Rasijskija kampanii aktyŭna vyvozili majomaść pradpryjemstvaŭ z akupavanaha Maryupala. U pasobnictvie im zaśviacilisia i biełarusy

Pavodle rasśledavańnia, niahledziačy na badzioryja relacyi rasijskaj prapahandy pra paśpiachovaje adnaŭleńnie Maryupala pad rasijskaj uładaj, u rečaisnaści z akupavanaha horada masava vykradajuć majomaść i pradukcyju ŭkrainskich pradpryjemstvaŭ: «Azoŭstali», zavoda imia Iljiča i inšych. 

Da kanca vieraśnia 2022 hoda pamiž «DNR» i Rasijaj de-jure isnavała miaža, tamu tavary, jakija prachodzili praź jaje, dekłaravalisia pa adpaviednych zakonach. Pa hetych mytnych zapisach i možna adsačyć maštaby vyvazu ŭ Rasiju abstalavańnia i karysnych vykapniaŭ. Užo z kastryčnika minułaha hoda hetaja mahčymaść źnikła, pakolki Pucin pryniaŭ rašeńnie ŭklučyć «DNR» i «ŁNR» razam z Zaparožskaj i Chiersonskaj abłaściami niepasredna ŭ Rasiju.

Z hetych zapisaŭ, u pryvatnaści, vynikaje, što 26 vieraśnia 2022 hoda, usiaho za 4 dni da pucinskaj pastanovy ab anieksii ŭkrainskich rehijonaŭ, u Rasiju ŭvieźli bolš za 1,5 młn kiłahramaŭ mietału, vyrablenaha na zavodzie «Azoŭstal». Jaho košt skłaŭ amal 2 młn dalaraŭ. 

Tysiaču ton pradukcyi «Azoŭstali» vyvoziła TAA «Lesstrojtorh» z horada Vałujki Biełharodskaj vobłaści. Hruz z Maryupala dastaŭlaŭsia na čyhunačnuju stancyju «Tapala», raźmieščanuju na rasijska-ŭkrainskaj miažy, a zatym ekspartavaŭsia ŭ inšyja krainy (dakumienty FMS nie raskryvajuć, u jakija mienavita).

Akramia «Azoŭstali», kampanija z horada Vałujki vyvoziła i majomaść Maryupalskaha mietałurhičnaha kambinata imia Iljiča, jakoje taksama, jak i «Azoŭstal», naležała chołdynhu «Mietinviest» Rynata Achmietava. 26 vieraśnia «Lesstrojstorh» vyviez amal 400 tysiač kiłahramaŭ stali z zavoda Iljiča. Jaje košt skłaŭ kala 380 tysiač dalaraŭ.

Akramia pradukcyi, na «Azoŭstali» ŭ «Mietinviesta» byli vielmi vialikija zapasy vuhalu. Jak vynikaje z mytnych zapisaŭ, paśla poŭnamaštabnaha ŭvarvańnia Rasija vyviezła z Maryupala amal 2,5 tysiačy ton vuhalu (heta prykładna 40 vahonaŭ). Za kradziež vuhalu adkazvała hrupa kampanij «Tałtek», kiraŭnik jakoj Juryj Kačerynski vałodaje asabniakom na Rubloŭcy niepadalok ad majontka siamji byłoha hałoŭnakamandujučaha rasijskim uvarvańniem va Ukrainu Siarhieja Suravikina.

«Tałtek» vyviez prykładna 300 ton vuhalu na sumu kala 40 tysiač dalaraŭ. A jašče ŭ razy bolš — «dačka» «Tałteka» — vuhalnaje pradpryjemstva z Kuzbasa «Palany». U žniŭni minułaha hoda «Palany» vyvieźli z Maryupala bolš za 2 tysiačy ton vuhalu na sumu bolš za 300 tysiač dalaraŭ.

Z Maryupala vyvoziać prosta ŭsio, navat pradmiety, jakija nie ŭjaŭlajuć asablivaj kaštoŭnaści. U dakumientach rasijskaj mytni havorycca, što ŭ krasaviku minułaha hoda z razburanaha ŭkrainskaha horada vykrali niekalki hruzavych kantejnieraŭ i vahonaŭ. Ich košt nie pieravyšaje 100 tysiač dalaraŭ, ale nie heta hałoŭnaje.

Pavialičyć

Asabliva dla nas cikava toje, što ŭ hetym kradziažy rasijanam dapamahali partniory ź Biełarusi, a mienavita pradpryjemstva «Mahiloŭski mietałurhičny zavod». Jakraz jaho nazva była paznačanaja ŭ dakumientach mytni. Kantejniery, pa hetych dakumientach, vyvozilisia ŭ Kalinkavičy i pryznačalisia dla patreb «Mahnitahorskaha mietałurhičnaha kambinata» (MKK).

MKK — adzin z najbujniejšych mietałurhičnych kambinataŭ Rasii i byłoha SSSR. Jašče viasnoj 2022 hoda Jeŭrasajuz uklučyŭ u sankcyjnyja śpisy nie tolki sam zavod, ale i šerah afilavanych ź im struktur, uklučajučy turecki kambinat MMK Metalurji. Akramia taho, u sankcyjny śpis byŭ uklučany kiraŭnik Rady dyrektaraŭ MMK Viktar Rašnikaŭ, jaki ličycca «viadučym rasijskim biznesoŭcam u siektarach ekanomiki, što zabiaśpiečvajuć istotnuju krynicu dachodu ŭrada Rasijskaj Fiederacyi, i jaki niasie adkaznaść za anieksiju Kryma i destabilizacyju Ukrainy». Paźniej Rašnikaŭ trapiŭ pad sankcyi ZŠA, Japonii, Kanady i inšych krain.

• 1
• 0
• 2
• 9
• 1
• 4
• 40
• 0