Pryznačyli novaha mastackaha kiraŭnika teatra imia Jakuba Kołasa. Na heta spatrebiłasia bolš za dva hady
11 vieraśnia dyrektarka Nacyjanalnaha akademičnaha dramatyčnaha teatra imia Jakuba Kołasa Julija Charkievič pradstaviła kalektyvu novaha mastackaha kiraŭnika — Kanstancina Hančarova, paviedamiła Ministerstva kultury.
Paviedamlajecca, što ŭ 2008 hodzie Kanstancin Hančaroŭ zakončyŭ Viciebskaje dziaržaŭnaje vučylišča mastactvaŭ, u 2016 hodzie — Biełaruski dziaržaŭny ŭniviersitet kultury i mastactvaŭ.
Paśla jon pracavaŭ u roznych ustanovach kultury i adukacyi, braŭ aktyŭny ŭdzieł u viciebskim haradskim konkursie «Sceničnyja čytańni «Školny teatr», arhanizataram jakoha źjaŭlajecca teatr imia Jakuba Kołasa.
Z 2022 hoda Hančaroŭ pracavaŭ u Viciebskim dziaržaŭnym kaledžy kultury i mastactvaŭ vykładčykam cykłavoj kamisii režysury i majsterstva akciora.
U 2023 hodzie Kanstancin Hančaroŭ pastaviŭ na vialikaj scenie teatra imia Jakuba Kołasa dramu «Vybar» pa pjesie Alaksieja Dudarava, u 2024-m — vajennuju dramu «Sotnikaŭ» pavodle adnajmiennaj apovieści Vasila Bykava. Heta faktyčna i ŭvieś jahony staž u jakaści teatralnaha režysiora.
Nacyjanalny akademičny dramatyčny teatr imia Jakuba Kołasa, jak i inšyja ŭstanovy kultury, nie paźbieh paśla 2020 hoda represij i čystak. Hučnaj spravaj była zabarona śpiektakla «Cil», jaki staviŭ sam tahačasny mastacki kiraŭnik ustanovy Michaił Krasnabajeŭ. Faktyčna praz tydzień paśla premjery, jakaja adbyłasia 1 śniežnia 2020 hoda, byŭ zvolnieny dyrektar teatra Alaksandr Starych, a ŭ pačatku nastupnaha hoda — akciory Julija Krašeŭskaja i Arciom Hierak. Kali ŭ krasaviku 2022 hoda skončyŭsia pracoŭny kantrakt ź Michaiłam Krasnabajevym, jaho taksama nie praciahnuli. Z taho času pasada mastackaha kiraŭnika teatra była vakantnaj, i tolki ciapier jaje zaniaŭ Kanstancin Hančaroŭ.
Śpiektakl «Cil» nie ŭpadabała vysokaje načalstva za toje, što sa sceny ŭ im prahučali słovy «Žyvie Fłandryja!», a ŭ jakaści detalaŭ kaściumaŭ byli vykarystanyja biełyja i čyrvonyja stužki.
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ55
Kamientary