Torhańnie pavieka — niepryjemny simptom, jon navat pužaje. Miž tym pryčyny jaho mohuć być roznyja. U niekatorych vypadkach heta moža być prajavaj surjoznaj chvaroby, ale ŭ bolšaści nie maje nijakich nastupstvaŭ.
Patorhvańnie pavieka redka ŭkazvaje na niejkuju surjoznuju chvarobu, zapeŭnivaje New York Times.
Čaściej za ŭsio spazmy pavieka pradstaŭlajuć saboj sieryju skaračeńniaŭ muskułaŭ pad nazvaj mijakimija vieka. Heta stan, padčas jakoha adbyvajucca mižvolnyja pieryjadyčnyja skaračeńni vieka, zvyčajna nižniaha. Mijakimija zakranaje adnačasova tolki adno voka, bo patorhvańnie ŭźnikaje ŭ muskule, jaki atačaje voka, a nie ŭ niervie, jaki kantraluje praces marhańnia. Hety nierv pasyłaje adzin i toj ža sihnał adnačasova dvum vačam.
Spazmy pavieka mohuć doŭžycca rozny čas — ad hadzin da dzion i navat miesiacaŭ. Kali patorhvańni praciahvajucca vielmi doŭha abo da ich dadajucca novyja simptomy, lepiej naviedać aftalmołaha i pravierycca na dadatkovyja chvaroby.
Kali patorhvańni raspaŭsiudžvajucca na inšyja muskuły tvaru abo kali abodva voki torhajucca adnačasova, heta moža śviedčyć pra surjoźniejšuju prablemu. Inšyja niebiaśpiečnyja simptomy — heta apuščeńnie pavieka ci pačyrvanieńnie vačej. Ale kali torhajecca tolki adno pavieka, chutčej za ŭsio, heta nie śviedčyć ni pra što surjoznaje.
Čamu torhajecca pavieka
Nichto dakładna nie viedaje, adkul uźnikaje taki simptom. Časam heta byvaje praź nievialikaje razdražnieńnie, naprykład, praz našeńnie kantaktnaj linzy, jakaja moža ciercisia ab pavieka. Ale čaściej za ŭsio patorhvańnie vyklikajuć stres, niedasypańnie abo zanadta vialikaje spažyvańnie kafieinu. Kali vy pravodzicie šmat času za kampjutaram, u vas moža raźvicca suchaść vačej, jakaja taksama spryjaje patorhvańniu.
Kali mijakimija ŭžo źjaviłasia, chutka jaje nie vylečyć, ale jość sposaby, jak palepšyć svoj stan. Vam mohuć dapamahčy lubyja kropli, jakija ŭvilhatniajuć voka. Taksama pasprabujcie nakryć vočy pierad snom vilhotnaj ciopłaj survetkaj — heta dapamoža rassłabić muskuły vačej, budzie spryjać ich uvilhatnieńniu i zapavolić vypareńnie śloz.
Akramia hetaha, varta bolš adpačyvać i pastaracca źnizić kolkaść stresavych situacyj, u jakija vy traplajecie.
Moža dapamahčy źnižeńnie kolkaści kafieinu — dazvalajcie sabie nie bolš za 1—2 kubki kavy štodzień.
Taksama važna pić dastatkova vady i mieć zbałansavany racyjon. Uklučajcie ŭ jaho pradukty z vysokaj kolkaściu kaliju (harošak, bulba i banany), mahniju (zialonaja listavaja harodnina, fasola, arechi i ryba) i kalcyju (małočnyja pradukty, sardziny i ciomnaja listavaja zielanina). Niedachop hetych rečyvaŭ moža pryvieści da torhańniaŭ pavieka.
Daktary kažuć, što mijakimija pavieka zvyčajna prachodzić sama saboju, i miedycynskaja dapamoha dla hetaha niepatrebnaja. Dla bolšaści pacyjentaŭ lačeńnie mijakimii ŭklučaje ŭ siabie prosta adpačynak, miery pa źnižeńni stresu, uvilhatnieńnie voka i troški ciarpieńnia.
Kamientary