«Na fota śladoŭ paražeńnia niama»: vajskoviec vyśmiejaŭ zajavu Minabarony pra «źbituju ŭkrainskuju rakietu»
Biełaruskaje Minabarony paśla piacihadzinnaha rozdumu ab pryrodzie źjaŭleńnia abłomkaŭ u poli pad vioskaj Harbacha Janaŭskaha rajona zajaviła, što heta ŭkrainskaja zienitnaja rakieta, jakuju źbili biełaruskija SPA. Vajskoŭcy, ź jakimi źviazałasia «Naša Niva», u hetuju viersiju nie vierać.
Ukrainskaja zienitnaja rakieta ad S-300 upała siońnia ranicaj u poli kala vioski Harbacha Janaŭskaha rajona. Adbyłosia heta padčas masiravanaj rakietnaj ataki Rasii pa ŭkrainskaj infrastruktury. Ukrainski bok śćviardžaje, što było vypuščana 69 rakiet, 54 ź jakich ukrainskaja supraćpavietranaja abarona źbiła. Kompleksy S-300 składajuć kaściak ukrainskaj procirakietnaj abarony.
Najbolš padobna, što i hetaja rakieta, jakaja, pa zajavach prapahandystaŭ, maje ŭkrainskaje pachodžańnie, taksama źbivała rasijskuju rakietu.
Kali anałahičnaja situacyja zdaryłasia ŭ Polščy, kudy ŭpała ŭkrainskaja rakieta ad S-300, łukašenkaŭskaja prapahanda troliła palakaŭ, što ŭ tych nibyta kiepskaja supraćpavietranaja abarona, jakaja nie zaŭvažyła rakietu.
Siońnia ž anałahičnaja situacyja zdaryłasia ŭ Biełarusi, ale błoki rakiety pryziamlilisia na pole, a nie na pabudovy.
Pieršaja infarmacyja pra heta pryjšła ŭ internet-pabliki, i tolki praz 5 hadzin paśla padziei Minabarony zajaviła ab «źbitaj siłami biełaruskaj SPA ŭkrainskaj rakiecie».
«Na apublikavanych fota niama nijakich prykmiet taho, što rakieta była źbitaja», — skazaŭ «Našaj Nivie» dziejny vajskoviec.
«Na apublikavanych fota niama śladoŭ paražeńnia srodkami supraćpavietranaj abarony, pryncyp dziejańnia jakich u paražeńni celi svajho rodu «šrapnellu».
Na pryviedzienych BiełTA fota ja nie baču prykmiet paražalnaha ŭździejańnia na rakietu, a baču tolki defarmavanuju ad udaru ab ziamlu ruchalnuju častku rakiety S-300.
Było b cikava pračytać u paviedamleńni pres-słužby Minabarony Biełarusi, jakim mienavita srodkam SPA im udałosia juvielirna spuścić na ziamlu ŭkrainskuju rakietu, nie pakinuŭšy na joj zvykłych śladoŭ ni na adnym z zafiksavanych na fota bakoŭ», — dadaŭ aficer.
Ciapier čytajuć
Na svoj dzień naradžeńnia Zialenski z Naŭrockim, Naŭsiedam i Cichanoŭskaj u Vilni ŭšanuje pamiać Kastusia Kalinoŭskaha2
Kamientary