«Ja schapiŭ jaje za ściohny, kab nie paśliznucca». U Paryžy idzie sudovy praces nad Žeraram Depardjo pa abvinavačvańni ŭ seksualnym hvałcie
Słavutamu akcioru pahražaje da piaci hadoŭ turmy.
U Paryžy praciahvajecca sudovy praces suprać francuzskaj kinazorki Žerara Depardjo, jaki pačaŭsia ŭ paniadziełak. Aktoru vystaŭlena abvinavačańnie ŭ sieksualnym hvałcie suprać dźviuch žančyn padčas zdymak filma «Zialonyja staŭni» ŭ 2021 hodzie, piša Bi-bi-si.
Praces, jak čakajecca, praciahniecca prynamsi try dni. Pieršapačatkova jon musiŭ adbycca jašče ŭ kastryčniku, ale byŭ pieraniesieny z-za drennaha samaadčuvańnia Depardjo.
Heta pieršaja sprava suprać Depardjo, što dajšła da suda, chacia ŭsiaho kala 20 žančyn abvinavacili jaho ŭ nieprystojnych pavodzinach. Kali jaho pryznajuć vinavatym, jamu pahražaje da piaci hadoŭ źniavoleńnia i štraf pamieram da 81 tysiačy dołaraŭ.
U aŭtorak paciarpiełaja — mastačka-pastanoŭščyca Ameli K., jakaja vystupała ŭ sudzie paśla Depardjo, — zajaviła, što akcior dakranaŭsia da jaje cieła, zacisnuŭšy jaje pamiž svaich noh padčas zdymak filma. Pry hetym jon rabiŭ adkryta seksualnyja zaŭvahi.
Sam Depardjo admaŭlaje, što heta było hvałtam, i śćviardžaje, što ŭsie hrubyja kamientary, jakija jon vykazvaŭ, byli vyklikanyja kiepskim nastrojem.
«Ja schapiŭ jaje za ściohny, kab nie paśliznucca, bo byŭ zasmučany: z-za jaje, z-za śpioki, heta była piatnica, kaniec zdymačnaha tydnia, ja vielmi stamiŭsia», — zajaviŭ Depardjo.
«Ja nie razumieju, navošta mnie łapać žančynu», — skazaŭ jon u sudzie i dadaŭ, što na toj momant byŭ u takoj stupieni zališnie važki, što niekatoryja dziejańni, u jakich jaho abvinavačvajuć — naprykład, zacisnuć Ameli K. pamiž noh, — byli b prosta fizična niemahčymymi.
76-hadovaja zorka francuzskaha kino ŭ apošnija hady sutykajecca z usio bolšaj kolkaściu abvinavačańniaŭ u sieksualnym hvałcie.
Sudovy praces nad im raskałoŭ francuzskuju akciorskuju supolnaść. Častka kalehaŭ vystupiła ŭ jaho padtrymku i, jak čakajecca, daść pakazańni na pracesie, inšyja ž — na baku paciarpiełych.
U paniadziełak kala budynka paryžskaha suda sabralisia niekalki dziasiatkaŭ pratestoŭcaŭ. Šmat chto trymaŭ płakaty ŭ padtrymku achviaraŭ seksualnaha hvałtu i skandavaŭ fieminisckija łozunhi.
Depardjo paśladoŭna admaŭlaŭ usie abvinavačvańni — u tym liku i ŭ adkrytym liście, apublikavanym u francuzskaj haziecie Le Figaro ŭ 2023 hodzie.
«Pryčynić škodu žančynie — heta toje ž samaje, što ŭdaryć maju maci ŭ žyvot», — napisaŭ tady akcior.
Kamientary