U źlitaj razmovie siłaviki abmiarkoŭvajuć, jak adsočvajuć ludziej pa łakacyi mabilnaha telefona. Nadziejna schavacca ź im składana
«Kibierpartyzany» apublikavali aŭdyjazapis prasłuchoŭki telefonnych razmoŭ dvuch siłavikoŭ, jakija sprabavali znajści «niaŭłoŭnaha» aŭtara palityčnych nadpisaŭ na adnym z budynkaŭ u Salihorsku.
Videa pierakazvaje vydańnie «Zierkało».
Tak, miascovaja milicyja ŭžo vykarystała ŭsie zvykłyja mietady, naprykład pieratrusy ŭ aktyvistaŭ i navat ustanoŭku fotapastki (nie dapamahło). Siłaviki vyrašyli źviarnucca da apošniaj začepki — danych bilinhu mabilnych telefonaŭ — i davoli padrabiazna apisvajuć, jak źbirajucca šukać mahčymaha padazravanaha.
«Za hetu noč tam šachnuli. Tak kryŭdna»
Źlitaja razmova adbyłasia ŭ mai 2021 hoda. Razmaŭlali Vadzim Kanapacki, na toj momant — namieśnik načalnika Salihorskaha RAUS, i Ihar Kačałaŭ, namieśnik načalnika kryminalnaj milicyi UUS Minskaha abłvykankama.
Prablema była ŭ tym, što niechta znoŭ razmalavaŭ budynak «Edelviejs hety b***». «Edelviejs», chutčej za ŭsio, heta miascovaje ŭnitarnaje pradpryjemstva, jakoje zajmajecca ramontam i budaŭnictvam. Takija razmaloŭki, zroblenyja adnoj i toj ža rukoj, znajšli ŭžo treci raz. Pieršy vypadak adbyŭsia ŭ noč z 13 na 14 studzienia, druhi — 4 sakavika, na Dzień milicyi, treci — u mai 2021 hoda.
Nadpisy byli palityčnaha charaktaru, u apošnim vypadku zhadvalisia «Łuka» i «fašyzm». Pa hetym fakcie było ŭzbudžana kryminalnaja sprava pa artykule «Chulihanstva».
Siłaviki abmiarkoŭvajuć miesca zdareńnia — salihorski mikrarajon Pamieście, jaki faktyčna źjaŭlajecca častkaj Starobina. Kanapacki adznačaje, što situacyja drennaja, tamu što aŭtara nadpisaŭ znajści nie atrymlivajecca, chacia «taja ž ruka, toj ža počyrk».
«Ja braŭ u BTPR (Biełaruskaje tavarystva palaŭničych i rybałovaŭ) hetyja fotapastki. Vystaviŭ ich 8-ha čysła, ale litaralna dva dni tamu mnie pazvaniŭ hety betepeeraviec i skazaŭ: «Jany mnie patrebnyja, palavańnie pačynajecca, rybałoŭstva». Ja ich źniaŭ, i za hetu noč tam šachnuli. Tak kryŭdna, bł**», — skardzicca Kanapacki.
«Całkam teraryzujem, łupim pieratrusy»
Kanapacki padrabiazna tłumačyć, jak jany pierabirali mahčymych padazravanych.
«Pamieście my poŭnaściu teraryzavali, łupili vobšuki. Pravieryli sistemu AIS «Biesparadki» — u nas tam adzin z Pamieścia i siem sa Starobina. Pa «Majaku» hladzieli — nichto [ź ich] u hety pieryjad času ŭ soty pakryćcia nie fiksavaŭsia. Pa pieratrusach — voś siońnia była infarmacyja, što nibyta BČB-ściah jość. Nu, praviali [pieratrus], ale nie toje palito, adrazu adčuvajecca. Budziem abładžvać, teraryzavać dalej. Pakul tolki tak.»
Taksama siłaviki sprabavali źviazać incydent z udzielnikami strajkama «Biełaruśkalija».
«Tut ja ŭžo pryviazvaju heta da strajkama. My ž zatrymali hetaha Bokuna (Anatola Bokuna, lidara stačkama «Biełaruśkalija»), dali jamu 30 sutak. I ŭ strajkamie [zajavili]: «Voś, znoŭ represii». I voś litaralna na nastupny dzień źjavilisia hetyja nadpisy — znoŭ «Łuka», «fašyzm».
Dalej idzie razmova pra mahčymaść pravierki «Majaka», śpiecyjalnaj bazy siłavikoŭ, z dapamohaj jakoj biez zapytu da apierataraŭ jany mohuć atrymlivać infarmacyju pra toje, jakija aparaty i sim-karty znachodziacca ŭ peŭnym rajonie.
«My možam hetych strajkamaŭcaŭ pa «Majaku» pravieryć? Moža, niechta ruchaŭsia ŭ tym kirunku?» — pytajecca Kačałaŭ.
«My ŭžo hladzieli. My hladzieli tych, chto moža być zdolny na heta. Ale hetyja strajkamaŭcy ŭžo razumniejšyja za nas u płanie telefonaŭ».
Pa słovach Kanapackaha, pravieryli ŭsich ludziej z Pamieścia, chto raniej byŭ u poli zroku milicyi: «I «dvojku» my im rabili, i šmanali ich». Adnak usie jany akazalisia niedatyčnymi da palityčnych nadpisaŭ.
«Heta adzinaje, za što možna začapicca»
Na druhim aŭdyjazapisie Kačałaŭ prapanuje kankretnuju stratehiju pošuku aŭtara nadpisaŭ:
— Ja voś siadžu, dumaju. A što, kali pa «Majaku» pahladzieć kankretnyja daty [kali źjaŭlalisia nadpisy]. U nas ža nočy viadomyja?
— Tak, viadomyja. My ŭžo raźvivali zadańnie nakont hetaha. Ja chacieŭ zadańnie na DZAPD (Departamient zabieśpiačeńnia apieratyŭna-pošukavaj dziejnaści Ministerstva ŭnutranych spraŭ Respubliki Biełaruś) dać. My dadzim jaho, ale vialiki budzie vielmi abjom, tamu što…
— Nie-nie viedaješ, što. U nas jość try kankretnyja daty. Davaj, davaj. Niachaj budzie vialiki abjom. Ale ŭsio roŭna hetuju pracu treba pačynać. U nas ničoha niama pakul. Heta adzinaje, za što možna ŭčapicca, ad čaho možna skakać. Davaj my vybieram hety vialiki abjom. My ž razumiejem z taboj cudoŭna, što heta adny i tyja ž ludzi buduć.
— Heta sto pracentaŭ, tamu što počyrk identyčny.
— Abo ž adzin i toj ža čałaviek. Voś nam treba try razy, kab byli… Z troch dzion my vykiniem usio, pakiniem tolki tyja telefony, jakija try razy patrapili ŭ hetuju sotu. <…> Ludzi źjazdžali. Voś pahladziš, u ciabie budzie vielmi mała telefonaŭ, jakija śpiać tut. <…> A jašče niedzie razmaloŭki byli padobnyja?
— Nu, voś mienavita taki počyrk, identyčny pakul nie znajšli. Ja ŭžo taksama hetym azadačyŭsia. Padymaju zaraz usio, što ŭ mianie jość pa kryminalnych spravach, pa administracyjnych. Ale pakul, kab skazać «heta toje ž samaje» — pa litarach, pa sensie — pakul niama. Usiudy niešta niedzie padobnaje, ale nie toje samaje, skažam tak. A tut dakładna bačna, što heta adna ruka.
— Nu, jasna. Davaj usio ž… Usio roŭna pačynać niama z čaho.
Čym skončyłasia hetaja historyja i ci znajšli nastojlivaha aŭtara nadpisaŭ — nieviadoma.
Nakolki prosta siłavikam znajści čałavieka pa łakacyi mabilnaha telefona?
Nahadajem, što SIM-karta biełaruskaha mabilnaha apieratara dazvalaje siłavikam (i nie tolki im) vyznačyć dakładnaje miescaznachodžańnie jaje ŭładalnika praź śpiecyjalnuju bazu «Majak».
Mabilny telefon z SIM-kartaj uvieś čas padklučajecca da bližejšych vyšak suviazi. Technałohija, jakuju vykarystoŭvaje apieratar, i kolkaść sotavych vyšak u peŭnaj miascovaści ŭpłyvajuć na dakładnaść vyznačeńnia miescaznachodžańnia abanienta.
Zvyčajna, kali ŭ zonie znachodziacca minimum try vyški, apieratar moža vyznačyć łakacyju z dakładnaściu da adnaho kiłamietra.
«Kali ŭ śpiecsłužbaŭ jość simka, abo IMEI telefonnaha aparata, to tut usio roŭna, jon uklučyć hetuju simku ŭ inšym aparacie abo aparat prosta ŭklučać ź inšaj simkaj. Kantralujucca dźvie rečy: sim-karta i aparat.
Jak tolki jon ich uklučaje, heta fiksujecca praź śpiecyjalnyja prahramy, i takim čynam vydajecca jaho łakacyja — dzie jon znachodzicca, prykładna sota. I tady ŭžo možna ŭklučać prasłuchoŭvańnie abo pa IMEI aparata, abo pa simcy. I ŭžo šukać jaho i zatrymlivać. Sota — heta, prykładna, kruh u kiłamietr, — tłumačyŭ zasnavalnik BYPOL Alaksandr Azaraŭ.
Sim-karta dazvalaje siłavikam vyličać miescaznachodžańnie čałavieka. Raskazvajem, jak heta pracuje i što zrabić, kab siabie zaścierahčy
Jak schavać miescaznachodžańnie telefona
Kali meta — całkam schavać svaju hieałakacyju ŭ Biełarusi, to adziny šlach — nie karystacca telefonam ź sim-kartaj (i nie mieć jaho pry sabie). Lepš za ŭsio vykarystoŭvać dla vychadu ŭ internet «čystuju» pryładu, u jakuju da hetaha nie ŭstaŭlałasia sim-karta biełaruskaha (abo rasijskaha) apieratara. Prosta vyklučyć telefon — niedastatkova biaśpiečnaja miera. Navat vyklučanaja pryłada praciahvaje abmieńvacca infarmacyjaj z navakolnym śvietam.
Ciapier čytajuć
«Ja naviedaŭ samuju izalavanuju krainu Jeŭropy». Amierykanski błohier raskazaŭ, jak pryjazdžaŭ u Biełaruś u 2020-m i 2024-m2
Kamientary
"Navat vyklučanaja pryłada praciahvaje abmieńvacca infarmacyjaj z navakolnym śvietam."
[Zredahavana]