Navukoŭcam atrymałasia «vyrazać» DNK VIČ z zaražanych kletak
Ale da lekaŭ ad virusu jašče daloka.
Navukoŭcy ź Niderłandaŭ zajavili, što im udałosia paśpiachova vydalić DNK virusu imunadeficytu čałavieka z zaražanych kletak z dapamohaj technałohii redahavańnia hienomu CRISPR, udastojenaj Nobieleŭskaj premii pa chimii za 2020 hod, piša Bi-bi-si.
Technałohija, jakaja pracuje jak nažnicy, ale na malekularnym uzroŭni, dazvalaje razrezać DNK takim čynam, što infikavanyja ŭčastki mohuć być vydalenyja abo inaktyvavanyja, što spyniaje replikacyju VIČ.
Jość nadzieja, što ŭ vyniku atrymajecca całkam pazbavić arhanizm ad virusu, choć nieabchodna prarabić jašče šmat pracy, kab pierakanacca ŭ tym, što heta budzie biaśpiečna i efiektyŭna.
Isnujučyja preparaty ad VIČ mohuć zapavolić raźvićcio virusu ŭ arhaniźmie, ale nie źniščyć jaho.
Kamanda Amsterdamskaha ŭniviersiteta, jakaja pradstaviła na hetym tydni na miedycynskaj kanfierencyi karotki vykład svaich pieršych vynikaŭ, padkreślivaje, što ich praca zastajecca tolki «dokazam kancepcyi» i nie stanie lekami ad VIČ u najbližejšy čas.
Dacent Notynhiemskaha ŭniviersiteta Džejms Dyksan, jaki śpiecyjalizujecca na technałohijach stvałavych kletak i hiennaj terapii, zhodny z hetym i kaža, što atrymanyja vyniki patrabujuć starannaha vyvučeńnia.
«Spatrebicca jašče šmat raspracovak, pierš čym heta zmoža akazać upłyŭ na VIČ-inficyravanych», — skazaŭ jon.
«Nadzvyčaj składanaja zadača»
Inšyja navukoŭcy taksama sprabujuć vykarystoŭvać technałohiju CRISPR u baraćbie ź VIČ.
Kampanija Excision BioTherapeutics śćviardžaje, što paśla 48 tydniaŭ lačeńnia ŭ troch dobraachvotnikaŭ ź VIČ nie było vyjaŭlena surjoznych pabočnych efiektaŭ.
Adnak virusołah z łondanskaha Instytuta Frensisa Kryka Džonatan Stoje kaža, što vydalić VIČ z usich kletak, jakija chavajuć jaho ŭ arhaniźmie, nadzvyčaj składana.
«Pazakletačnaje lačeńnie z mahčymymi doŭhaterminovymi pabočnymi efiektami pa-raniejšamu vyklikaje aściarohi, — skazaŭ jon. — Tamu vierahodna, što projdzie šmat hadoŭ, pierš čym takaja terapija na asnovie CRISPR stanie rucinnaj — navat kali vykazać zdahadku, što jana akažacca efiektyŭnaj».
VIČ zaražaje i atakuje kletki imunnaj sistemy, vykarystoŭvajučy ich dla stvareńnia ŭłasnych kopij.
Navat pry efiektyŭnym lačeńni niekatoryja ź ich pierachodziać u stan spakoju abo łatentny stan, i ŭ ich pa-raniejšamu ŭtrymlivajecca DNK abo hienietyčny materyjał virusa.
Bolšaść ludziej ź VIČ majuć patrebu ŭ pažyćciovaj antyretravirusnaj terapii. Kali pierastać prymać hetyja preparaty, virus dremle, moža znoŭ aktyvizavacca i vyklikać prablemy.
Ciapier čytajuć
Na naradzie ŭ Łukašenki publična pasvarylisia čynoŭniki. Jon nie viedaŭ, kaho padtrymać16
Kamientary