OpenAI i Meta rychtujuć novyja madeli štučnaha intelektu, zdolnyja «razvažać»
Novyja madeli pavinny źjavicca ŭžo ŭ hetym hodzie. Jany buduć zdolnyja nie tolki razvažać, ale i płanavać novyja kroki. Što heta značyć na praktycy?
Jak piša Financial Times, OpenAI i Meta znachodziacca na miažy vypusku novych madelaŭ štučnaha intelektu, jakija, pavodle ich słoŭ, buduć zdolnyja razvažać i płanavać. Heta stanie važnym krokam na šlachu da raspracoŭki mašyn z kahnityŭnymi zdolnaściami, jakija pieraŭzychodziać čałaviečyja.
Meta zajaviła, što pačnie vypusk Llama 3 u najbližejšyja tydni, a OpenAI, jakaja padtrymlivajecca Microsoft, płanuje vypuścić novuju GPT-5 u «najbližejšy čas».
«My staranna pracujem nad tym, kab prymusić hetyja madeli nie prosta razmaŭlać, ale i razvažać, płanavać, mieć pamiać»,
— cytuje vydańnie słovy vice-prezidentki pa daśledavańniach štučnaha intelektu ŭ Meta Džael Pino (Joelle Pineau).
Hałoŭny apieracyjny dyrektar OpenAI Bred Łajtkep (Brad Lightcap) u intervju Financial Times raskazaŭ, što nastupnaje pakaleńnie GPT prademanstruje prahres u vyrašeńni «składanych prablem», jakija patrabujuć razvahaŭ.
Razvažańnie i płanavańnie źjaŭlajucca važnymi krokami na šlachu da taho, što daśledčyki štučnaha intelektu nazyvajuć «štučnym ahulnym intelektam» — paznańniem na čałaviečym uzroŭni — pakolki jany dazvalajuć čat-botam i virtualnym pamočnikam vykonvać paśladoŭnaść źviazanych zadač i pradkazvać nastupstvy svaich dziejańniaŭ.
Vydańnie paviedamlaje, što Meta płanuje ŭkaranić svaju novuju madel štučnaha intelektu ŭ WhatsApp i svaje razumnyja akulary Ray-Ban.
Śpiecyjalisty kampanii raskazali, što kamiery ŭ akularach Ray-Ban Meta možna budzie vykarystoŭvać, naprykład, dla ahladu złamanaj kavamašyny, a asistent sa štučnym intelektam, jaki pracuje na bazie Llama 3, rastłumačyć uładalniku, jak heta vypravić.
Viadučy daśledčyk štučnaha intelektu karparacyi Meta Jan Lekun (Yann LeCun) abiacaje, što ŭ chutkim časie
«my budziem pastajanna razmaŭlać z hetymi pamočnikami na asnovie štučnaha intelektu. Usia naša anłajn-aktyŭnaść budzie adbyvacca praź sistemy štučnaha intelektu».
Dziaržaŭnyja sacyjołahi: Biełarusy najpierš źviazvajuć svaju dziaržaŭnaść ź Vialikim Kniastvam Litoŭskim24
Kamientary