«Bieły lehijon» zajaviŭ, što ciapier nie maje dačynieńnia da dziejnaści Siarhieja Bulby
Nahodaj dla taho, što arhanizacyja faktyčna adchryściłasia ad ciapierašniaj dziejnaści svajho stvaralnika, staŭ niadaŭni skandał u Varšavie.
Na minułym tydni ŭ Varšavie razhareŭsia skandał vakoł Biełaruskaha moładzievaha chaba. Raniejšaja kamanda (na čale z Alaksandram Łapko), jakaja zajmałasia arhanizacyjaj mierapryjemstvaŭ dla biełarusaŭ u Polščy, 2 žniŭnia apynułasia faktyčna na vulicy. Novym kiraŭnikom arhanizacyi ŭ vyniku papiarovych kulbitaŭ staŭ 56-hadovy Siarhiej Bulba. Ad taho času dziejnaść chaba na paŭzie.
Z hetaj pryčyny svoj zvarot padrychtavaŭ «Bieły Lehijon», stvaralnikam jakoha byŭ Bulba.
Arhanizacyja padkreślivaje, što ŭ svoj čas stvarałasia dziela patryjatyčnaha vychavańnia i vajskovaj padrychtoŭki biełaruskaj moładzi.
«Apošnija hady dziejnaść našaj arhanizacyi pierastała nasić publičny charaktar, asabliva paśla palityčna matyvavanaj, sfabrykavanaj režymam «Spravy patryjotaŭ» u 2017 hodzie, kali z-za adnoj tolki prynaležnaści da «Biełaha Lehijonu» ludziej kidali za kraty i prydumlali abvinavačvańni. Adnak siabry «Biełaha Lehijona» praciahvali i praciahvajuć hodna rabić usio mahčymaje, kab nablizić uvasableńnie našaj ahulnaj mary — volnaj, niezaležnaj, pravavoj, biełaruskaj dziaržavy Biełaruś: nie składajuć ruk u samoj krainie, a taksama, achviarujučy saboj, baroniać svabodu i niezaležnaść Ukrainy.
Maralnym aŭtarytetam, lidaram i faktyčnym kiraŭnikom «Biełaha Lehijona» apošnija hady byŭ Mirasłaŭ Łazoŭski, jaki hieraična zahinuŭ u Bachmucie (Ukraina), zmahajučysia z rasiejskaj impierskaj ahresijaj u składzie bataljona «Vołat» Pałka Kalinoŭskaha», — pišacca ŭ zvarocie.
«Bieły Lehijon» padkreślivaje, što nie byŭ udzielnikam anijakich pracesaŭ raskołu i ličyć partnioram kožnaha, chto padzialaje ich pohlady i pryncypy.
«Na žal, napracavany hadami stanoŭčy imidž «Biełaha Lehijona» apošnim časam niezasłužana ciarpić ad dziejnaści jaho asobnych siabroŭ, tamu Hałoŭny štab «Biełaha Lehijona» ličyć važnym patłumačyć šyrokaj hramadskaści nastupnaje.
My cenim i pavažajem usio, što było zroblena za papiarednija časy Siarhiejem Bulbam jak inicyjataram i zasnavalnikam «Biełaha Lehijona». Šmat hadoŭ jon hodna svajoj dziejnaściu i asabistym prykładam demanstravaŭ najlepšyja jakaści ščyraha patryjota, jaki svajo žyćcio addavaŭ vajskova-patryjatyčnamu vychavańniu i zmahańniu za niezaležnaść Biełarusi.
Apošnim časam Siarhiej Bulba zaniaŭsia aktyŭnaj publičnaj dziejnaściu, utvaryŭ i ačoliŭ niekalki arhanizacyj. Bolš za toje, jon, nie prysłuchoŭvajučysia da mierkavańnia pabracimaŭ, staŭ aktyŭnym udzielnikam pracesaŭ vakoł Biełaruskaha moładzievaha chaba ŭ Varšavie, što pryviało da źniščeńnia hetaha papularnaha biełaruskaha asiarodku i strataŭ dla imidžu biełaruskaj supolnaści ŭ Polščy ahułam.
My nie majem nijakaha dačynieńnia da ciapierašniaj dziejnaści Siarhieja Bulby jak vajskovaha ekśpierta i hramadskaha aktyvista, da stvoranych abo ačolenych im arhanizacyj. Hetaja dziejnaść nijakim čynam nie źviazanaja z ułasna «Biełym Lehijonam», nie adlustroŭvaje ni našych pohladaŭ, ani pryncypaŭ našaj struktury», — havorycca ŭ zvarocie.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj34
Kamientary
Spadar Čysłaŭ aka Bulba žyŭ va Ŭkrainie z 2013 hoda, ale nia moža ničoha pradjavić ab svajoj dziejnaści ni da 2020, ni da 24.02.2022, ni paśla. Ničoha nie viadoma ab jahonym uzdiele ŭ dziejnaści biełaruskich dabraachvotnikaŭ albo ŭ mierapryjemstvach pa padrychtoŭcy biełaruskaha supracivu ŭ zamiežžy. U adroźnieńni ad spadara Łazoŭskaha, R.I.P.
Ale jon šmat raspaviadaje u raznastajnych miedyjach nibyta insajdy pa biełaruskamu pytańniu ledź nie niepasredna z kirujučych kołaŭ Ukrainy. To bok pieravažna dematyvujučyja insajdy (a značyć i znajemstvy, i peŭny ŭpłyŭ) - jość, ale navat minimalnaj praktyčnaj addačy ad hetaha niama. Darečy, hetyja insajdy, jak i jahonaja "hieapalityčnaja analityka" majuć mocny kanśpiralahičny pach. Čaho tolki kaštavała zajava pra turecki pašpart Mikałaja Łukašenki. Karaciej kažučy, prafiesar Sałaviej-2, jakomu amal ŭsie ŭładnyja koły rasiei spravazdačacca, ale adzinaj hramadska-palityčnaj aktyŭnaśćciu jahoka deklarujecca fantomny ruch "Pieriemien".
Skandalnaja historyja z kanfliktam u datyčeńni da pamiaškańnia BMCH, u vyniku čaho dahetul aktyŭnaja dziejnaść BMCH spyniłaś - pa sutnaści stavić kropku na reštkach davieru da spadara Bulby.