Ministr zamiežnych spraŭ Polščy zrabiŭ svoj prahnoz, kali skončycca vajna
«My jašče nie na hetym etapie».
Polskaje vydańnie Wiadomosci.wp.pl cytuje słovy ministra zamiežnych spraŭ Polščy Radasłava Sikorskara, vykazanyja im padčas debataŭ «75 hadoŭ NATA: jak utrymać kurs?»
U svaim vystupie Sikorski źviarnuŭ uvahu na toj fakt, što Rasija vydatkuje na vajnu va Ukrainie 8,7% svajho VUP i 40% biudžetu, i zaŭvažyŭ, što krainy Zachadu «nie paśpiavajuć za jaje tempam».
Palityk padkreśliŭ, što rasijanie ŭžo šmat hadoŭ znachodziacca ŭ stanie vajny z Zachadam, čaho nie chočuć pryznać niekatoryja na Zachadzie. Rasijskaja ahresija — častka vykliku, jaki staić pierad Zachadam. Jaho składovymi častkami źjaŭlajucca jadziernaja pahroza, dezinfarmacyja i mihracyjny cisk. Ministr źviarnuŭ uvahu na toj fakt, što 90% ludziej, jakija sprabujuć pierasiačy polska-biełaruskuju miažu, majuć rasijskija vizy.
«Kali my nie zmožam abaranić miažu, padtrymka krajnie pravych uzraście, i Jeŭrapiejski Sajuz moža być razburany znutry», — papiaredziŭ Sikorski.
Palityk adznačyŭ, što «paražeńnie Pucina — heta nadzieja nie tolki dla nas, ale i dla Rasii. … Naša zadača — pakazać Pucinu, što my nie takija bieznadziejnyja, jak jon dumaje, i ŭpeŭnić, što jon pamylaŭsia».
Sikorski ličyć, što vajna skončycca tady, «kali rasijskaje kiraŭnictva zrazumieje, što ŭvarvańnie było pamyłkaj i kančatkovaja meta nie vartaja hrošaj i čałaviečych žyćciaŭ». Ale ciapier, pa jaho słovach, «my nie dajšli da hetaha momantu».
Vydańnie taksama pryvodzić słovy hienieralnaha sakratara NATA Jensa Stołtenbierha, jaki adznačyŭ, što pryjšoŭ čas pierahledzieć najaŭnyja abmiežavańni na vykarystańnie zbroi, jakuju členy aljansu pastaŭlajuć Ukrainie.
«Pryjšoŭ čas pierahledzieć hetyja abmiežavańni, kab dać ukraincam abaranić siabie. Jany majuć prava na samaabaronu, u tym liku šlacham naniasieńnia ŭdaraŭ pa vajskovych abjektach, jakija znachodziacca za miežami terytoryi Ukrainy, ź jakich rasijanie atakujuć ukrainskija siły».
Ciapier čytajuć
Minhandlu vypadkova źliła dakumient, u jakim pakazała, jak i za što naličvaje premii7
Kamientary