«Bł*darusy — nacyja zdradnikaŭ i parazitaŭ». Z-kanały ŭ šalenstvie ad rašeńnia Łukašenki advieści vojski ad Ukrainy
Dastałosia i łukašenkaŭskim prapahandystam, jakija sprabavali abaraniacca.
Častka rasijskich Z-kanałaŭ i vajenkaraŭ nie acaniła niadaŭni zahad Alaksandra Łukašenki advieści biełaruskija vojski ad miažy z Ukrainaj. Niekatoryja z pravajennych miedyja prynialisia paprakać palityka za padvojnuju hulniu, a taksama pahražać Biełarusi strataj terytoryi i nacyjanalnaj identyčnaści.
Hetyja napadki nie zastalisia biez uvahi łukašenkaŭskaj prapahandy, jakaja pasprabavała apraŭdacca, paŭščuvać rasijan u adkaz i vystavić situacyju z advodam vojskaŭ u vyhadnym dla siabie śviatle, ale tym samym vyklikała jašče bolšuju ahresiju z boku Z-kanałaŭ.
«Nas usich ach**nna pradali»
Nabližany da Kramla prapahandyst Siarhiej Markaŭ razam z vajenkarami Alaksandram Kocam i Jahoram Huzienkam («Trynaccaty») nie chavali svajho ździŭleńnia ad rašeńnia Łukašenki.
Koc vyrašyŭ zładzić apytańnie siarod padpisantaŭ nakont taho, što ž heta moža aznačać. I bolšaść adkazała, što Biełaruś Rasii nie sajuźnik.
Z-resurs «Miesť dobroj voli» abvinavaciŭ Łukašenku i biełarusaŭ u chłuślivych zajavach ab siabroŭstvie i sajuźnictvie z Rasijaj, a taksama ŭ niežadańni biełaruskaj armii vajavać na rasijskim baku suprać Ukrainy.
U dadatak da hetaha Z-kanał «padziakavaŭ» Łukašenku za toje, što ciapier ukrainskaja armija moža svabodna pieranakiroŭvać sałdat ź biełaruskaj miažy na haračyja ŭčastki frontu, uskładniajučy žyćcio rasijanam.
Hety ž punkt hledžańnia častkova padtrymaŭ adzin z najbujniejšych Z-kanałaŭ Rybar, pry hetym sprabujučy apraŭdać pavodziny Łukašenki zacikaŭlenaściu Kramla ŭ zachavańni biełaruskaha palityčnaha i ekanamičnaha bufiera. Ale Rybar zrabiŭ heta sa ściobam, adznačyŭšy, što biełarusy ciapier mohuć nie turbavacca za svaje bufiernyja zarobki.
Na ŭvieś škvał rasijskaj krytyki vyrašyli adkazać łukašenkaŭskija prapahandysty na čale sa Špakoŭskim, Dziermantam, Hihinym i kanałam «Biełaruski siłavik».
Rytoryka pieršych troch prapahandystaŭ bolš pracavała na zaspakajeńnie situacyi i zapeŭnieńnie niezadavolenych u tym, što «ŭsia situacyja zastajecca pad kantrolem» i što «nijakaha dahavarniaka z Ukrainaj niama, jość tolki žadańnie Łukašenki zachavać mir u Biełarusi».
Akramia taho, Dziermant i Špakoŭski pasprabavali vyvieści Łukašenku z-pad udaru, zajaviŭšy, što inicyjatyva mirnaha pracesu pa Ukrainie naležyć nie jamu, a ŭ pieršuju čarhu Pucinu, Kitaju, Orbanu i Trampu.
Bolš kateharyčna vykazaŭsia «Biełaruski siłavik», jaki papraknuŭ rasijan u tym, što tyja sami aktyŭna zarablajuć na vajnie i žyćciach sałdataŭ. Milicejski kanał staŭ adznačać, što Biełaruś nie adsiedžvałasia naŭzboč, a aktyŭna dapamahała i praciahvaje dapamahać Rasii ŭ vajnie suprać Ukrainy.
Asobnym punktam kanał zhadaŭ, što Biełaruś časta stanaviłasia karysnaj dla Rasii pieramoŭnaj i bufiernaj placoŭkaj i što «z-za susiedstva z Maskvoj biełaruski narod nie raz vyniščali, ale jon nie skardzicca».
«Možna kaho zaŭhodna vinavacić u dvudupstvie, ale tolki nie Biełaruś. Da 2018 hoda mienavita dla vyhady ŭ tym liku i Maskvy Biełaruś była złučnym źvianom Zachadu i Uschodu. Była pieramoŭnaj placoŭkaj, nadziejnym paplečnikam i dakazała heta, kali zrabiła kankretny vybar. I zrabiła b iznoŭ.
My — naščadki naroda, jaki z-za svajho terytaryjalnaha stanovišča i susiedstva z Maskvoj vyniščaŭsia nie raz, ale my ni razu nie paskardzilisia na heta i śviata šanujem naš bracki sajuz», — napisaŭ u siabie milicejski kanał «Biełaruski siłavik» na fonie rasijskaj krytyki.
Na dadzienyja arhumienty «Biełaruskaha siłavika» potym źviarnuŭ uvahu adzin z byłych asnoŭnych vahnieraŭskich resursaŭ Alex Parker Returns (da skančeńnia buntu Pryhožyna nazyvaŭsia AP Wagner) i nie saromieŭsia ŭ vyrazach u adras biełaruskaha naroda.
Aŭtar Z-kanała nazvaŭ biełarusaŭ «nacyjaj zdradnikaŭ i parazitaŭ, štučna prydumanych kamunistami» i abvinavaciŭ ich u «žadańni zdradzić Rasii ŭ 2020 hodzie, inicyjataram jakoha byŭ Łukašenka».
Były vahnieraŭski resurs nazvaŭ pałovu terytoryj Biełarusi «spradviečna ruskimi ziemlami» i zajaviŭ, što Biełaruś «treba raścisnuć, bo ŭ jaje niama nijakaj budučyni, akramia Rasii».
Adkazu na padobnuju rytoryku z boku łukašenkaŭskich prapahandystaŭ tak i nie było.
«Naša Niva» — bastyjon biełaruščyny
PADTRYMAĆCiapier čytajuć
Bieśpiłotnik, jaki ŭpaŭ u Minsku, prylacieŭ z boku Barysava — šmatlikija śviedčańni9
Kamientary