Łukašenka i Juščanka «zabojča» krytykujuć Rasiju

Na samicie SND u Kišyniovie adbyłasia vostraja pikiroŭka miž kiraŭnikami Biełarusi i Ukrainy z adnaho boku i Rasijaj z druhoha. Isnujuć dźvie viersii padziej.

Jak zajaviŭ Alaksandr Łukašenka pierad žurnalistami, na samicie adbyłasia «vielmi žorstkaja i vostraja razmova». Jon adznačyŭ, što «štyki skryžavali» ŭ pytańni pieraadoleńnia nastupstvaŭ suśvietnaha finansava-ekanamičnaha kryzisu. «Užo, kažuć, kryzis zaviaršajecca, a my ŭsio havorym ab tym, jak pavysić, vyvučyć, infarmavać», — adznačyŭ Łukašenka.

Pavodle słoŭ Łukašenki,

jon zadaŭ pytańnie ministru finansaŭ RF Alaksieju Kudrynu: čym kankretna Rasija ź jaje vielizarnymi reziervami moža dapamahčy krainam SND?

Rasija, skazaŭ jon, adhavaryłasia tym, što vystupaje na baku Biełarusi pry vydzialeńni kredytaŭ MVF.

«A vyjšła tak, što MVF siońnia vydaje kredyt z ulikam taho, što nam vydzialaje Rasija. A ciapier Rasija publična zajaŭlaje, što 500 młn. dalaraŭ nie daje. MVF nas pytaje: jak ža tak, my raźličvali, što i Rasija daść. Takaja ŭmova vydzialeńnia kredytu MVF».

«Voś taki momant žorstkaj razmovy. Dumaju, ja pravilna zavastryŭ hetaje pytańnie», — dadaŭ Łukašenka.

Na samicie było taksama zakranuta pytańnie barjeraŭ u handli i mier pratekcyjanizmu. «Zapisvajem punkt: nijakich barjeraŭ, nijakaha pratekcyjanizmu. Dyk ža ŭ nas z Rasijaj barjery i pratekcyjanizm! Kali hetyja pytańni buduć vyrašanyja?» — rytaryčna pytaŭsia Łukašenka.

Łukašenka adznačyŭ, što na pasiadžeńni «mocna vystupiŭ Viktar Juščanka, jaho arhumientacyja była zabojčaj».

Pavodle słoŭ biełaruskaha kiraŭnika, hałoŭnaj dumkaj vystupleńnia ŭkrainskaha prezidenta było toje, što «ni Biełarusi, ni Ukrainie nie byli b patrebnyja kredyty, kali b funkcyjanavała zona svabodnaha handlu». «Krainy mahli b samastojna zarabić nieabchodnyja srodki. U takim ža klučy vystupili Tadžykistan i Azierbajdžan», — skazaŭ Łukašenka.

Razam z tym, Łukašenka adznačyŭ, što «SND pavinna zastavacca jak placoŭka dla pieramoŭ». «Chaj drenna, chaj niešta nie vyrašajecca, chaj prosta abmiarkoŭvajem prablemy, ale heta placoŭka dla pieramoŭ, jana adzinaja takaja na postsavieckaj prastory, jaje treba zachavać».

Inšuju viersiju razmovy padaŭ rasijskim žurnalistam ministr finansaŭ Rasii Alaksiej Kudryn.

Pavodle jahonych słovaŭ, Łukašenka nie ŭ kursie, na što patračanyja 3 młrd dalaraŭ rasijskich kredytaŭ.

Jak pieradaje ahienctva RIA Novosti,

Kudryn zajaviŭ, što «byŭ ździŭleny tym, što biełaruski prezident Łukašenka nie vałodaje infarmacyjaj ab toj finansavaj dapamozie ŭ vyhladzie kredytaŭ, jakuju Rasija akazvaje Biełarusi apošnija dva hady».

Jon padzialiŭsia z žurnalistami źmiestam dyjałohu, jaki, pavodle jaho słoŭ, vioŭsia ŭ prysutnaści inšych kiraŭnikoŭ delehacyj udzielnikaŭ Sadružnaści.

«Vyśvietliłasia, prezident Biełarusi nie viedaje, što za apošnija dva hady Rasija akazała jamu finansavuju dapamohu ŭ pamiery 3 młrd. dalaraŭ ZŠA», — skazaŭ vice-premjer.

Pavodle słoŭ Kudryna, prezident Biełarusi dvojčy pierapytaŭ jaho, ci sapraŭdy heta ličba adpaviadaje rečaisnaści, i ŭskosna vykazaŭ ździŭleńnie z nahody taho, kudy ž pajšli hetyja hrošy.

Jak adznačyŭ kiraŭnik rasijskaha Minfina, «emacyjnaja pramova Alaksandra Ryhoraviča [Łukašenki], u jakoj prysutničali pyšnyja epitety i rytaryčnyja pytańni, źviałasia da prośby ab vydzialeńni Rasijaj jašče adnaho kredytu Biełarusi».

5 kastryčnika Kudryn zajaviŭ, što Rasija nie daść Biełarusi apošni tranš kredytu ŭ pamiery 500 młn. dalaraŭ, ale budzie prasoŭvać intaresy krainy pa mižnarodnaj linii, u tym liku pa atrymańni pazykaŭ ad antykryzisnaha fondu JeŭrAzES.

Usiaho za apošnija dva hady Rasija sapraŭdy vydała Biełarusi 3 młrd dalaraŭ kredytaŭ na lhotnaj asnovie.

• 0
• 0
• 0
• 0
• 0
• 0
• 0
• 0