«Praviali dźvie apieracyi». Što z 11-hadovaj dziaŭčynkaj, jakaja vypała z atrakcyjona ŭ Lidzie
Stali viadomyja padrabiaznaści stanu 11-hadovaj dziaŭčynki ź Lidy, jakaja vypała z atrakcyjona. Pa słovach daktaroŭ, dzicia ŭsio jašče znachodzicca ŭ reanimacyi, ale stan udałosia stabilizavać, i chutka dziaŭčynku pieraviaduć u zvyčajnaje adździaleńnie, piša Onliner.by.
Na praciahu pieršych sutak paśla incydentu, kali daktaram Lidskaj balnicy ŭdałosia stabilizavać stan dziciaci, za joj byŭ adpraŭleny reanimabil ź piedyjatryčnaj reanimacyjna-kansultatyŭnaj bryhadaj. Na im miedyki dastavili dziaŭčynku ŭ Hrodna, dzie ŭžo daktary abłasnoj kliničnaj balnicy praviali niekalki apieracyj i praciahnuli lačeńnie.
Stan junaj pacyjentki prakamientavaŭ hałoŭny doktar Hrodzienskaj abłasnoj dziciačaj kliničnaj balnicy Alaksandr Kozič:
— My dadatkova vykanali ŭsie nieabchodnyja vysokatechnałahičnyja abśledavańni i kansultacyi śpiecyjalistaŭ. Pa śviedčańniach pacyjentcy praviali dźvie traŭmatałahičnyja apieracyi. Ciapier jana znachodzicca ŭ reanimacyi, ale najbližejšym časam budzie pieraviedzienaja ŭ traŭmatałahičnaje adździaleńnie. Stan dziciaci stabilny, aceńvajecca jak siaredniaj stupieni ciažkaści. Jana dastupnaja da kantaktu ŭ poŭnym abjomie.
***
U minułuju niadzielu 11-hadovaja lidčanka vypała z atrakcyjona Hammer. Incydent adbyŭsia adrazu paśla zapusku ekstremalnaj ustanoŭki, a sam atrakcyjon naležaŭ pierasoŭnamu łunaparku, jaki pryjechaŭ u Lidu niekalki tydniaŭ tamu. Dziaŭčynka sa šmatlikimi spałučanymi traŭmami była dastaŭlena ŭ reanimacyju.
Traŭmy akazalisia nastolki składanymi, što ŭ Lidu z Hrodna byli terminova vyklikanyja aniestezijołah-reanimatołah, traŭmatołah i aftalmołah, a ź Minska dla praviadzieńnia kansultacyi byŭ pryciahnuty skivična-tvaravy chirurh respublikanskaha ŭzroŭniu. U abstavinach zdareńnia raźbirajecca Śledčy kamitet.
Ciapier čytajuć
Vybityja dźviery, maski-šou, zatrymańnie top-mieniedžaraŭ. Pačaŭsia pahrom «Jeŭraopta»7
Kamientary