U Hruziju pryjechali daktary z Polščy dla miedycynskaha abśledavańnia Michaiła Saakašvili
Hrupa polskich daktaroŭ pačała ŭsiebakovaje miedycynskaje abśledavańnie byłoha prezidenta Hruzii Michaiła Saakašvili, jak paviedamiŭ premjer-ministr Polščy Matevuš Maraviecki, piša Meduza.io.
Pradstaŭnik partyi «Adziny nacyjanalny ruch» Hieorhij Čaładze ŭdakładniŭ, što ŭ Hruziju prybyli piać daktaroŭ. Pavodle jaho słoŭ, terminy ich misii nie abmiežavanyja: jany prabuduć u krainie stolki, kolki spatrebicca. Miedycynskaje zaklučeńnie budzie kanfidencyjnym, jaho pieradaduć krainam ES.
Pieramovy ab miedycynskim abśledavańni Saakašvili vialisia niekalki miesiacaŭ: ułady Polščy jašče ŭ sakaviku 2023 hoda kazali, što hatovyja adpravić daktaroŭ, adnak Hruzija doŭha nie davała na heta zhody.
«Paśla šaści miesiacaŭ zatrymak urad narešcie dazvoliŭ daktaram naviedać Michaiła Saakašvili ŭ balnicy. Daktary vyvučać jaho stan i paśla zrobiać svaje vysnovy», — skazaŭ ahienctvu AFP advakat byłoha prezidenta Dzita Sadzahlišvili.
Michaił Saakašvili znachodzicca pad vartaj z kastryčnika 2021 hoda. Saakašvili, jakomu hruzinskija sudy zavočna vynieśli prysudy pa niekalkich spravach, aryštavali paśla taho, jak jon viarnuŭsia ŭ krainu, nielehalna pierajšoŭšy miažu.
Pad aryštam, jak nieadnarazova zajaŭlali advakaty palityka, stan zdaroŭja Saakašvili rezka pahoršyŭsia. Z maja 2022 hoda palityk znachodzicca ŭ tbiliskaj klinicy «Vivamied». Padčas sudovych pasiadžeńniaŭ 20 daktaroŭ zajavili, što Saakašvili znachodzicca ŭ vielmi ciažkim stanie. U lutym 2023 hoda paviedamlałasia, što Saakašvili važyŭ 67 kiłahramaŭ. Pierad aryštam jon važyŭ 116 kiłahramaŭ pry roście 195 santymietraŭ.
U lutym 2023 hoda Tbiliski haradski sud adchiliŭ chadajnictva abarony Saakašvili ab jaho vyzvaleńni z-za krataŭ abo adterminoŭki prysudu pa stanie zdaroŭja. U sakaviku anałahičnaje rašeńnie pryniaŭ Apielacyjny sud. U mai Jeŭrapiejski sud pa pravach čałavieka taksama adchiliŭ prośbu advakataŭ ab vyzvaleńni Saakašvili dla lačeńnia za miažoj.
Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»9
Kamientary