Zastajucca ludzi, zdolnyja na sapraŭdnyja ŭčynki...
Uklučyŭšy televizar ci prahortvajučy naviny ŭ internecie, my čaściej za ŭsio bačym paviedamleńni pra terakty, technahiennyja i pryrodnyja katastrofy, mańjakaŭ i sieryjnych zabojcaŭ va ŭsich kutkach śvietu. Lik achviaraŭ idzie na tysiačy, i heta mała kaho kranaje. My sutykajemsia z paŭsiudnaj dehumanizacyjaj čałavieka. Jon ź intaresam budzie nazirać za žarściami vakoł źbićcia Bierłuskoni, a biady ŭłasnaha susieda nie pabačyć.
Tym nie mienš, zastajucca ludzi, zdolnyja na sapraŭdnyja ŭčynki.
Takija, jak sioleta ździejśniła Natalla Vasilevič i jejnyja siabry. Pračytaŭšy dopis błohierki Michalinki (Inhi Tatur)pra prablemy invalidaŭ‑vazočnikaŭ, Vasilevič pačała ŭ internecie zbor srodkaŭ na novuju elektryčnuju kalasku dla žančyny.
I za hod namahańniami, jak praviła, cyničnaj internet‑supolnaści ŭdałosia sabrać nieabchodnuju sumu. Heta realny prykład ludskaj samaarhanizacyi i spačuvańnia čałaviečaj biadzie. Prykład, jak možna zrabić žyćcio lepšym — niachaj i dla adnaho čałavieka. Takija «małyja spravy» macujuć vialikuju nacyju.
Dyrektar centra «Ekumiena», pravasłaŭnaja viernica Natalla Vasilevič nie pieršy hod dapamahaje Kobrynskamu dziciačamu domu. Taksama dziaŭčyna adnoj ź pieršych siarod vypusknikoŭ BDU pastaviła svoj podpis u abaronu adličanaj studentki BDU Taćciany Šapućki. Takija ŭčynki vyklikajuć pavahu.
Dabradziej hoda ŭ internecie — Ihar Machaniok
Samaja viadomaja ŭ śviecie onłajn‑prahrama dla pierakładu Google Translate ŭzbahaciłasia biełaruskaj movaj. Heta pašyraje mahčymaści vykarystańnia movy ŭ siońniašnim śviecie. Ciapier možna aŭtamatyčna pierakłaści ź biełaruskaj na jašče 50 movaŭ. Tak, siońnia hetym resursam karystajecca niamnoha ludziej. Ale i Skarynava «Biblija Ruska» była dastupnaja nie kožnamu.
Inicyjataram biełarusizacyi prahramy byŭ inžynier kampanii Google Ihar Machaniok. Jon biełarus, jaki pracuje ŭ Šviejcaryi. Viadoma, pierakład nie idealny, ale pačatak dadzieny. Zaraz treba budzie tolki ŭdaskanalvać najaŭny pradukt. Adznačajučy Machańka, my adznačajem usich ludziej, jakija biełarusizujuć internet.
U inšych krainach pieravod u elektronny farmat i raźvićcio internet‑pryładaŭ finansujucca ź dziaržaŭnych biudžetaŭ. U nas ža heta talenavityja ludzi robiać sami. Tak, Chviedar Piskunoŭ stvaryŭ pieršy elektronny hramatyka‑paradyhmatyčny słoŭnik biełaruskaj movy «Paradyhma», a taksama prahramu pravierki arfahrafii «Litara». Siarhiej Čarnavoki pierakłaŭ na biełaruskuju movu interfiejsy Huhła, internet‑encykłapiedyi Vikipiedyja, a taksama sacyjalnaj sietki Fejsbuk. Prahramist ź Lidy Aleh Azaroŭski samastojna raspracavaŭ biełaruska‑rasijska‑biełaruski pierakładčyk «Biełazar».
Biełarusizacyja Interneta daje budučyniu biełaruskaj movie i kultury.
Śpiavak hoda — Alaksandr Rybak
Uradženiec Biełarusi Alaksandr Rybak staŭ pieramožcam piesiennaha konkursu «Jeŭrabačańnie». Ale vystupaŭ chłopiec nie za Biełaruś, a za dalokuju Narviehiju. Pośpiech Rybaka prymusiŭ biełarusaŭ zadumacca nad prablemaj nacyjanalnaj identyčnaści. A pieśnia «Kazka» stała sapraŭdnym chitom, jaki hraje na mabiłach. Rybak pražyŭ amal usio śviadomaje žyćcio ŭ Narviehii, ale zachavaŭ vydatnaje biełaruskaje vymaŭleńnie. Jahonaj «Kupalincy» padpiavaŭ navat Łukašenka.
Viazień hoda — Mikałaj Aŭtuchovič
Ad lutaha ŭ śledčym izalatary na Vaładarcy znachodzicca vaŭkavyski pradprymalnik Mikałaj Aŭtuchovič. Jahony aryšt nahadvaŭ scenu z bajevika. Aŭtuchoviču ŭvieś čas mianiali abvinavačvańni, nichto nie razumieŭ, za što ž jaho aryštavali. Tolki praz paŭhoda vaŭkavysca abvinavacili ŭ padrychtoŭcy terakta suprać staršyni Hrodzienskaha abłvykankama Uładzimira Saŭčanki i namieśnika ministra pa padatkach i zborach Vasila Kamianka. Sam Aŭtuchovič i jahony tavaryš Uładzimir Asipienka ličać, što ich pieraśledujuć za antykarupcyjnuju dziejnaść. U źniavoleńni Aŭtuchovič pravioŭ trochmiesiačnuju haładoŭku.
Zalacańnie hoda — Pavieł Łatuška
Pryznačeńnie na pasadu ministra kultury Paŭła Łaŭtuški stała łahičnym praciaham abvieščanaj uładami palityki libieralizacyi. Małady, jeŭrapiejski, biełaruskamoŭny ministr. Ale kostku nacyjanał‑demakratam kinuli znoŭ u śfiery kultury. Źjaŭleńnie biełaruskamoŭnaha ministra transpartu ci abarony mieła b kudy bolšy rezanans.
Spartsmien hoda — Viktoryja Azaranka
Śvietłavałosaja dvaccacihadovaja dziaŭčyna z vyhladam madelki sioleta stała samaj paznavalnaj našaj suajčyńnicaj u śviecie. Viktoryja Azaranka vyjhrała try turniry ź sieryi VTA i ćviorda ŭvajšła ŭ dziesiatku najlepšych tenisistak śvietu. Svoj charaktar Azaranka prademanstravała na vynikovym turniry ŭ Katary, kali hulała z traŭmaj, praz bol i ślozy, ale ŭparta admaŭlałasia zdavacca.
Siabar hoda — Silvijo Bierłuskoni
Sioleta Łukašenka sustrakaŭsia nie tolki z azijackimi, paŭdniovaamierykanskimi i afrykanskimi i rasijskimi liderami, ale i ź jeŭrapiejskimi. Až dvojčy jon spatkaŭsia z charyzmatyčnym italjanskim premjeram Silvijo Bierłuskoni — u Rymie i ŭ Minsku. Padčas pryjezdu ŭ Biełaruś Bierłuskoni zalapiŭ u razmovie z Łukašenkam: «Vaš narod vas lubić, pra što śviedčać vyniki vybaraŭ». Ciaham hoda Bierłuskoni traplaŭ i ŭ inšyja skandały: to ź dziaŭčatami na vile złoviać, to z žonkaj raźviadziecca, to tvar jamu razabjuć.
Paranoja hoda — Viktar Marcinovič
Raman žurnalista Viktara Marcinoviča «Paranoja» niečakana byŭ zabaronieny dla prodažu ŭ Biełarusi. Naŭrad ci heta admoŭna adbiłasia na kamiercyjnym pośpiechu: pračytać «Paranoju», što trapiła ŭ «čorny śpis», zachacieli mnohija. A sam raman Marcinoviča pra Minsk, kachańnie i žyćcio va ŭmovach dyktatury.
Šafior hoda — Andrej Aramnaŭ
Časta niečuvanyja pośpiechi kružać hałavu maładym ludziam. Tak stałasia z alimpijskim čempijonam pa ciažkaj atletycy Andrejem Aramnavym. Milicyja dvojčy zatrymlivała Aramnava pjanym za rulom aŭto. Spravu pieradali ŭ sud. Atleta aštrafavali, pazbavili pravoŭ i prezidenckaj stypiendyi. Na sudzie Aramnaŭ paabiacaŭ: «Ja bolej tak nie budu». Moža, pavierym?
Achviarnaść hoda — Alaksandr Marficki i Alaksandr Žuraŭlevič
Pałkoŭniki Alaksandr Marficki i Alaksandr Žuraŭlevič achviaravali saboj, kab vyratavać žyćci hledačoŭ avijašou ŭ polskim Radamie. Biełaruskija lotčyki, adčuŭšy, što samalot padaje, vyrašyli nie katapultavacca, a adlacieć dalej ad ludziej. Uratavacca mužčyny nie zmahli. Viečnaja słava hierojam!
Karol hoda — Siarhiej Michałok
«Rok‑karonu» sioleta zasłužana atrymaŭ «Lapis Trubiackoj». Na fonie Siarhieja Michałka i kampanii inšyja biełaruskija muzyki ŭ 2009 hodzie vyhladali blakła. Čaho varty adzin kancert u Pałacy sportu, dzie ŭpieršyniu ŭ Biełarusi byŭ vykanany zabaronieny chit Belarus Freedom.
Siurpryzmejkier hoda — Piotr Prakapovič
U 2009 hod biełarusy ŭvajšli z devalvacyjaj u 20%. A bažyŭsia ž staršynia Nacbanka Piotr Prakapovič i jašče vyšejšyja słužbovyja asoby, što padzieńnia rubla nie budzie! U pieršyja dni hoda ludzi kinulisia skuplać u kramach pobytavuju techniku i meblu. Čakali druhoj, treciaj devalvacyi. Ale astatak hoda prajšoŭ spakojna. U tym liku, dziakujučy stabilizacyjnym kredytam, jakija bralisia jak na Uschodzie, tak i na Zachadzie. Takaja cana čarki i skvarki.
Antydoktar hoda — Valancina Kačan
Hałoŭny sanitarny doktar krainy Valancina Kačan uparta admaŭlała najaŭnaść u Biełarusi epidemii hrypu. Adsutnaść aficyjnaj infarmacyi sparadziła epidemiju paniki. U listapadzie ludzi chadzili pa vulicach u paviazkach. Sioletni hryp najciažej pieranosili maładyja ludzi. Realnaja kolkaść jaho achviaraŭ tak i nieviadomaja. A niezaležnyja ŚMI za abjektyŭnaje aśviatleńnie situacyi z hrypam i pnieŭmanijaj atrymali papiaredžańni ad Ministerstva infarmacyi.
Pamiłavany hoda — Aleh Pralaskoŭski
Pamiłavany Łukašenkam Aleh Pralaskoŭski ŭznačaliŭ Mininfarmacyi. Niekali hety čałaviek zasudziŭ «Narodnuju volu» na 27 miljonaŭ rubloŭ, a ź jahonaj lohkaj ruki z padručnikaŭ pa litaratury byli skaročanyja tvory «piśmieńnikaŭ‑nacyjanalistaŭ» — Kupały, Bykava, Baradulina. Pralaskoŭskaha kinuli na adkazny ŭčastak pad prezidenckija vybary‑2010.
Rekruty hoda — Ivan Šyła, Franak Viačorka, Źmicier Chviedaruk
Sioleta ŭ vojska byli pryzvanyja Franak Viačorka, Ivan Šyła (na fota), Źmicier Chviedaruk i inšyja maładyja palityki. Łukašenkaŭcy spadziavalisia ich łakalizavać, źmienšyć ichniuju aktyŭnaść, a nie vyjšła. U vojsku kožny z chłopcaŭ nie prosta sprabavaŭ vyžyć, ale i zmahaŭsia za pravy sasłužboŭcaŭ. I Minabarony raz za razam išło na sastupki. Nichto z palitpryzyŭnikoŭ nie złamaŭsia, kožny adstajaŭ prava karystacca ŭ vojsku biełaruskaj movaj.
Kambinatar hoda — Anatol Laŭkovič
Staršynia sacyjał‑demakatyčnaj partyi Anatol Laŭkovič sioleta traplaŭ u historyi. U pieršy raz — kali rassypaŭsia ŭ kamplimientach aficyjnaj uładzie ŭ intervju haziecie «Sovietskaja Biełoruśsija». Heta ledź nie kaštavała Laŭkoviču miesca staršyni partyi. U druhi raz Laŭkovič trapiŭsia na liście da lidera partyi «Spraviedlivaja Rośsija» Siarhieja Mironava, dzie vystupaŭ bolšym intehrataram za Łukašenku i prapanoŭvaŭ stvaryć hramadskuju pałatu sajuznaj dziaržavy. Afiera, vartaja Astapa Bendera.
Cudatvorca hoda — Usejn Bołt
Jamajski biahun Usejn Bołt na čempijanacie śvietu ŭ Bierlinie vyjhraŭ stomietroŭku z fantastyčnym vynikam — 9,58 siekundy! Tryumf čałaviečaha cieła.
Fatohraf-ahient z dvuma pašpartami zdymaje biełarusaŭ i ich mierapryjemstvy ŭ Varšavie13
Kamientary