Finansava niezaležnyja, aktyŭnyja, ale traŭmavanyja vajnoj. Vyjšła novaje daśledavańnie pra biełarusaŭ u Litvie
Apytańnie biełarusaŭ, jakija pryjechali ŭ Litvu, pakazała, što 86% ź ich pakinuli Biełaruś pa palityčnych pryčynach. Novaja chvala emihracyi — finansava niezaležnyja ludzi, jakija abrali Litvu najpierš praz pryjaznaść da krainy i hramatnuju palityku litoŭskich uładaŭ.
Ekśpiert Centra daśledavańniaŭ Uschodniaj Jeŭropy Žyvile Dambraŭskajcie raskazała, što z dapamohaj apytańnia daśledčyki chacieli raźviejać niekatoryja mify, piša Delfi. «Adzin ź ich, i jaho časta vykarystoŭvaje prapahanda, što ŭ Litvu jeduć tolki tamu, što bolš nidzie nie prymajuć», — raspaviała palitołah.
Pavodle jaje, apytańnie pakazała, što heta nie tak.
Asnoŭnaja pryčyna, pa jakoj biełarusy vybirali Litvu, — hramatnaja palityka litoŭskaha ŭrada, jaki paśla padziej 2020 hoda daŭ mahčymaść ujezdu mnohim ludziam, kab tyja paźbiehli zaklučeńnia.
Pa słovach Dambraŭskajcie, apytanyja biełarusy paznačali, što dla ich byŭ jasny paradak atrymańnia vizy, dazvołu na žycharstva ŭ Litvie.
Druhaja, nie mienš važnaja pryčyna, — emacyjnaja.
«Ludzi adčuvajuć suviaź ź Litvoj, viedajuć Litvu, jany tut byvali, u ich jość tut znajomyja, suviazi.
Tamu Litva — adzin z takich napramkaŭ, jaki ludzi vybirajuć», — skazała jana.
Pa słovach Dambraŭskajcie, padčas daśledavańnia vyśvietliłasia, što
bolš za 80% biełarusaŭ pryjechali ź Biełarusi, bo ŭciakli ad palityčnaha pieraśledu: jany abo asabista sutyknulisia z represijami, abo niechta ź ich blizkich.
Asnoŭny ŭzrost emihrantaŭ apošniaj chvali — 30-40 hadoŭ.
Ludziam bolš stałaha vieku ciažej pierajechać z-za strachu, što jany nie zmohuć intehravacca, i z-za «vyklikaŭ, źviazanych sa zdaroŭjem», raspaviała ekśpiert.
Dambraŭskajcie padkreśliła, što ŭ pratestach 2020 hoda ŭdzielničali ludzi roznych sacyjalnych hrup. Usie jany jość i ŭ Litvie — «ad rabotnikaŭ zavodaŭ da prahramistaŭ».
Pa słovach Dambraŭskajcie, biełarusy dobra intehrujucca ŭ Litvie. Vyniki daśledavańnia pakazali, što tolki kala 10% ź ich karystajucca sacyjalnymi prahramami, pryčym častka vykarystoŭvaje dapamohu niaŭradavych arhanizacyj. Heta značyć, što na biudžet kładziecca nievialiki ciažar.
Kala 70% udzielnikaŭ apytańnia skazali, što ŭ ich jość pastajannaja i stabilnaja krynica dachodaŭ. Čverć ź ich da taho ž choča stvaryć pracoŭnyja miescy dla inšych.
Udzielnikaŭ apytańnia pytalisia i pra ŭpłyŭ vajny, jakuju Rasija pačała va Ukrainie. Dla biełarusaŭ, jakija pryjechali ŭ Litvu, hety dośvied byŭ «łamajučym i traŭmatyčnym».
«Ja dumaju, značna źmianiŭsia pracent ludziej, jakija hatovy viarnucca ŭ Biełaruś, kali niešta źmienicca. Padčas intervju ludzi akcentavali, što za ŭsio svajo žyćcio jany nie zmyjuć hetuju plamu. Jany majuć na ŭvazie maralnyja nastupstvy, źviazanyja z tym, što Biełaruś dapamahała, spryjała rasijskaj ahresii», — skazała Dambraŭskajcie.
Delfi nahadvaje, što Alaksandr Łukašenka na minułym tydni padpisaŭ dva zakony: u adpaviednaści z adnym, Biełaruś zmoža prysvoić sabie majomaść hramadzianina «niedružalubnaj režymu» krainy, u adpaviednaści z druhim, ź leta biełaruski režym moža pazbaŭlać hramadzianstva samich biełarusaŭ za «ekstremizm».
Pavodle daśledavańnia, u Litvie moža być kala 40 000 biełarusaŭ.
Ciapier čytajuć
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu1515
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu15
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ11
Kamientary