«Ździŭleny, jak dobra pracavali płastykavyja kartki». Što pišuć pra Biełaruś na turystyčnych forumach?
Niahledziačy na pieraškody, zamiežnyja turysty pryjazdžajuć u Biełaruś. Kab padrychtavacca da pajezdki, niekatoryja ź ich pakidajuć svaje pytańni na papularnym turystyčnym sajcie Tripadvisor. Inšyja dzielacca svaimi vodhukami. «Naša Niva» pahladzieła, što tam pišuć zamiežniki.
Na forumie Tripadvisor u raździele pra Biełaruś ciapier jość 2411 adkrytych tem. Siarod ich možna znajści historyi turystaŭ, jakija pabyvali ŭ našaj krainie i dzielacca dośviedam.
Naprykład, u kancy listapada 2024-ha tam źjaviŭsia post ad brytanca, jaki naviedaŭ Biełaruś pa biaźvizie. Miarkujučy pa raskładzie, padarožnik dajechaŭ u Minsk biez zatrymak: jon vylecieŭ z anhlijskaha aeraporta Łutan ab 11-j ranku pa biełaruskim časie, dalacieŭ da Vilni, sieŭ tam na aŭtobus i ŭžo ŭ 20:30 byŭ u Minsku. Na miažu ŭ brytanca pajšło prykładna 3,5 hadziny, i da hetaha jon pastaviŭsia z razumieńniem.
A voś što było dla brytanca niečakanaściu:
«Ja byŭ vielmi ździŭleny tym, jak dobra spracavali [płastykavyja] kartki. Padazravaŭ, što ŭ najlepšym vypadku budzie 50 na 50, ale jany pracavali amal paŭsiul. Maja kartka nie spracavała tolki ŭ dvuch bankamatach i na terminale ŭ minskim mietro. Taksama ŭ Mak.by maja kartka čamuści spracavała tolki na kasie, a nie na terminale samaabsłuhoŭvańnia, ale ahułam maja kartka ad Virgin Money pracavała vielmi dobra.
Ja vykarystoŭvaŭ jaje šmat u jakich restaranach i supiermarkietach, i taksama na linii Stalina. Apple Pay taksama pracavaŭ. Ja jašče ŭziaŭ najaŭnyja, jeŭra i funty. Nikomu nie rekamienduju nie brać najaŭnyja, ale ahułam kartki akazalisia našmat bolš nadziejnymi, čym ja čakaŭ».
Aŭtar pasta dvojčy pieranačavaŭ u Minsku — u pieršy dzień jon vyvučaŭ horad, a ŭ druhi pajechaŭ na maršrutcy na liniju Stalina. Nazad jon viartaŭsia praź Vilniu, i na hety raz brytaniec prajšoŭ miažu ŭsiaho za 2 hadziny.
U kamientary da jaho pryjšoŭ jašče adzin turyst, jaki paćvierdziŭ, što pierachod praź miažu zajmaje paru hadzin, i padzialiŭsia ŭražańniami ad pajezdki:
«Minsk fantastyčny — pryhožy centr, vielmi stylova i nievierahodna čysta!»
Nie ŭsim jeŭrapiejcam tak pašancavała z kartkami ŭ Biełarusi, jak tamu brytancu — jaho suajčyńnik raskazaŭ, što padčas troch pajezdak u Biełaruś u 2024-m jon sprabavaŭ karystacca kartkami čatyroch roznych bankaŭ, ale biespaśpiachova. Tamu, raić jon inšym padarožnikam, varta ŭziać z saboj zapas hrošaj u jeŭra.
U inšym dopisie na Tripadvisor svaimi ŭražańniami dzielicca brytaniec, jaki razam ź siabrami naviedaŭ Biełaruś viasnoj 2024-ha. Turysty atrymali vizy praź biełaruskaje pasolstva ŭ Talinie, tamu što pierad hetym padarožničali pa bałtyjskich krainach, i pajechali ŭ Minsk na dva dni. Na miažy im spačatku byli nie vielmi rady:
«Pamiežnica spačatku vyhladała zaniepakojenaj i niekalki chvilin raiłasia z kalehaj. Potym jana vykarystała Google Translate na maim telefonie, kab zadać niekalki pytańniaŭ. Jany byli trochi źbiantežanyja, što my tak šmat prajechali tolki dziela taho, kab pravieści ŭ Biełarusi adnu noč, ale ŭrešcie trochi ŭśmichnulisia nakont hetaha. Potym jana praštampavała našy pašparty i pažadała nam pryjemnaha padarožža».
Brytancy prajšlisia pa Minsku i zajšli ŭ niekalki muziejaŭ, a ŭviečary jeli, na ich dumku, najsmačniejšy stejk u ich žyćci ŭ adnym z restaranaŭ u centry Minska. Na nastupny dzień siabry sieli na aŭtobus na Vilniu. Padarožža im spadabałasia, chacia jany i adznačajuć, što na miažy było stresava — nie tolki praz pavodziny biełaruskaj pamiežnicy pry ŭjeździe, ale i praz doŭhaje čakańnie na litoŭskim baku miažy padčas vyjezdu.
Što jašče pišuć padarožniki? Ich chvalujuć detali biaźvizu i strachoŭki, sposaby dajechać u Biełaruś i pierasiačeńnie biełaruska-rasijskaj miažy. Trochi bolš za miesiac tamu adzin z padarožnikaŭ pacikaviŭsia, jak spravy ź ciahnikom Vilnia-Minsk — maŭlaŭ, jon čamuści nie moža nabyć kvitok anłajn, jak jon rabiŭ niekalki hadoŭ tamu.
Jamu patłumačyli, što hety ciahnik nie chodzić z časoŭ pandemii, a da Biełarusi možna dajechać na aŭtobusie, i pry hetym treba być hatovym pačakać:
«Na dniach jechaŭ ź Minska ŭ Vilniu. Byŭ nasamreč šakavany, jak šmat zamiežnikaŭ usio jašče vierać, što aŭtobus pryjedzie adpaviedna času, napisanamu ŭ ich anłajn-kvitku. Stolki pišuć u internecie, što aŭtobusy, jakija pierajazdžajuć praź miažu, nikoli nie pryjazdžajuć svaječasova, i ŭsio roŭna ŭ aŭtobusie dziasiatki aburanych zamiežnikaŭ, ździŭlenych, što jany spaźniajucca na svaje rejsy. Prosta nievierahodna».
Znajšłasia navat publikacyja ad hramadzianina ZŠA, jaki źbiraŭsia naviedać Minsk, kab palačyć zuby. Zamiežnika cikavili lubyja padkazki, u tym liku i infarmacyja pra ahienctvy, jakija zajmajucca miedyčnym turyzmam. Ale ž jaho zaklik pa dapamohu zastaŭsia biez adkazu.
«Naša Niva» — bastyjon biełaruščyny
PADTRYMAĆ«Nibyta ludzi ź inšaj płaniety». Čym uraziła Biełaruś zamiežnikaŭ, jakija pryjechali pa biaźvizie
«Ludzi z Tajvania i Karei pytalisia, dzie znachodzicca Biełaruś». Aktyvistka prajšła sotni kiłamietraŭ pa Ispanii z raskazam pra palitviaźniaŭ
Biełastockija biznesoŭcy prosiać adkryć punkty propusku na miažy ź Biełaruśsiu
U Polščy aryštavali byłoha kiraŭnika biełaruskaha «Paspalitaha rušeńnia» — pahražaje 10 hod za narkotyki26
Kamientary
)
eto słučajno nie brat mojeho muža?