Karovy, jakich karmili kanoplami, davali niezvyčajnaje małako
Adno ź pieršych bujnych daśledavańniaŭ kanoplaŭ u karmach taksama pakazała źmieny ŭ pavodzinach niekatorych karoŭ.
The Washington Post paviedamlaje pra daśledavańnie, praviedzienaje ŭ Hiermanii. Zhodna ź im, małočnyja karovy, jakich karmili pramysłovymi kanoplami, vyrablali małako z delta-9-tetrahidrakanabinołam. Heta moža paŭpłyvać na patencyjnaje vykarystańnie kanapiel u jakaści inhredyjenta kambikarmoŭ.
Recenzavanaje daśledavańnie, praviedzienaje na hałštynskich karovach u Bierlinie i apublikavanaje ŭ časopisie Nature Food, źjaŭlajecca adnym ź pieršych vialikich daśledavańniaŭ vykarystańnia pramysłovych kanoplaŭ u jakaści patencyjnaha dadatku ŭ korm dla žyvioł.
Novaje daśledavańnie adbyvajecca ŭ toj čas, kali sielskaja haspadarka viartajecca da kanapiel, jakija masava vyroščvali da pieršaj pałovy XX stahodździa, kali ad ich admovilisia ŭ ramkach zmahańnia z narkotykami.
Kanopli — ahulnaja nazva raśliny Cannabis sativa. Ludzi vyroščvali jaje tysiačy hadoŭ z roznymi metami: ź ich plali viaroŭki i sietki, a z nasieńnia vyciskali alej. Kvietki kanabisa majuć vysokuju kancentracyju delta-9-tetrahidrakanabinołu — THK. Heta malekularnaje złučeńnie, jakoje vykłkiaje pačućcio «ejfaryi».
Kanopli z vysokim uzroŭniem THK nazyvajuć «marychuanaj». Pramysłovyja ž kanopli — heta nie «traŭka». U zachodnich krainach pramysłovyja kanopli pačynajuć znoŭ viartacca ŭ sielskuju haspadarku. Naprykład, u ZŠA jany bolš nie ŭvachodziać u śpis kantralavanych rečyvaŭ, kali nie ŭtrymlivajuć bolš za 0,3 pracenta THK.
Adnym z pabočnych praduktaŭ źmienaŭ u zakanadaŭstvach źjaŭlajecca rynak inšaha malekularnaha złučeńnia, atrymanaha z kanoplaŭ, — kanabidyjołu, abo CBD. Rynak hety na siońniašni dzień vielmi burna raźvivajecca: tavary z CBD zvyčajna pradajucca z-za mierkavanaj karyści dla zdaroŭja ŭ vyhladzie kropiel i jak dadatki ŭ šmatlikich kaśmietyčnych srodkach.
Heta ŭsio jašče adnosna nievialiki kavałak rynku sielskahaspadarčych tavaraŭ, ale ŭsio moža źmianicca. Daśledčyki kažuć, što kanopli mohuć być vydatnaj krynicaj kormu dla žyvioł, kali dziaržaŭnyja rehulatary ŭchvalać heta. Nasieńnie kanoplaŭ nie ŭtrymlivaje THK, i ŭ ich šmat białku.
Daśledčyki ź Niamieckaha fiederalnaha instytuta acenki ryzyki nie vyjavili nijakich źmien u pavodzinach karoŭ, jakija ŭžyvali kanopli ź nizkim ŭzroŭniem THK. Zhodna z daśledavańniem, tolki pry karmleńni častkami z bolš vysokaj kancentracyjaj THK źjaŭlalisia efiekty ŭ pavodzinach i stanie, jakija ŭklučali zapavolvańnie sardečnaha rytmu i dychańnia, uzmocnienaje paziachańnie, ślinavydzialeńnie, farmiravańnie nasavoha sakretu i pačyrvanieńnie častki vačej.
Niekatoryja žyvioły mieli aściarožnuju, časam chistkuju chadu, prymali niazvykłyja pozy i mahli praciahły čas stajać na adnym miescy. Pry ŭžyvańni kormu z vysokim utrymańniem THK žyvioły taksama jeli mienš i vyrablali mienš małaka.
Inšaje mahčymaje vykarystańnie kanapiel u žyviołahadoŭli — heta srodak dla źnižeńnia stresu, naprykład, padčas transpartavańnia karoŭ. Navukoŭcy pravodzili daśledavańni na byčkach, jakich karmili kanoplami, i žyvioliny, jak praviła, stanavilisia bolš spakajnymi, bo kanabinoidy źnižajuć uzrovień harmonaŭ stresu.
«Vy jašče doŭha nie ŭbačycie na palicach małako, uzbahačanaje CBD», — skazaŭ Džefry Štajnier, dyrektar Hłabalnaha inavacyjnaha centra kanapiel pry Univiersitecie štata Arehon.
Štajnier, jaki nie ŭdzielničaŭ u niadaŭna apublikavanym daśledavańni, ekśpierymientavaŭ z kanoplami ŭ jakaści karmavoj dabaŭki dla dojnych karoŭ, aviečak i chatniaj ptuški. Ale jaho kamanda atrymała dazvoł na vyvučeńnie kanapiel tolki z 2019 hoda.
«Uvieś hety čas kanopli zatrymalisia ŭ kapsule času, i ničoha niemahčyma było z hetym zrabić, — skazaŭ Štajnier. — Ciapier treba nahnać stračanaje, dazvolić kanoplam vyjści na rynak i dazvolić navucy stać asnovaj dla pryniaćcia rašeńniaŭ».
Kamientary