Da biełarusaŭ, jakija zapisalisia na padaču ŭ polskija vizavyja centry, ich supracoŭniki majuć niepryjemnyja pytańni

Pavodle infarmacyi tyktok-akaŭnta @nashivpolshe, vizavyja centry Polščy «zładzili pazapłanavuju pravierku». U pryvatnaści, havorka idzie pra vizavy centr Minskaj konsulskaj akruhi.

«Jany telefanujuć klijentam, jakija zapisalisia na śniežań u vizavyja centry Minska, Mahilova i Homiela, i prosiać paćvierdzić rehistracyju. Dla hetaha pytajucca, ci samastojna zapisvaŭsia čałaviek, ci praz ahienctva. Kali praz ahienctva, hety zapis mohuć anulavać», — raskazvaje viadučy tyktok-akaŭnta @nashivpolshe. — Kali čałaviek kaža, što zapisvaŭsia sam, padčas zvanka jamu na poštu vysyłajuć kod paćviardžeńnia, jaki treba im ahučyć. Adpaviedna, kali ŭ vas niama dostupu da pošty, ź jakoj vy rehistravalisia ci vas rehistravali, to vaš zapis taksama mohuć anulavać».

Pra padobnuju situacyju raskazvaje i tyktok-akaŭnt @kat_visa.

«Vizavy centr polski staŭ niečakana abzvońvać ludziej z pytańniem ab tym, jakim čynam vy zapisalisia [na padaču] i ź jakoj pošty rehistravalisia. Vielmi mnohija, naturalna, razhubilisia. Chto skazaŭ, što rehistravaŭsia ź niečaj dapamohaj, adrazu atrymali anulavańnie zapisu, — apisvaje situacyju viadučaja tyktok-akaŭnta. — Vielmi sumnaja historyja. Vielmi kryŭdna za ludziej, jakija doŭha čakali. Ciapier im pryjdziecca zapisvacca nanova. Ale samaje kryŭdnaje, što ludzi, jakija mahli rehistravacca samastojna, robiačy prosta šmat poštaŭ i nie pamiatajučy, ź jakoj mienavita jany zarehistravalisia, dakładna hetak ža mahli atrymać anulavańnie zapisu».

Vizavaja ekśpiertka i redaktarka resursu visaflow.live Nastaśsia Łysakoŭskaja kaža, što, nakolki joj viadoma, praktyku z pravieračnymi zvankami vykarystoŭvajuć upieršyniu.

«Zvanki nazirajem z 29 listapada. Mnie pakul paviedamlali, što telefanujuć ź vizavych centraŭ Minskaj akruhi. Infarmacyi pa inšych akruhach pakul nie pastupała, — raskazvaje surazmoŭca. — Usie pravierki, pra jakija mnie viadoma, adbyvajucca pa śniežańskich zapisach, u asnoŭnym nabirajuć za paru dzion da padačy. Sutnaść — udakładnić, jak čałaviek zapisaŭsia. Kali ź niečaj dapamohaj, daviedvajucca, ci heta było praz ahienctva. Kali zajaŭnik adkazvaje stanoŭča, rehistracyju anulujuć.

Zdarałasia, ludzi adkazvali, što im dapamahali svajaki. Chutka daviedacca ŭ ich vysłany na poštu kod nie atrymlivałasia. Zapis u hetych vypadkach anulavali nie zaŭsiody».

Pa słovach Nastaśsi, byvała, čałaviek nie zaŭvažyŭ zvanok i nie źniaŭ słuchaŭku. Paśla jon pryjazdžaŭ u VC u patrebnuju jamu datu i, «paskandaliŭšy», padavaŭsia.

«Usio heta randomna, kahości, chto nie adkazaŭ, razvaročvali. Ale pakul u bolšaści vypadkaŭ, pra jakija ja čuła, kali nie datelefanoŭvajucca, prapuskajuć, — kaža jana. — Jość situacyi, kali čałavieku, jaki nie źniaŭ słuchaŭku, na poštu dasyłali kod. Maja parada: pierad pachodam na padaču praviercie mejły i idzicie da ich z kodam».

Adna z mahčymych pryčyn źjaŭleńnia zvankoŭ — baraćba z «pamahatarami».

Niahledziačy na heta, kaža Nastaśsia, ludzi ŭsio adno nie pierastanuć źviartacca ŭ ahienctvy, bo «zapisacca na padaču samomu składana».

«Maja rekamiendacyja, ale nie instrukcyja: kali vam telefanujuć i pradstaŭlajucca, što heta supracoŭniki VC, udakładnicie, z kim vy razmaŭlajecie, i z asablivaj aściarožnaściu raskryvajcie piersanalnyja danyja», — reziumuje surazmoŭnica.

• 15
• 3
• 11
• 9
• 4
• 1
• 7
• 0