Pryhožyn zajaviŭ, što Rasija «abasrałasia», a «ŭkraincy adny z najmacniejšych u śviecie»
Kiraŭnik PVK «Vahnier» i «kuchar Pucina» vystupiŭ z zajavami, jakija mohuć śviedčyć pra źmienu nastrojaŭ u maskoŭskaj elicie. Ën pieršy amal adkrytym tekstam zajaviŭ, što «śpiecyjalnaja vajennaja apieracyja» była pamyłkaj, jakaja skončyłasia pravałam.
U bajach za Bachmut zahinuli 10 tysiač źniavolenych i 10 tysiač štatnych bajcoŭ PVK «Vahnier». Pra heta Jaŭhien Pryhožyn zajaviŭ u intervju Kanstancinu Dałhovu. Ciažka skazać, ci hetyja źviestki praŭdzivyja. Adnak jany supadajuć z acenkaj amierykanskaj vyviedki. Raniej prezident Bajden acaniŭ straty rasijan u 100 tysiač čałaviek zabitymi i paranienymi.
Pavodle Pryhožyna, straty ŭkraincaŭ bolšyja: 50 tysiač zahinułych, 50—70 tysiač paranienych. Adnak heta nie moža być praŭdaj: pry nastupalnych apieracyjach u haradach tyja, chto nastupaje, niasuć straty ŭ razy bolšyja, čym tyja, chto abaraniajecca.
Pry hetym Jaŭhien Pryhožyn pieršym z rasijskaj elity adkryta pryznaŭ siłu ŭkrainskaj nacyi i pravał zadač, jakija pierad saboj staviła Maskva. A taksama pryznaŭ, što dla Ukrainy hetaja vajna jak Vialikaja Ajčynnaja dla Rasii ŭ svoj čas.
«Ukraincy siońnia — adny z najmacniejšych u śviecie. U ich vysoki ŭzrovień arhanizacyi, vysoki ŭzrovień padrychtoŭki, vysoki ŭzrovień vyviedki, u ich jość roznaje ŭzbrajeńnie. Bolš za toje, jany pracujuć na lubych sistemach: na savieckich, na nataŭskich, na čym zaŭhodna — adnolkava paśpiachova. Ukraincy vajujuć dla «dasiahnieńnia Viarchoŭnaj mety», jak kaliści my ŭ Vialikuju Ajčynnuju vajnu. Pry hetym robiać usio vielmi technałahična i vielmi dakładna», — skazaŭ Pryhožyn.
«SVA (u Rasii zakon abaviazvaje nazyvać vajnu śpiecyjalnaj vajennaj apieracyjaj. — «NN») rabiłasia dziela «denacyfikacyi» … a my zrabili Ukrainu nacyjaj, jakuju viedajuć va ŭsim śviecie.
Zaraz što tyčycca «demilitaryzacyi». Kali ŭ ich było na pačatak śpiecapieracyi ŭmoŭna 500 tankaŭ, ciapier u ich piać tysiač. Kali vajavać tady ŭmieli 20 tysiač bajcoŭ, to ciapier 400 tysiač. Jak ža my jaje demilitaryzavali?
Ciapier my, naadvarot, — chren viedaje jak — militaryzavali Ukrainu», — zajaviŭ kuchar Pucina.
Pryhožyn pryznaŭ pravały rasijskaj armii i navat namiaknuŭ na toje, što rasijskija źvierstvy i bambiožki zhurtavali narod Ukrainy.
«Kali my chočam viarnuć Ukrainu ŭ «prarasijskaje łona», treba pamianiać vierchavinu ŭłady, rascałavać narod u zad i paklikać ich da siabie. My što zrabili zamiest hetaha?
Prajšlisia pa-chamsku pa ŭsioj terytoryi botami ŭ pošukach nacystaŭ. Pakul šukali nacystaŭ, nakaŭbasili ŭsich, kaho možna. Padyšli da Kijeva, potym, ruskaj movaj nazyvaju, abasralisia i adyšli. Potym da Chiersona — abasralisia i adyšli. Paśla hetaha abo da hetaha — Izium, Liman. I niejak u nas usio nie składvajecca.
Iosif Visaryjonavič by zrabiŭ vysnovy — rasstralaŭ by čałaviek 200… ale ŭ nas nijakich vysnoŭ pakul nie zroblena», — skazaŭ Pryhožyn.
Ën prahnazuje dalejšyja prablemy dla Rasii.
«Najchutčej, dla nas scenar SVA nie budzie dobrym. Nam treba rychtavacca da vielmi ciažkaj vajny.
Što ŭ hetaj vajnie treba rabić, kab nie prasrać Rasiju? My pavinny ŭvieści vajennaje stanovišča … my pavinny abjaŭlać novyja mabilizacyi. My pavinny padčas vajennaha stanovišča ŭsich pieravieści, kaho mahčyma, na vytvorčaść bojeprypasaŭ. My pavinny pierastać budavać šklanyja viežy, jak «Hazpram»… pierastać žyravać, pierastać budavać novyja darohi i infrastrukturnyja abjekty. I pracavać tolki na vajnu».
Pryhožyn navat pryznaŭ, što Danbas pad rasijskim kantrolem byŭ raskradzieny.
«Tam ža ŭ schiemach vuhalnych takija mutki byli! Pastavili tudy Kurčanku — Kurčanku, jaki raskraŭ usio, što moh. Zrazumieła, što peŭnaja kolkaść ludziej i ŭ pahonach, i biez pahonaŭ, i z Administracyi prezidenta byli ŭ doli z hetym Kurčankam. Ale Danbas raskradali, prostyja rabaciahi byli ŭ zadnicy».
U toj ža čas Jaŭhien Pryhožyn, pra palityčnyja ambicyi jakoha apošnim časam havorać usio čaściej, pasyłaje sihnały Zachadu i rasijskamu hramadstvu, što jon moža być adkaznym palityčnym lidaram, zaviarajučy, što jadziernaja zbroja nie pavinna ŭžyvacca.
«My zładzili bojku. Što takoje jadzierny kanflikt? Voś jość susiedzi. Jany pasvarylisia. Ty možaš susiedu raźbić mordu. Možaš raźbić posud. Usiakaje byvaje. Ale kali ciabie susied pasłaŭ na try litary, a ty ŭziaŭ siakieru i ŭjab*ŭ jaho pa bašcy — to heta ŭžo takaja sabie situacyja, dziŭnaja. Voś jadziernaja bomba — heta siakiera. Nie treba za susiedam biehać ź siakieraj. Treba sumlenna albo jamu p***iuloŭ ustavić, albo pryznacca, što jon tabie ŭstaviŭ. Treba na poli boju dakazvać svaju pravatu, a nie biehać ź siakieraj — jadziernaj bombaj».
U Rasii narastaje niezadavolenaść kiraŭnictvam siłavych struktur, na jakich uskładajuć adkaznaść za razhrom rasijskich vojskaŭ va Ukrainie. Analityki adznačali, što Jaŭhienu Pryhožynu ŭ toj ža čas koštam dziasiatkaŭ tysiač žyćciaŭ stvarali reputacyju čałavieka, jaki ŭsio ž uziaŭ Bachmut. Praŭda, hetaja apieracyja zaciahnułasia na doŭhija dzieviać miesiacaŭ.
«Usie abmiarkoŭvajuć intervju Pryhožyna i nie mohuć zrazumieć, jak ža jon kaža takoje, pra što inšym i maŭčać strašna! Ale ŭsio stanovicca na svaje miescy, kali dapuścić, što ŭsie hetyja adkryćci — infarmacyjnaja padrychtoŭka da pieramoŭ i niepaźbiežnych kampramisaŭ», — piša rasijski publicyst Siarhiej Staravojtaŭ.
Čytajcie taksama: Pucinu pierad telekamierami padaryli kartu, dzie «nijakaj Ukrainy niama». Vyjaviłasia, što jana tam taki jość, a voś Pieciarburh, Sibir i Krym nie rasijskija
Ciapier čytajuć
«Kali ŭžo siudy prylacić ukrainskaja rakieta!» Vyzvaleny žurnalist Jaŭhien Mierkis raskazaŭ pra škłoŭskuju kałoniju7
Kamientary