Były palitviazień raskazaŭ, jak źniavoleny «adrezaŭ hałavu» inšamu. Zabity ładziŭ pravakacyi
Hetyja padziei, pa słovach Kabanava, adbylisia miesiac tamu.
Były źniavoleny Alaksandr Kabanaŭ raskazaŭ, što miesiac tamu ŭ mahiloŭskaj turmie, dzie jon adbyvaŭ pakarańnie, źniavoleny z proźviščam Č. pierarezaŭ «myjkaj» (tak nazyvajuć za kratami lazo ad adnarazovaha stanka dla haleńnia) šyju inšamu źniavolenamu B. Lazo znajšli niby ŭ chrybietniku. Zdaryłasia heta siarod biełaha dnia.
«Z B. ja siadzieŭ dva miesiacy ŭ adnoj kamiery, pravakatar opiera N. Takija turemnyja noravy.
A jašče pryjazdžaŭ śledčy i dapytvaŭ maich sukamiernikaŭ, užo pa mnie. Składajuć psichałahičny partret dla budučych sudovych pasiedžańniaŭ», — napisaŭ jon u sacsietkach.
Alaksandr Kabanaŭ udakładniŭ «Našaj Nivie», što atrymaŭ infarmacyju pra heta «ad svajoj pravieranaj krynicy».
«Heta tolki častka, jakuju mahu ahučyć», — kaža jon.
Pa jaho słovach, Č. mieŭ prablemy z narkotykami, katavaŭ svaju ciažarnuju žonku (atrymaŭ kala 10 hod źniavoleńnia), B. asudžany za zabojstva (jamu dali kala 17 hadoŭ, prykładna pałovu terminu adsiedzieŭ).
«Im karystalisia dla taho, kab pravakavać sukamiernikaŭ i potym krucić ich pa 411 artykule (Złosnaje niepadparadkavańnie patrabavańniam administracyi papraŭčaj ustanovy). Z-za jaho pa 411-m atrymaŭ dadatkovy termin palitviazień, anarchist, heta było jašče pry mnie».
Pa słovach Kabanava, B. ładziŭ pravakacyi ŭ kamierach. Adna ź ich adbyłasia ŭ jaho na vačach.
«U turmie vydajuć parašok dla taho, kab myć unitaz, rakavinu, — raskazvaje jon. — B. pačaŭ hety parašok adkładać sabie ŭ pakiet. A druhi źniavoleny, nie pamiataju jaho proźvišča, padyšoŭ da jaho i skazaŭ, što hety parašok dajuć na usiu kamieru. B. pačaŭ adkazvać, što heta jaho parašok, jamu nibyta jaho dasłali ŭ pasyłcy. A pasyłak užo nie było try hady.
Pačynajecca słoŭnaja svarka, jany chapajuć adzin adnaho za hrudki, šturchajuć, kryčać. U hety momant vyklikajuć dziažurnaha. Abodvum dajuć pa 30 sutak ŠIZA.
U mianie ź im byŭ taki vypadak: B. prasiŭ u mianie pačak cyharet, zapałki. Ja daŭ, kažu, što jamu heta na tydzień. A jon sieŭ i vykuryŭ za dzień. Nazaŭtra znoŭ padyšoŭ i pačaŭ prasić. Viadoma, bolš ja nie davaŭ. Skazaŭ jamu, kab sieŭ na nary i kab ja bolš jaho nie čuŭ. Jon voś tak dva miesiacy siadzieŭ, utorkvaŭ u adnu kropku».
Kabanaŭ apisvaje jaho pavodziny jak «nieadekvatnyja».
Sam Kabanaŭ vyjšaŭ na volu ŭ śniežni 2022 hoda. Jamu prysudzili 3 hady za «arhanizacyju hrupavych dziejańniaŭ, jakija hruba parušyli hramadski paradak». Pierad vybarami jon byŭ u inicyjatyŭnaj hrupie Śviatłany Cichanoŭskaj. Ciapier błohier pracuje pres-sakratarom u «Biełpole» (častcy abjadnańnia byłych siłavikoŭ z «Bajpoł»).
Čytajcie taksama:
Eduardu Babaryku dali 8 hadoŭ kałonii
U Fanipali čarhovyja chapuny za žnivieńskija pratesty 2020 hoda — pravaabaroncy
«Za hod my tak i nie daviedalisia, za što kankretna była asudžanaja Kacia Andrejeva»
Ciapier čytajuć
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu53
Kamientary