U Varšavie zatrymali biełarusa, jaki pradstaŭlaŭsia supracoŭnikam banka
U Varšavie palicejskija zatrymali 24-hadovaha biełarusa, jaki pradstaŭlaŭsia supracoŭnikam banka i atrymlivaŭ najaŭnyja hrošy ŭ achviar telefonnaha machlarstva. Pa rašeńni suda jaho aryštavali na try miesiacy, piša Most.
Adzin z paciarpiełych raspavioŭ palicyi, što pavieryŭ tamu, chto telefanavaŭ, jaki pradstaviŭsia supracoŭnikam banka i papiaredziŭ pra nibyta pahrozu dla jaho źbieražeńniaŭ. U vyniku mužčyna pieradaŭ nieznajomcu 50 tysiač złotych (prykładna 13 400 dalaraŭ) i dźvie bankaŭskija karty ź pin-kodami.
Apieratyŭniki chutka ŭstanavili miesca, dzie znachodziŭsia adzin z padazravanych. Im akazaŭsia 24-hadovy biełarus, jaki, pavodle śledstva, asabista atrymaŭ hrošy i karty. Jaho zatrymali na miescy. Padčas pieratrusu ŭ ofisie supracoŭniki palicyi kanfiskavali bujnuju sumu najaŭnych u złotych, dalarach i jeŭra.
Padčas śledčych dziejańniaŭ u ofis pryjšoŭ i 22-hadovy ŭkrainiec, jaki zajaviŭ, što dastaviŭ čarhovuju «pasyłku» — 39 tysiač złotych (10 500 dalaraŭ), atrymanych ad inšaha čałavieka. Jon taksama pryznaŭsia, što ŭžo niekalki razoŭ zabiraŭ najaŭnyja ŭ roznych haradach Polščy i prynosiŭ ich u hety ofis. Jaho taksama zatrymali.
Usiaho palicyjanty kanfiskavali ŭ zatrymanych 135 500 złotych (36 500 dalaraŭ), 8 660 dalaraŭ i 200 jeŭra. Abodva mužčyny abvinavačvajucca ŭ ździajśnieńni machlarstva. Śledstva praciahvajecca: pravaachoŭniki nie vyklučajuć, što zatrymanyja mohuć być datyčnyja da inšych anałahičnych złačynstvaŭ.
Ciapier čytajuć
Minčuk čatyry hady trymaŭ u rabstvie piensijanieraŭ i prymušaŭ ich prasić miłaścinu. Jany ŭžo pamierli7
Kamientary