na zadni płan, staŭ dekaracyjaj. Choć i hučała šmat słoŭ pra jaho słaŭnuju historyju, padyści i dakranucca da starych muroŭ było nielha. Śpiecnazaŭcy i milicyjanty nie dazvalali hetaha zrabić. Maŭlaŭ, tam budzie ŭstaloŭvacca salut. Usie vieryli, tolki salutu tak i nie było. Ale

śpiecnazaŭcy — heta nie tolki bambizy, jakija mohuć razhaniać demanstracyi. I ź imi možna damovicca. Prynamsi, my natrapili na takoha. Jon pravioŭ nas vakoł ruinaŭ, pryvioŭšy navat niekatoryja fakty z historyi zamka. Takaja akaličnaść nie moža nie radavać.

Kancertnaja prahrama hurtoŭ siaredniaviečnaj muzyki, zapłanavanaja na 16.00, pačałasia sa spaźnieńniem roŭna na hadzinu. Biełaruskaja punktualnaść. Ale, na ščaście, heta nie pryviało da skaračeńnia kancerta. Prosta prahrama skončyłasia paźniej.

Pieršym na scenie źjaviŭsia hurt «Unija». Toje vyklikała źbiantežanaść. Tolki niechta spytaŭ, ci budzie vystupać LitvinTroll, muzyka jakoha hučyć ciažka dla niepadrychtavanaha słuchača, jak vyjšaŭ inšy rok-hurt. Kali ludzi metarnakiravana jeduć pasłuchać siaredniaviečnuju muzyku, im ni jak nie chočacca puskacca ŭ skoki pad zapiły hitary. Zatym vystupiŭ hurt «Testamientum Terre». A jak vyjšli muzyki sa «Staroha Olsy», usie paciahnulisia da sceny.

Pryjemna nazirać, jak maładyja ludzi tančać pad staražytnyja miełodyi. «Staromu Olsu» tolki 10 hadoŭ, a jaho muzyka ŭžo zdoleła vychavać pakaleńnie moładzi, jakoje cikavicca rycarskaj kulturaj, atajasamlivaje siabie z naščadkami Alhierda i Vitaŭta.

Skončyŭsia fiestyval fajer-šoŭ ad trukavoha teatra «Kresiva».

«Halšanski zamak» zładzili Ašmianski rajvykankam i turystyčnaje ahienctva «Historyja-Tur». Usie arhanizatary vykazalisia za toje, kab fiestyval staŭ tradycyjnym. Praz hod, jak budzie adznačacca 400-hodździe zamka, fest užo musić stać značnaj padziejaj dla krainy.

Pryhadvajecca pieršaje praviadzieńnie Be Free va ŭkrainskim Łucku. Ścipłaja scena, mała ludziej. Ale ŭžo ŭ treci raz rok-fest zdoleŭ sabrać kala 20 tysiač słuchačoŭ, pieravažna biełarusaŭ. Dyk čamu b «Halšanskamu zamku» nie stać ahulnabiełaruskim fiestyvalem staražytnaj muzyki. Prynamsi zacikaŭlenyja ŭ hetym ludzi jość.

• 0
• 0
• 0
• 0
• 0
• 0
• 0
• 0