Kazachstan upieršyniu adpraviŭ naftu šlacham, alternatyŭnym Rasii, praz Kaśpijskaje mora
Kazachstan upieršyniu adpraviŭ svaju naftu ŭ Azierbajdžan praz Kaśpijskaje mora. Heta novy maršrut dla kazachskaj nafty, ciapier jaje asnoŭny šlach pralahaje praz Rasiju. Prezident Kazachstana patrabavaŭ naładzić alternatyŭnyja maršruty ŭ abychod RF, piša forbes.ru.
Kazachstan ažyćciaviŭ pieršuju testavuju adpraŭku svajoj nafty praz Kaśpijskaje mora ŭ Azierbajdžan, havorycca ŭ paviedamleńni na sajcie «Azierbajdžanskaha kaśpijskaha marskoha parachodstva» (ASCO).
Naftu z radovišča «Kašahan» u paŭnočnaj častcy Kaśpijskaha mora dastavili ŭ port Aktau, adkul jana adpraviłasia ŭ Baku. Dla transparciroŭki zadziejničali tankier «Akademik Chošbacht Jusifzade», jaki naležyć Azierbajdžanskamu kaśpijskamu marskomu parachodstvu. U składzie pieršaj partyi zahruzili 6900 ton syroj nafty.
Hruzaadpraŭščykam nafty stała kampanija INPEX North Caspian Sea, paviedamiła kazachstanskaja kampanija «KazTransOjł». Jana nazvała heta pieršaj testavaj adhruzkaj nafty na ekspart dla dalejšaj pastaŭki ŭ Baku. Testavaja adhruzka pakazała mahčymaść dyviersifikacyi ekspartnych maršrutaŭ dla kašahanskaj nafty šlacham čyhunačnych pieravozak u bok Transkaśpijskaha maršrutu, adznačyŭ dyrektar INPEX North Caspian Sea u Kazachstanie Chirošy Ikieda.
Radovišča Kašahan raźmieščanaje prykładna ŭ 90 km ad kazachskaha horada Atyrau na paŭnočnym zachadzie krainy. Heta adno z najbujniejšych radoviščaŭ Kazachstana ŭ Kaśpijskim mory.
Ciapier asnoŭny ekspartny šlach dla kazachstanskaj nafty lažyć praz Rasiju: pa trubapravodnaj sistemie Kaśpijskaha trubapravodnaha kansorcyuma da Navarasijska, adkul paliva pa mory adpraŭlajecca ŭ punkty pryznačeńnia. Pramoha vychadu da suśvietnaha akijana ŭ Kazachstana niama.
U lipieni 2022 hoda prezident Kazachstana Kasym-Žamart Takajeŭ daručyŭ naładzić novyja sposaby pastaŭki nafty ŭ abychod Rasii, u tym liku pa mory. Takajeŭ nazvaŭ pryjarytetnym transkaśpijski maršrut, jaki pralahaje praz Kitaj, Kazachstan, akvatoryju Kaśpijskaha mora, Azierbajdžan, Hruziju, Turcyju i krainy Jeŭropy, nie zachodziačy na terytoryju Rasii.
U minułym miesiacy Prymorski rajonny sud Navarasijska prypyniŭ na 30 sutak pracu Kaśpijskaha trubapravodnaha kansorcyuma dla likvidacyi parušeńniaŭ, vyjaŭlenych Rastransnahladam.
Jak vypadkovaje znajomstva ŭ hiej-kłubie skončyłasia hučnym zabojstvam. Novyja detali pa spravie biełarusa, jaki 25 hadoŭ tamu zarezaŭ pradziusara ŭ Maskvie44
Kamientary