Vynik doŭhaj pracy za kampjutaram ci alerhii abo prosta zvyčka? Jakoj by ni była pryčyna, mnohija lubiać časta cierci vočy, i ekśpierty kažuć, što heta nie najlepšaja ideja.
Učastki skury pad vačami — samyja dalikatnyja na ŭsim ciele, i cierci ich — toje ž samaje, što cierci pialostki ružaŭ. Kali vy robicie heta zanadta časta, naprykład, bolš za dva razy na dzień, treba z hetym niešta rabić, piša Huffpost.
Jość niekalki pryčyn, jakija mohuć prymusić čaściej ciahnucca rukami da vačej, — naprykład, ich suchaść. Kali cierci vočy, sapraŭdy stanie lahčej, ale jość lepšy vychad: skarystajciesia kroplami dla ŭvilhatnieńnia vačej i, mahčyma, zapłanujcie vizit da aftalmołaha.
Taksama vočy mohuć śviarbieć praz alerhiju. Znoŭ-taki, źviarniciesia da miedykaŭ: jość niekalki vidaŭ lekaŭ, što mohuć palehčyć śvierb i, adpaviedna, strymać vas ad škodnaj zvyčki.
Čamu ž dermatołahi nie ŭ zachapleńni ad jaje? Nasamreč zvyčka cierci vočy moža surjozna paŭpłyvać i na źniešnaść, i na zdaroŭje. Naprykład, kali rabić heta tak mocna, što kapilary razarvucca, vynikam mohuć stać čyrvonyja i nibyta stomlenyja vočy.
Pakutujecie ad ciomnych kruhoŭ pad vačami? Mahčyma, treba prosta pierastać ich cierci, bo hetaja zvyčka jakraz spryjaje źjaŭleńniu takoha defiektu. Miedyki nazyvajuć hetuju źjavu postzapalenčaj hipierpihmientacyjaj, to-bok parušeńniem pihmientacyi, jakoje ŭźnikaje na miescy traŭmavańnia skury ci zapaleńnia, i čym bolš ciomnaja skura, tym bolš vyražanaja hipierpihmientacyja.
Kali pastajanna cierci vočy, pavyšajecca ryzyka lichienifikacyi — pataŭščeńnia skury. Heta moža zrabić linii na skury bolš zaŭvažnymi, padkreślić zmorščyny, a taksama prymusić skuru bolš sochnuć i łuščycca. Takaja zvyčka nie tolki škodzić skury, ale i moža vyklikać mikradrapiny rahavicy. Z časam heta moža pryvieści da stančeńnia i straty jaje formy, a adpaviedna, i da nievyraznaha zroku — hety stan viadomy jak kieratakonus. Zvyčka cierci vočy asabliva niebiaśpiečnaja dla ludziej z hłaukomaj, bo jana moža vyklikać rost cisku ŭnutry voka.
Kali vy zrazumieli, što chočacie advučycca časta cierci vočy, pierš za ŭsio budźcie bolš uvažlivymi da siabie. Uśviedamleńnie taho, što vaša zvyčka niebiaśpiečnaja, moža być pieršym krokam da pazbaŭleńnia ad jaje, a razumieńnie nastupstvaŭ pavysić vašu matyvacyju. Ludzi, jakija nosiać kantaktnyja linzy, mohuć pasprabavać na niejki čas pierajści na akulary, bo jany buduć barjeram i nahadvańniem pra nieabchodnaść ustrymacca ad treńnia vačej. Kali ž vy adčuvajecie, što sami nie možacie pazbavicca ad zvyčki, možna źviarnucca da psichaterapii.
Jość i dobraja navina: nikoli nie pozna pazbavicca ad zvyčki cierci vočy. Jaje nastupstvy, mahčyma, buduć zaŭvažnyja nie adrazu, ale ž dla doŭhaterminovaha zdaroŭja vačej i vašaj źniešnaści vielmi važna pazbavicca hetaj zvyčki.
Torhajecca pavieka? Tłumačym, što značyć hety simptom
Zdarovaja skura, pryhožaja fihura i baraćba z chalesterynam. Pryčyny, čamu varta jak maha čaściej jeści jajki ŭśmiatku
Nijakaj biassońnicy: prapanujem mietad, ź jakim vy možacie zasnuć za chvilinu
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ34
Kamientary