Cichanoŭskaja: Siarhieju treba vybrać svoj šlach: albo ty ŭ miedyja i havoryš usio, što chočaš, albo ty ŭ palitycy
Śviatłana Cichanoŭskaja ŭ intervju DW Belarus ščyra pryznałasia, što jaje muž Siarhiej — nie samy dypłamatyčny čałaviek, i raskazała, jak siamja Cichanoŭskich budzie dalej dziejničać u palityčnym asiarodździ.
Paśla vyzvaleńnia Siarhieja Cichanoŭskaha mnohich cikaviła, jak jaho viartańnie paŭpłyvaje na palityčnaje i asabistaje žyćcio siamji. Śviatłana Cichanoŭskaja adznačaje, što jaje rolu muž razumieje i nie sprabuje źmianić, adnak jamu samomu jašče treba čas, kab znajści svajo miesca ŭ novaj realnaści.
«Ja nie mahu skazać, što niejak palityčnaje žyćcio źmianiłasia, tamu što jon razumieje maju rolu, jon jaje nie sprabuje źmianić. Zrazumieła, što jamu treba jašče troški času, kab znajści svajo miesca. Tamu što jość takaja vialikaja prablema, što ludziam, jakija trapili ŭ turmu ŭ 2020 hodzie, treba čas uśviadomić, što prajšło ŭžo 5 hadoŭ, źmianiŭsia kantekst, źmianiłasia hieapalityčnaja abstanoŭka».
Pa słovach palityka, Siarhiej užo i sam razumieje, što paśla vyzvaleńnia dziejničaŭ zanadta paśpiešliva, i pryznaje svaje pamyłki.
«Siarhiej (…) vydaŭ videa «100 dzion paśla źniavoleńnia», dzie jon pryznaje, što pačaŭ dziejničać paśpiešliva i zrabiŭ niekalki pamyłak. I jamu jašče treba šmat čaho daviedacca. Niemahčyma 5 hadoŭ achapić i zrazumieć, što dzie było, što jak adbyvałasia. Ale my jaho pacichu navučajem, raskazvajem».
Cichanoŭskaja padkreślivaje, što palityčnaja dziejnaść patrabuje dośviedu i ŭzvažanaści.
Jana akreśliła vybar, jaki ciapier staić pierad jaje mužam: zastavacca svabodnym błohieram ci stanavicca palitykam, jaki musić dumać pra nastupstvy kožnaha słova.
«Tamu što dla palityki taksama patrebny dośvied. I tut taksama treba vybrać svoj šlach.
Albo ty pracuješ u miedyja, i tady ty možaš kazać ad dušy ŭsio, što chočaš. Albo ty palityk, i tady ty pavinien dumać pra nastupstvy svaich słoŭ. I pavinien havaryć adpaviedna abstanoŭcy, skažam tak. Tamu heta jahony šlach. Ja pobač, dapamahaju jamu».
Pry hetym, jak śćviardžaje Cichanoŭskaja, jany nie imknucca pieranosić palityčnyja dyskusii ŭ chatniuju atmaśfieru, choć heta i nie zaŭsiody atrymlivajecca.
«Što tyčycca doma. Doma my siamja. I ŭ nas była para niaznačnych kanfliktaŭ na fonie: «Navošta ty heta skazaŭ tak niapravilna? Navošta ty pakryŭdziŭ biełarusaŭ?».
I my vyrašyli, što nie pieranosim dadomu palityki. My doma siamja, my doma ź dziećmi. Viadoma, nie zaŭsiody ŭdajecca, ale my vielmi starajemsia. Tamu što vielmi niervovaja ŭ cełym abstanoŭka na palityčnym poli. I, viadoma, možna da biaskoncaści i spračacca, i dyskutavać».
Viartańnie Siarhieja, pa słovach Śviatłany, z adnaho boku, zrabiła žyćcio lahčejšym, padvoiła siły. Ź inšaha, dadało joj adkaznaści, bo na pačatku ich usprymali jak adno cełaje. Ciapier ža Siarhiej usio bolš padkreślivaje svaju samastojnaść.
«Stała składaniej, tamu što ja adčuvaju adkaznaść za šlach Siarhieja taksama. Kali jon siabie šukaje, i znoŭ ža, kali jon robić niejkija pamyłki, usio roŭna nas niejki čas, asabliva spačatku, usprymali jak adno cełaje. I ŭsio roŭna pytalisia, skažam tak, ź mianie. Ale čym bolš samastojnym stanovicca Siarhiej, tym, viadoma, nas mienš źviazvajuć u adno cełaje. I jon zaŭsiody sam zajaŭlaje, što «Ja nie pracuju ŭ Ofisie. My asobnaja struktura, asobnaja jačejka, asobny čałaviek. I nie treba nas jak by źmiešvać u kuču».
Na pytańnie, ci źjaŭlajucca jany palityčnym tandemam, Śviatłana Cichanoŭskaja adkazała, što ŭ siamji — biezumoŭna, ale ŭ palitycy Siarhieju jašče treba vyznačycca sa svajoj rollu.
«My vidavočna nie ŭ kankurencyi. U siamji my dakładna tandem. Na palityčnym poli pakul jašče treba Siarhieju vyznačycca, kab zrazumieć, chto my ŭ adnosinach adzin da adnaho».
Na pytańnie, jakoj jana bačyć svaju palitčynuju budučyniu, Śviatłana Cichanoŭskaja adkazała:
«Ja žadaju viarnucca dadomu i žyć u Biełarusi. U jakoj roli? Napeŭna, heta druhasnaje. Ja razumieju nabyty dośvied. Ja razumieju nabyty ŭzrovień kantaktaŭ u śviecie. I razumieju svaju vahu. I kali treba budzie słužyć Biełarusi i dalej u luboj jakaści, to, viadoma, ja budu. Tamu što ja hipieradkazny čałaviek. Vielmi. I kali treba budzie, ja budu praciahvać».
Što tyčycca palityčnaj budučyni muža, Cichanoŭskaja ličyć, što jahony styl moža być zapatrabavany, navat kali jon nie adpaviadaje kłasičnym ujaŭleńniam pra dypłamatyju.
«Siarhiej… Znoŭ ža, tut zaležyć ad taho, jaki šlach jon abiare. Jon nie vielmi dypłamatyčny čałaviek. Dla dypłamatyi jon vidavočna nie padychodzić. Ale, mahčyma, nam patrebnyja takija jarkija palityki. Unpredictable (niepradkazalnyja — NN). U nas takija ŭ śviecie jość. Ale pahladzim. Ja tut nie chaču źviazvać našu budučyniu ź Siarhiejem tolki z palitykaj. Pa-roznamu moža skłaścisia žyćcio».
Kamientary