Praz try hady zmahańnia za svaje pravy pieršaj siamji biełarusaŭ u Hruzii kančatkova admovili ŭ prytułku
Apielacyjny sud u Tbilisi nie zadavoliŭ skarhu biełaruskaj siamji na admovu ŭ palityčnym prytułku i humanitarnym statusie ŭ Hruzii. Heta pieršaja viadomaja pravaabaroncam sprava, kali biełarusy vyčarpali ŭsie mahčymyja varyjanty abskardžvańnia ŭ krainie, piša Biełsat.
Pavodle słovaŭ pravaabaroncy Ramana Kiślaka, razmova idzie pra žančynu, jakaja znachodzicca ŭ Hruzii razam sa svaim dziciom i partnioram. Ich imiony nie raskryvajucca ź mierkavańniaŭ biaśpieki.
U Hruziju žančyna pryjechała jašče ŭ 2019-m hodzie. U žniŭni 2020-ha hoda, paśla prezidenckich vybaraŭ u Biełarusi, jana źviarnułasia da hruzinskich uładaŭ z prośbaj dać prytułak. U listapadzie taho ž hoda ŭ jaje naradziłasia dzicia.
U lutym 2022 hoda ŭłady Hruzii admovili ŭ prytułku joj i partnioru, a ŭ sakaviku — dziciu. U traŭni taho ž hoda jany abskardzili hetaje rašeńnie.
Jak paviedamlaje pravaabaronca, da śniežnia 2024 hoda sprava razhladałasia ŭ Tbiliskim haradskim i apielacyjnym sudach. Rašeńni suda pieršaj instancyi niekalki razoŭ skasoŭvaŭ apielacyjny sud i nakiroŭvaŭ spravu na novy razhlad. U vyniku apielacyjny sud u Tbilisi nie zadavoliŭ skarhu biełaruskaj siamji na admovu ŭ palityčnym prytułku i humanitarnym statusie ŭ Hruzii. Ciapier u siamji jość miesiac na toje, kab pakinuć Hruziju, kali nie znojducca inšyja padstavy zastacca ŭ krainie.
Nahadajem, «Biełsat» užo pisaŭ pra toje, što stanovišča «palityčnych» biełarusaŭ u Hruzii surjozna paharšajecca. U dadatak da vizavych pastak i pryniaćcia Zakonu ab zamiežnych ahientach ciapier — paśla abviaščeńnia vynikaŭ vybaraŭ u Hruzii — biełarusam masava stali admaŭlać u prytułku. Departamient mihracyi MUS Hruzii pryznaje, što niekatoryja «palityčnyja» biełarusy adpaviadajuć kryteram Ženieŭskaj kanviencyi i zakonu Hruzii ab mižnarodnaj abaronie, ale pry hetym adkazvaje, što ichnaje znachodžańnie na terytoryi Hruzii moža «supiarečyć intaresam krainy» — pryznajuć pahrozaju dziaržaŭnaj biaśpiecy. Ale navat paśla hetaj admovy šmat jakija biełarusy, kali b i chacieli źjechać, to zrabić hetaha nie mohuć: skončylisia terminy dziejańnia pašpartoŭ ci im nie dajuć vizy.
Tolki za apošnija niekalki miesiacaŭ dakładna viadoma pra 26 vypadkaŭ admovaŭ u mižnarodnaj abaronie.
Aficyjnaja statystyka hetuju infarmacyju paćviardžaje. Pavodle MUS Hruzii, pa abaronu z pačatku źjaŭleńnia biełarusaŭ u Hruzii ŭ hetaj statystycy (2019 hod) źviarnulisia 73 asoby. Charakterna, što 32 ź ich zrabili heta ŭ 2024-m. I tak, sapraŭdy, pakul nivodny biełarus, čyju spravu ŭžo razhledzieli, mižnarodnaj abarony ŭ Hruzii nie atrymaŭ.
Cikava, što ŭ 2019—2022 hadach takija vypadki byli adzinkavyja. U 2023-m i ciaham pieršych dvuch kvartałaŭ 2024 hoda admovaŭ nie było zusim. Zatoje ŭ trecim kvartale 2024-ha — adrazu 26 admovaŭ.
«My miarkujem, što va ŭradzie Hruzii pastanavili admaŭlać u mižnarodnaj abaronie ŭsim biełarusam. My patrabujem spynić dyskryminacyju ŭ dačynieńni biełarusaŭ pry atrymańni ŭciakactva», — kaža Raman Kiślak.
U źviazku z hetym biełarusy raspačali štotydniovyja akcyi pratestaŭ suprać dyskryminacyi biełarusaŭ u Hruzii, u pryvatnaści suprać admovaŭ u palityčnym prytułku pry razhladzie prośbaŭ ab mižnarodnaj abaronie.
Kamientary