Moščy italjanskaha śviatoha znajšli ŭ kaściole pad Baranavičami. Vierahodna, jany tam zachoŭvalisia z XVII stahodździa
Moščy italjanskaha śviatoha Simplicyja z Olbii, jaki žyŭ u III — IV stahodździach, byli znojdzieny ŭ parafii Najśviaciejšaha Serca Isusa vioski Stałovičy ŭ 2022 hodzie nastajacielem chrama Janušam Fiešteram, piša bar24.by.
Raniej u Stałovičach znachodziłasia kamandoryja Maltyjskaha ordena. Chutčej za ŭsio, niechta z pradstaŭnikoŭ ordena paśla 1614 hoda pryvioz z saboj u VKŁ častku moščaŭ śviatoha. Pry padziele Rečy Paspalitaj Stałovičy ŭvajšli ŭ skład Rasijskaj Impieryi. Kamandoryja była začyniena, a kaścioł pieradali Pravasłaŭnaj carkvie.
Mahčyma, niekatory čas moščy zachoŭvalisia ŭ miascovych žycharoŭ u Stałovičach. U 1911 hodzie ŭ miastečku byŭ pabudavany novy katalicki chram, kudy ludzi pieradali majomaść sa staroha chrama, u tym liku i moščy śviatoha Simplicyja.
Da 2022 hoda relikvaryj z moščami stajaŭ u mietaličnaj šafie, dzie chavajuć roznyja relikvii, jakija vykarystoŭvajucca padčas nabaženstva. Relikvaryjem nichto nie cikaviŭsia.
— Jon byŭ niezaŭvažny, prykryty inšymi relikvijami, — raspavioŭ ajciec Januš. — Ja staŭ praviarać usiu majomaść, vyciahnuŭ relikvaryj i pračytaŭ, što napisana. A potym pačaŭ pošuki ŭ internecie.
Daviedaŭšysia, što zachoŭvaje ŭ sabie relikvaryj, śviatar vielmi ździviŭsia. Viadoma, što moščy hetaha śviatoha zachoŭvajucca tolki ŭ horadzie Olbija na Sardzinii.
— Ja dumaju, hetyja moščy, mahčyma, bolš kaštoŭnyja, čym stračanaja ikona Łaretanskaj Božaj Maci, jakaja zachoŭvałasia ŭ kamandoryi Maltyjskaha ordena ŭ Stałovičach, — adznačyŭ ajciec Januš.
U honar śviatoha Simplicyja ŭ kaściole Najśviaciejšaha Serca Isusa 15 maja adbyłasia ŭračystaja imša. Pierad hetym ajciec Januš napisaŭ śviataram u Olbiju, kab daviedacca, jak jany adznačajuć hetaje śviata, kab prytrymlivacca tradycyj.
Chto taki śviaty Simplicyj
Śviaty Simplicyj — italjanski biskup, pieršy mierkavany biskup Olbii. Katalickim kaściołam jon šanujecca jak śviaty, mučanik.
Simplicyja zamučyli 15 maja 304 hoda ŭ časy praŭleńnia rymskaha impieratara Dyjakletyjana. Pavodle miascovaj lehiendy, častka jaho cieła była vykinuta ŭ mora kala vostrava Tavałara. Rybaki śćviardžali, što tam bačyli bieśpierapynnaje viravańnie vady.
Moščy śviatoha zachoŭvajucca ŭ horadzie Olbija ŭ bazilicy Śviatoha Simplicyja z 1630 hoda.
Śviaty Simplicyj ličycca apiekunom horada Olbija. Dzień ušanavańnia jaho — 15 maja. Adnak śviatkavańnie pačynajecca ŭžo z 10 maja. Štodnia pravodziacca zabaŭlalnyja prahramy, padčas jakich usich biaspłatna kormiać midyjami.
15 maja ŭ baziliku Śviatoha Simplicyja z usioj Sardzinii prychodziać pracesii pałomnikaŭ, jakija niasuć fihurki mučanika.
Čytajcie taksama:
Halendry: narod Biełarusi, ad jakoha zastalisia tolki kvietki i kamiani
Ciapier čytajuć
«Nie vieru, što heta piša jana». Taćciana Martynava śćviardžaje, što Karpušonak taksama źnikła13
«Nie vieru, što heta piša jana». Taćciana Martynava śćviardžaje, što Karpušonak taksama źnikła
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona22
Kamientary