«Nas pakarali, bo my śpiavali». Hurt Irdorath prezientavaŭ pieśniu «Zorami», napisanuju ŭ kałonii
«Pieśnia «Zorami» była napisanaja ŭ kałonii. Takija, jak my, nieadnarazova śpiavali jaje cicha i ŭpotaj, sa ślazami na vačach. Pieśnia dała nadzieju i vieru ŭ siabie ŭ hetym chałodnym akijanie niespraviadlivaści. Tak, my vybralisia adtul, ale mnohija jašče tam, i my ŭsie nie pavinny hetaha zabyvać», — tak pradstaŭlaje svoj novy tvor hurt, udzielniki jakoha prajšli praz łukašenkaŭskija katoŭni.
«Mnohija z vas viedajuć našu historyju. Paśla našaha vyzvaleńnia z turmy šmat roznych žurnalistaŭ sprabavali parazmaŭlać z nami pra apošnija dva hady, ale my paličyli, što prostymi słovami nielha vykazać toje, što my chacieli skazać.
Takim čynam, my abrali mastactva jak najbolš poŭnuju formu samavyjaŭleńnia. U hetym tvory jość usio, što možna skazać pra hetuju zmročnuju historyju. Heta i zaviaršeńnie ciomnaha, i pačatak novaha, śvietłaha raździeła!» — śćviardžajuć muzyki.
Jany dziakujuć usim, chto ich uvieś hety čas padtrymlivaŭ, i zajaŭlajuć nastupnuju metu — jak maha chutčej viarnuć Irdorath na scenu!
Muzykaŭ Irdorath zatrymali 2 žniŭnia 2021 hoda.
Paźniej ich pryznali vinavatymi pa artykule 342 KK («Arhanizacyja abo padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich»). Uładzimir i Nadzieja Kałačy atrymali pa 2 hady kałonii, Anton Šnip, Piotr i Julija Marčanki — pa 1,5 hoda kałonii.
Paśla vyzvaleńnia, adsiedzieŭšy ŭvieś termin, muzyki vyjechali za miažu i abviaścili zbor hrošaj na adnaŭleńnie dziejnaści.
«Suma zboru — €10 500. Srodki patrebnyja na reabilitacyju paśla kałonii i adaptacyju ŭ novaj krainie. Ale bolšaja častka pojdzie na adradžeńnie našych tvorčych prajektaŭ — my chočam adnavić muzyčnyja instrumienty i abstalavańnie, kab praciahvać natchniać biełarusaŭ», — pisali muzyki.
Kamientary
P.S.: Kali kaliści buduć pa-sapraŭdnamu ekranizavanyja "Dzikaje palavańnie karala Stacha" albo "Kałasy pad siarpom tvaim" - z "Zorami" atrymaŭsia b vydatny saŭndtrekam.
A riebiatam - OHROMNOJE SPASIBO.. pozdravlaju s krasivoj rabotoj...