«Niasie pahrozu dla ŭsiaho čałaviectva». Vyśvietlilisia padrabiaznaści hučnaha zvalnieńnia Altmana z OpenAI

Krynicy ahienctva Reuters u kampanii OpenAI na ŭmovach ananimnaści paviedamili, što kampanija zrabiła «mahutnaje adkryćcio» ŭ raźvićci štučnaha intelektu, jakoje «niasie pahrozu dla ŭsiaho čałaviectva». Heta mahło stać adnoj z pryčyn raptoŭnaha zvalnieńnia hiendyrektara OpenAI Sema Altmana, jaki ŭdzielničaŭ u raspracoŭcy niejrasietki ChatGPT, miarkujuć krynicy.

Havorka idzie pra ekśpierymientalny prajekt kampanii pad nazvaj Q* (Q-Star), jaki niadaŭna pakazaŭ značnyja pośpiechi na šlachu stvareńnia absalutna novaha typu štučnaha intelektu — univiersalnaha štučnaha intelektu (Artificial General Intelligence / AGI, albo UŠI).

«Adroźnieńnie ŠI ad UŠI kardynalnaje. Zvyčajny štučny intelekt zaprahramavany razvažać razumna, vałodajučy tolki nievialikimi elemientami niepadkantrolnaha jamu čałaviečaha rozumu. A ŭniviersalny štučny intelekt budzie zdolny navučacca, razumieć i prymać rašeńni paŭnavartasna i całkam samastojna. Takaja mašyna zmoža pieravysić mahčymaści ludziej i navat zachacieć ich źniščyć», — tłumačyć ahienctva Reuters sa spasyłkaj na krynicy.

Zaraz prajekt Q-Star pačali vypraboŭvać na matematyčnych zadačach. Pa infarmacyi krynic, hiendyrektar OpenAI Sem Altman aktyŭna finansuje i prasoŭvaje hety prajekt, bo imkniecca zrabić ChatGPT adnym z samych daskanałych štučnych intelektaŭ u śviecie, nabliziŭšy jaho da pieraŭtvareńnia ŭ UŠI.

Heta vyklikała tryvohu i aściarohi ŭ rady dyrektaraŭ OpenAI, jakija nie zaŭsiody byli zdolnyja adsočvać prahres Q-Star z-za pavodzinaŭ Altmana.

Apošniaja niepubličnaja spravazdača ad niekatorych daśledčykaŭ OpenAI, u jakoj apisvalisia dasiahnieńni ŭ raspracoŭcy UŠI, mahła stać adnoj z pryčyn raptoŭnaha zvalnieńnia Sema Altmana, kažuć krynicy.

«Bolš za ŭsich turbavaŭsia adzin z čalcoŭ rady dyrektaraŭ OpenAI i ŭradženiec Rasii prahramist Illa Suckievier. Jon, u adroźnieńnie ad Altmana, vystupaje suprać kamiercyjalizacyi i imklivaha raźvićcia štučnaha intelektu, bo baicca, što UŠI ŭ budučyni budzie abychodzicca ź ludźmi hetak ža, jak ludzi abychodziacca z žyviołami», — adznačaje vydańnie The Wall Street Journal sa spasyłkaj na supracoŭnikaŭ OpenAI, znajomych ź situacyjaj.

Pa infarmacyi The Wall Street Journal, mienavita Suckievier byŭ inicyjataram zvalnieńnia Altmana i byŭ pieršym, chto skazaŭ jamu ab zvalnieńni. Tym samym Suckievier chacieŭ mocna zapavolić pracu nad raźvićciom UŠI i pasprabavać zrabić jaho bolš biaśpiečnym.

Mienavita dziela hetaha zamiest Altmana na pasadu hiendyrektara spačatku chacieli pryznačyć Emieta Šyra, byłoha kiraŭnika stryminhavaj płatformy Twitch, jaki «žorstka vystupaje» suprać štučnaha intelektu i źviazanych ź im pahroz. 

Ale hetaha nie adbyłosia, i potym Suckievier publična vybačyŭsia pierad Altmanam u tvitary, piša The Wall Street Journal.

Pavialičyć

Nahadajem, što dniami ŭ OpenAI adbyŭsia surjozny kryzis, jaki moh pryvieści da poŭnaha raspadu kampanii i značnych prablem u pracy ChatGPT.

Reč u tym, što rada dyrektaraŭ kampanii ŭ minułuju piatnicu raptam vyrašyła zvolnić svajho kiraŭnika Sema Altmana, jaki ŭdzielničaŭ u raspracoŭcy niejrasietki. Pavodle aficyjnaj viersii rady dyrektaraŭ, «Altman nie zaŭsiody byŭ adkryty ŭ adnosinach da kiraŭnictva», i tamu jon byŭ zrynuty z pasady hiendyrektara OpenAI.

Hetaje rašeńnie vyklikała rezkuju niezadavolenaść siarod bolšaści supracoŭnikaŭ i fundataraŭ OpenAI, jakija pryhrazili masava syści ŭśled za Altmanam. Adnak usio abyšłosia, bo Altmana ŭhavaryli viarnucca nazad.

Kampanija OpenAI była zasnavanaja ŭ 2015 hodzie. U liku zasnavalnikaŭ, akramia Sema Altmana, byŭ taksama i miljarder Iłan Mask, adnak u 2018-m jon pakinuŭ kampaniju, kab nadać bolš uvahi raźvićciu brenda elektramabilaŭ Tesla (paźniej, letam 2023 hoda, Mask znoŭ viarnuŭsia ŭ halinu štučnaha intelektu, stvaryŭšy novuju kampaniju xAI).

• 4
• 0
• 9
• 9
• 20
• 2
• 5
• 0