Kačanava vystupiła za suvierennaje prava dziaržavy na falsifikacyju vybaraŭ i zaklikała stvaryć pryjaznuju misiju naziralnikaŭ ad BRIKS
«Padryŭ elektaralnaha suvierenitetu zjaŭlajecca ničym inšym, jak elemientam kałanijalnaj dyktatury», ličyć Natalla Kačanava. Viadomaja svaimi biessensoŭnymi i šmatsłoŭnymi zajavami staršynia Savieta Respubliki siońnia vystupiła na plenarnym pasiadžeńni Ch Parłamienckaha forumu BRIKS u pašyranym farmacie ŭ Sankt-Pieciarburhu, pieradaje BIEŁTA.
Pavodle Kačanavaj, nacyjanalnyja vybarčyja kampanii «čaściakom stanoviacca mišeńniu destruktyŭnaj palityki».
«Siońnia vyniki litaralna luboha hałasavańnia <…> bieź pierabolšańnia ŭpłyvajuć na budučyniu śvietaŭładkavańnia, umacavańnie adzinaj niepadzielnaj biaśpieki, stabilnaści i ŭsieahulnaha miru», — zajaviła Kačanava.
Jana zaklikała parłamientaryjaŭ ad krain BRIKS da zamacavańnia «elektaralnaha suvierenitetu jak nieadjemnaha i vyklučnaha prava dziaržavy samastojna i niezaležna arhanizoŭvać i pravodzić elektaralnyja kampanii».
«Hałoŭnaja meta — zabieśpiačeńnie realizacyi poŭnaŭładździa naroda i svabody jaho vybaru pry viaršenstvie nacyjanalnaha zakanadaŭstva, niedapuščeńnie ŭmiašańnia ŭ vybarčy praces», — skazała Kačanava.
Jana prapanavała stvaryć misiju nahladalnikaŭ ad BRIKS, «jakaja budzie aceńvać vybary zychodziačy z faktyčnaj adpaviednaści pryniatym standartam, biez padhonki spravazdač pad palityčnuju pazicyju zachodnich elitaŭ».
«Mahčyma, pryjšoŭ čas padumać nad zasnavańniem asablivaj mižnarodnaj instancyi pa abaronie nacyjanalnych vybarčych pracesaŭ. Bo siońnia razmova idzie ab roŭnaści ŭsich narodaŭ na samavyznačeńnie, samastojny vybar nacyjanalnaha šlachu raźvićcia, a padryŭ elektaralnaha suvierenitetu zjaŭlajecca ničym inšym, jak elemientam kałanijalnaj dyktatury», — dadała Kačanava.
Nivodnaha słova pra česny i prazrysty padlik hałasoŭ Kačanava nie skazała. U Biełarusi nie tolki naziralniki, ale zvyčajna i členy vybarčych kamisij nie viedajuć sapraŭdnych vynikaŭ hałasavańnia.
Ciapier čytajuć
Zamiest vajny słany ŭ novaj knizie Sašy Filipienki. I Maskva4
Kamientary