Miljardery, zamiežnyja hości i eks-prezidenty: chto budzie prysutničać na inaŭhuracyi Trampa
U adroźnieńnie ad papiaredniaj inaŭhuracyi čatyry hady tamu, Džo Bajden budzie prysutničać na cyrymonii ŭstupleńnia ŭ pasadu svajho pierajemnika, piša «Hołas Amieryki».
Iłan Mask, samy bahaty čałaviek u śviecie, stanie adnym ź niekalkich miljarderaŭ, zaprošanych na druhuju inaŭhuracyju prezidenta Donalda Trampa, jakaja adbudziecca ŭ paniadziełak.
Pavodle Forbes, kiraŭnik Tesla adyhraŭ važnuju rolu ŭ pieravybarach Trampa, achviaravaŭšy na jaho vybarčuju kampaniju bolš za čverć miljarda dołaraŭ. Paviedamlajecca, što Mask uznačalić novy departamient pa pavyšeńni efiektyŭnaści pracy ŭrada, jaki budzie stvorany ŭ administracyi Trampa. Druhim sukiraŭnikom departamienta stanie pradprymalnik u śfiery bijatechnałohij Viviek Ramasvami.
Na inaŭhuracyi taksama buduć prysutničać były kiraŭnik Amazon Džieff Biezas i kiraŭnik Meta Mark Cukierbierh.
Zamiežnyja lidary redka zaprašajucca na inaŭhuracyi amierykanskich prezidentaŭ, adnak Tramp zrabiŭ niekalki vyklučeńniaŭ.
Pavodle Bloomberg, na cyrymonii budzie prysutničać prezident Arhienciny Chaŭjer Milej, jaki staŭ pieršym zamiežnym lidaram, jaki sustreŭsia z Trampam paśla jaho pieramohi na vybarach u listapadzie. Taksama zaprašeńnie atrymaŭ staršynia KNR Si Czińpin, jaki nakiruje na cyrymoniju svajho pradstaŭnika. Akramia taho, pravy premjer-ministr Italii Džordža Miełoni była zaprošanaja, adnak zajaviła, što nie ŭpeŭnienaja, ci zmoža pryjechać u Vašynhton z-za ščylnaha pracoŭnaha hrafika.
Tradycyjna na inaŭhuracyi prysutničajuć usie žyvyja prezidenty ZŠA. Džo Bajden i pieršaja łedzi Džył Bajden prymuć udzieł u cyrymonii ŭ paniadziełak, u adroźnieńnie ad situacyi čatyry hady tamu, kali Tramp admoviŭsia prysutničać na inaŭhuracyi Bajdena paśla svajoj parazy, śćviardžajučy, što mienavita jon pieramoh na vybarach.
Siarod haściej inaŭhuracyi taksama buduć byłyja prezidenty Barak Abama, Džordž Buš-małodšy i Bił Klintan. Buš i Klintan pryjeduć na mierapryjemstva razam z žonkami — Łoraj Buš i eks-dziaržsakratarkaj Chiłary Klintan.
Adnak byłoj pieršaj łedzi Mišel Abamy na cyrymonii nie budzie. Jak paviedamiła kancylaryja siamji Abama, heta ŭžo druhi značny vypadak za apošnija tydni, jaki jana prapuściła: Mišel Abama nie prysutničała na pachavańni byłoha prezidenta Džymi Kartera, dzie sabralisia astatnija byłyja lidary krainy i ich žonki.
Taksama čakajecca, što vice-prezidentka Kamała Charys i jaje muž Duhłas Emchof, buduć prysutničać na inaŭhuracyi. Nahadajem, Charys była kandydatkaj ad demakrataŭ na minułahodnich prezidenckich vybarach.
Kamientary