Brytaniec Hery Maki sioleta kožny dzień prabiahaŭ marafon, kab sabrać miljon funtaŭ dla dabračynnych arhanizacyj, jakija dapamahajuć chvorym na rak. 31 śniežnia 2022 hoda jon adpraviŭsia ŭ svoj apošni ŭ hetym hodzie, 365-ty zabieh.
Hery Maki z Kambryi pačaŭ 2022-hi hod z marafonu 1 studzienia i nie spyniaŭsia ŭvieś hod — z dapamohaj dabračynnych zabiehaŭ jon źbiraje srodki, jakija buduć padzieleny pamiž dabračynnym fondam Macmillan Cancer Support i chośpisam West Cumbria Hospice at Home, što dapamahajuć chvorym na rak, piša Bi-bi-si.
53-hadovy baćka traich dziaciej časta ździajśniaŭ svoj štodzionny zabieh daŭžynioj u 26,2 mili (42 km) pierad pačatkam pracoŭnaj źmieny na atamnym kompleksie Siełafiłd u Kambryi.
Pad uchvaleńni dobrazyčliŭcaŭ, 31 śniežnia ŭ 8.30 ranicy pa Hrynvičy spartsmien adpraviŭsia ŭ svoj 365-ty zabieh.
Za hod Maki znasiŭ bolš za 20 par krasovak i prabiažyć bolš za 9 500 mil (15 300 km) da momantu, kali skončyć svoj apošni marafon prykładna ŭ 14:00 pa Hrynvičy.
Na starcie jon skazaŭ BBC Breakfast, što atrymaŭ fienamienalnuju padtrymku, ale źlohku niervavaŭsia pierad finalnym vyprabavańniem.
«Reč nie ŭ adlehłaści, a ŭ tym, što heta apošni zabieh. Heta budzie asablivy dzień. Rak zakranaje ŭsich, tak što heta prablema nie tolki Zachodniaj Kambryi, heta nacyjanalnaja prablema», — skazaŭ jon.
«Ja prosta spadziajusia, što ludzi padtrymajuć nas, i my sapraŭdy źbiarom hety miljon funtaŭ. Kali my hetaha nie zrobim, heta adbudziecca nie tamu, što ja nie prabieh 365 marafonaŭ. My adznačym hety dzień, paviesialimsia na maršrucie, i ja ź nieciarpieńniem čakaju finišu», — dadaŭ Hery Maki.
«Ciažka vykazać słovami, nakolki my ŭdziačnyja Hery za toje, što jon advažyŭsia na hety nievierahodny vyklik», — skazała pradstaŭnica chośpisa At Home West Cumbria Chejli Makiej.
«Fizičnaja i psichałahičnaja siła, jakuju jon prademanstravaŭ, niespaścihalnaja. Hery nie tolki sabraŭ hrošy dla dźviuch fantastyčnych dabračynnych arhanizacyj, jon čaroŭnym čynam sabraŭ i zhurtavaŭ miascovuju supolnaść i ŭsich, chto jaho padtrymaŭ», — dadała jana.
Vykanaŭčy dyrektar dabračynnaj arhanizacyi Macmillan Cancer Support Kłer Roŭni dadała: «Dasiahnieńni i samaaddanaść Hery zaškalvajuć. Kožny božy dzień sioleta hety nievierahodny čałaviek prabiahaŭ pa marafonie, kab sabrać hrošy dla Macmillan i našych siabroŭ z chośpisa At Home West Cumbria i padtrymać ludziej, jakija žyvuć z rakam. Niama słoŭ, kab vykazać našu sardečnuju padziaku za ŭsio, što jon zrabiŭ».
Da ciapierašniaha momantu Hery Maki sabraŭ užo bolš za 600 tys. funtaŭ dla hetych dźviuch dabračynnych arhanizacyj.
Ciapier čytajuć
Daśledčyki znajšli miesca ŭ Biełarusi, dzie bazujecca «Arešnik»5
Daśledčyki znajšli miesca ŭ Biełarusi, dzie bazujecca «Arešnik»
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2020
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ20
«Hienierał Biada vylecieŭ praz bakavoje škło «Čajki». Małaviadomaja avaryja 1976 hoda, u jakoj zahinuli druhi čałaviek u BSSR i bajavy lotčyk-hienierał33
Kamientary