«Tempieratura — 40, tabletki nie dapamahali». Biełaruska ź invalidnaściu ciažka pierachvareła na anhinu i ciapier šukaje hrošy na lačeńnie ŭ Polščy
Volha Majchroŭskaja pierasoŭvajecca ŭ invalidnym vazku. Niadaŭna jana ciažka pierachvareła na hnojnuju anhinu — žančyna vielmi straciła ŭ vazie, da taho ž z-za praciahłaha paścielnaj režymu ŭ jaje ŭtvarylisia proležni. Ciapier biełaruska žyvie ŭ Polščy i samastojna apłacić lačeńnie nie moža, tamu šukaje hrošy, piša Most.
U śniežni 2015 hoda Volha trapiła ŭ aŭtakatastrofu. Tady z 11-hadovym synam jana pryjechała na niekalki dzion u Polšču, dzie na Kalady źbirałasia pabačycca ź siabrami. Na sustreču ź imi žančynu z synam padvozili na mašynie. Na trasie kiroŭca zasnuŭ za rulom — aŭtamabil pierakuliŭsia. Syn Volhi mieŭ tolki drapinu na hałavie, a voś jana apynułasia ŭ balnicy ź pierałomam chrybietnika.
Volha pieraniesła čatyry apieracyi. Pieršaja prajšła ŭ Polščy, jašče try — u Biełarusi. Pieršy čas paśla traŭmy žančyna nie mahła navat samastojna siadzieć u łožku. Joj daviałosia vučycca hetamu nanova pry dapamozie admysłovych harsetaŭ. Jašče składaniej było adnavicca psichałahična. Volha pryznajecca: žyć nie chaciełasia.
— Ja ŭ doŭhaj depresii była. Nie chaciełasia na ludziach vielmi doŭha źjaŭlacca. Ja adnaŭlała psichiku kala čatyroch hadoŭ, — uspaminaje jana.
Pryjechała ŭ Varšavu na lačeńnie i stała barysta
U lutym 2024 hoda žančyna pajechała na lačeńnie ŭ Polšču. Tady jana paznajomiłasia z supracoŭnikami kaviarni Inclusive Barista. Jaje saŭładalnik sam pierasoŭvajecca na invalidnym vazku i ŭ supracoŭniki biare ludziej ź invalidnaściu.
Viarnuŭšysia ŭ Biełaruś, Volha atrymała prapanovu papracavać u kaviarni. Žančyna pahadziłasia i pierajechała ŭ Varšavu, dzie ŭžo žyŭ jaje syn. Prajšoŭšy stažyroŭku ŭ kaviarni, Volha stała barysta.
Novaja praca joj padabałasia: va ŭstanovie družny kalektyŭ i pryjemnaja atmaśfiera. A siarod naviedvalnikaŭ ustanovy šmat biełarusaŭ.
«Nikoli nastolki ciažka nie chvareła»
Ale ŭ kastryčniku Volhu napatkała novaja biada — hnojnaja anhina.
— Ja nikoli nastolki ciažka nie chvareła. Tempieratura — 40, pry jakoj ty prosta trasiešsia ŭsia, i tabletki nie dapamahajuć, — uspaminaje jana.
Z-za chvaroby Volha nadoŭha apynułasia ŭ łožku. Da taho času ŭ jaje ŭžo byŭ nievialiki proležań — heta raspaŭsiudžanaja prablema vazočnikaŭ. Ale padčas chvaroby situacyja pahoršyłasia, proležni stali pahroźlivymi — rany amal da kostki. Kab jany nie prahresavali, Volhu treba było pieravaročvać. Pieršy čas z hetym dapamahaŭ syn, paźniej znajšli siadziełku.
Da taho ž žančyna nie mahła hłynać, pačałasia rezkaja strata vahi i aniemija, stali vypadać vałasy.
Treba nabrać 15-20 kiłahramaŭ
Ciapier Volzie nieabchodna prajści kurs lačeńnia pa papaŭnieńni białku.
— Ja sama ŭžo nie zmahu 15-20 kiłahramaŭ vahi nabrać. Mnie na heta, napeŭna, hod spatrebicca. Kali nie hod, to paŭhoda dakładna. A jość klinika, jakaja mnie dapamoža zrabić heta za try miesiacy, — kaža jana.
Paśla hetaha žančynie treba budzie zrabić apieracyju, jakaja likviduje proležni.
Pracavać ciapier Volha nie moža. U siabie ŭ Instagram jana nazvała siabie «časova nie barysta pa stanie zdaroŭja». Apłacić lačeńnie samastojna žančyna nie moža, tamu źviarnułasia pa dapamohu.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary