Biełaruskich niemaŭlat stali adrazu praviarać na pieršasny imunadeficyt
U Biełarusi startavaŭ piłotny prajekt Ministerstva achovy zdaroŭja pa vyjaŭleńniu pieršasnaha imunadeficytu. Pieršy etap paśpiachova prajšoŭ u Minsku, ciapier padklučajucca rehijony, paviedamlaje telekanał STB.
Pieršasny imunadeficyt nie prajaŭlajecca ŭ niemaŭlat, pakul dziejničaje abarona imunitetu maci. Skryninh niemaŭlat dazvalaje vyjaŭlać hrupu ryzyki z tak zvanym sindromam dziaciej, jakija časta chvarejuć. Daśledavańnie daje mahčymaść svoječasova vyjaŭlać prablemu imunadeficytu, jaki supravadžajecca pastajannymi infiekcyjnymi zachvorvańniami ŭ dziaciej, i, hałoŭnaje, vyrašać jaje.
«Lačeńnie najbolš efiektyŭna pačynać da 3,5 miesiaca. Asnoŭnym lačeńniem pieršasnaha imunadeficytu i padobnych patałohij źjaŭlajecca transpłantacyja hiemapaetyčnych kletak. Vyžyvalnaść dziaciej, jakim ich transpłantujuć da 3,5 miesiaca, składaje bolš za 94%, paśla 4 miesiaca — 60%. Tamu tak važna vyjavić patałohiju ŭ rańnim uzroście», — havoryć zahadčyk centralizavanaj bakteryjałahičnaj łabaratoryi Bresckaha abłasnoha skurna-vienierałahičnaha dyspansiera Maksim Łapuka.
Za minuły hod u Biełarusi na ŭliku znachodziłasia kala 700 dziaciej z dyjahnastavanym pieršasnym imunadeficytam, ale, pa słovach śpiecyjalistaŭ, realnaja kolkaść jaho nośbitaŭ vyšejšaja. Dla paraŭnańnia, u pačatku 2000-ch było vyjaŭlena tolki 28 vypadkaŭ. Skryninh niemaŭlat užo prymianiajuć u ZŠA, Rasii i asobnych krainach Jeŭropy.
Ciapier čytajuć
Pramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?1
Kamientary