Lova z «Bi-2» raskazaŭ pra chvoruju maci ŭ Biełarusi i apošni pryjezd na radzimu
Salist hurta «Bi-2» Jahor Bortnik (sceničny psieŭdanim Lova) daŭ intervju Biełaruskaj słužbie «Radyjo Svaboda». Siarod inšaha ŭradženiec Biełarusi, jaki źjechaŭ z radzimy ŭ 19 hadoŭ, zhadaŭ pra svoj apošni pryjezd u Biełaruś i pra maci, jakaja tam dahetul žyvie.
«Nie pamiataju, kolki hadoŭ tamu [pryjazdžali ŭ Biełaruś], ale, padobna, kala čatyroch hadoŭ tamu. My pajechali rabić taki pijar-dzień, rekłamu našaha kancertu ŭ Minsku. Usio prajšło cudoŭna, ale kancertu ŭ vyniku nie było.
U mianie maci tam žyvie, ja dumaju, što naŭrad ci jaje ŭbaču. Jana ŭ mianie chvoraja na demiencyju. Užo pieravieźci jaje ŭ niejkuju inšuju krainu niemahčyma z roznych pryčyn. Tamu takaja asabistaja trahiedyja jašče jość. Jość niejkija rečy, niepaduładnyja mnie, tamu davodzicca da hetaha prosta pryvykać», — skazaŭ śpiavak.
Zhadaŭ jon i pra svoj kolišni adjezd ź Biełarusi:
«Ja źjechaŭ ź Biełarusi ŭ 19 hadoŭ. Heta było vielmi daŭno, u 1992 hodzie. Tady ja raźvitvaŭsia nazaŭždy, heta jašče byŭ taki pierałomny momant u historyi Savieckaha Sajuza i ŭsiaho astatniaha. Ja prosta razumieŭ, što dalahlad najbližejšych hadoŭ składany. Mnie zdałosia, što budzie lepš, kali ja hety čas praviadu dzieści, u niejkaj krainie, za miažoj, pačnu niejkaje inšaje žyćcio. Praź niejki čas stała zrazumieła, što jość mahčymaść pryjazdžać i ŭsio astatniaje, ale ja ŭžo zastaŭsia za miežami Biełarusi: Izrail, Aŭstralija, potym ja pracavaŭ u Maskvie».
«Bi-2» — rasiejskamoŭny rok-hurt, utvorany ŭ 1988 hodzie ŭ Babrujsku. Zasnavalniki i ŭdzielniki jaho — Šura Bi-2 (Alaksandr Uman — hitara, vakał) i Lova Bi-2 (Jahor Bortnik — asnoŭny vakał).
U 2020-m muzyki «Bi-2» padtrymali pratesty ŭ Biełarusi, a ŭ 2022-m asudzili ahresiju Rasii suprać Ukrainy.
25 studzienia 2024-ha muzyki hurta «Bi-2 byli zatrymanyja ŭ Tajłandzie, što nibyta vystupali ŭ hetaj krainie z kancertami biez adpaviednaha dazvołu. Rasijskija ŭłady damahalisia departacyi muzykaŭ u Rasiju, ale ŭrešcie ich udałosia vyzvalić i vyvieźci z Tajłanda.
«Nabirała vadu z unitaznaha bačka dla hatavańnia, myćcia». Hanna Bond ščyra raspaviała pra ciažkaje dziacinstva13
Kamientary
U Biełarusi u Babrujsku ...ni u Maskva ci TielAviv