Hramadzianka Biełarusi Darja Mikałajeŭna Astapienka 1987 hoda naradžeńnia trapiła ŭ polski vyšuk praz abvinavačańnie ŭ špijanažy. Heta jaje asudzili, ale adpuścili na čas da apielacyi, piša Biełsat.
Polskaja palicyja raźmiaściła abviestku pra vyšuk hramadzianki Biełarusi Darji Astapienki, jakuju vinavaciać u špijanažy. Vyšukam zajmajecca Kryminalny adździeł palicyi Varšava-VII. Tych, chto moža dapamahčy, prosiać źviartacca na numar (0-22) 810-60-63, faks (0-22) 603-75-44 abo na elektronnuju poštu [email protected].
Darja Astapienka była asudžanaja na turemnaje źniavoleńnie terminam 1 hod 8 miesiacaŭ z nadzvyčajnym źmiakčeńniem. Pieryjad časovaha zatrymańnia i ŭtrymańnia pad vartaju z 20.12.2023 da 10.09.2024 byŭ zaličany ŭ termin pakarańnia. Heta amal 9 miesiacaŭ z prysudžanych joj 20. A značyć, jana mahła pačakać miesiac ź nievialikim i paprasić ab daterminovym vyzvaleńni. Nie vyklučana, što prośbu ŭchvalili b, bo paśla suda Darju A. vyzvalili da nabyćcia prysudam mocy — pierad hetym jana mahła jašče abskardzić prysud.
Ale jana nie źjaviłasia dla adbyvańnia pakarańnia i nie zrabiła ŭ naležny čas płaciažu 15,5 tysiačy złotych (3875 dalaraŭ). Dzie jana moža być ciapier, nie viedajuć.
Astapienku zatrymali ŭ Łodzi ŭ śniežni 2023 hoda, zapadozryŭšy ŭ pracy na Kamitet dziaržaŭnaj biaśpieki Biełarusi. Biełaruskija miedyi vyśvietlili, što heta byłaja aktyvistka «Havary praŭdu» z Baranavičaŭ i kolišniaja davieranaja asoba kandydata na prezidenctva Andreja Dźmitryjeva.
Vieterynarka z adukacyi, Darja padpracoŭvała madellu na sajcie dla darosłych «OnlyFans». Śćviardžałasia, što ŭ smartfonie žančyny byli znojdzienyja dokazy jejnaj supracy z Kamitetam dziaržaŭnaj biaśpieki jašče z 2017 hoda.
Pa pierajeździe ŭ Polšču biełaruska sprabavała naładžvać kantakty z aktyvistami biełaruskaj dyjaspary, trapić u arhanizacyi, prapanoŭvajučy vałanciorskuju dapamohu, źbirała infarmacyju pra Paspalitaje rušeńnie, biełaruskich dobraachvotnikaŭ va Ukrainie i tych, chto im dapamahaje. Darja A. vydała siabie, kali padčas niećviarozaj razmovy prahavaryłasia znajomym pra sapraŭdnyja mety aktyŭnaści ŭ Polščy. Paśla hetaha infarmacyju pra žančynu pieradali ŭ polskaje Ahienctva ŭnutranaj biaśpieki, u toj ža dzień jaje zatrymali.
Vydańnie «Gazeta.pl» pisała, što sud nad joju byŭ vielmi karotki. U apošnim słovie biełaruska vykazała škadavańnie, što biazdumna pahadziłasia na supracu sa śpiecsłužbami; sa ślazami na vačach kazała, što jaje prymusili; narakała, što za dzieviać miesiacaŭ za kratami ŭ jaje abvastryłasia depresija.
Łukašenka zahavaryŭ pra prarasijskaść Cichanoŭskaha, bajučysia nazvać jaho imia37
Kamientary