«Rychtavacca da najhoršaha»: Makron zajaviŭ, što ŭ Paryžy abmiarkoŭvali płany padtrymki Ukrainy biez ZŠA
U Paryžy prajšoŭ samit «kaalicyi achvotnych», arhanizavany prezidentam Francyi Emanuelem Makronam i premjer-ministram Vialikabrytanii Kiram Starmieram. Sustreča była pryśviečanaja, miž inšym, pytańniam harantyj dla Ukrainy ŭ vypadku zaklučeńnia mirnaha pahadnieńnia z Rasijaj, piša Bi-bi-si.
Makron pa vynikach samitu zajaviŭ, što jaho ŭdzielniki pahadzilisia praciahvać padtrymlivać Ukrainu i jaje armiju, a taksama paabiacaŭ praciahvać cisk na Rasiju i jaje cieniavy fłot tankieraŭ.
Akramia taho, pavodle słoŭ prezidenta Francyi, na pasiadžeńni było vyrašana daručyć kiraŭnikam MZS krain — udzielnic kaalicyi na praciahu troch tydniaŭ padrychtavać prapanovy pra toje, jak možna było b kantralavać spynieńnie ahniu va Ukrainie.
Taksama Makron zajaviŭ, što va Ukrainu budzie nakiravanaja franka-brytanskaja delehacyja vajskoŭcaŭ dla pracy z USU «dla płanavańnia ich budučyni».
Havoračy pra mahčymyja miratvorčyja siły, Makron zajaviŭ, što jany ŭsio jašče znachodziacca na stadyi farmavańnia. Prezident Francyi znoŭ zapeŭniŭ, što jany nie buduć znachodzicca na linii sudakranańnia, a nieabchodnyja jak instrumient «strymlivańnia» paśla zaklučeńnia pieramirja. Adkazvajučy na pytańnie žurnalista ź ispanskaha ŚMI pra słovy śpiecpradstaŭnika ZŠA Styva Uitkafa pra toje, što adpraŭka miratvorčych vojskaŭ va Ukrainu była b «absurdnaj», Makron zajaviŭ, što Jeŭropa pavinna być hatovaja dziejničać «zusim samastojna».
«Budziem spadziavacca na lepšaje i rychtavacca da najhoršaha», — dadaŭ prezident Francyi.
Pavodle jaho słoŭ, Jeŭropa chacieła b padtrymki svaich inicyjatyŭ z boku ZŠA, ale kali hetaha nie adbudziecca, nielha skazać, što Jeŭropa ničoha nie zrobić.
Pry hetym Makron padkreśliŭ, što ZŠA źjaŭlajucca «nadziejnym sajuźnikam» i vielmi padtrymlivajuć Ukrainu z momantu poŭnamaštabnaha ŭvarvańnia Rasii. Paśla pieramovaŭ u Saudaŭskaj Aravii ZŠA i Ukraina zajavili, što bakam udałosia ŭzhadnić pieramirje na Čornym mory. Adnak Rasija zajaviła, što pojdzie na heta tolki paśla źniaćcia častki sankcyj. Prezident Francyi Emanuel Makron zajaviŭ, što ŭdzielniki samitu pahadzilisia, što sankcyi z Rasii zdymać jašče rana.
Premjer-ministr Vialikabrytanii Kir Starmier paśla zaviaršeńnia samitu zajaviŭ, što «zaraz nie čas dla źniaćcia sankcyj, a zusim naadvarot».
Prezident Ukrainy Uładzimir Zialenski padziakavaŭ premjeru Vialikabrytanii i Francyi za ich padtrymku i padkreśliŭ, što nijakija sankcyi nie pavinny być admienieny, pakul Rasija nie spynić vajnu.
Kancler Hiermanii Ołaf Šolc taksama vystupiŭ suprać źmiakčeńnia antyrasijskich sankcyj. Pa vynikach samitu ŭ Paryžy jon zajaviŭ, što admiena sankcyj suprać Rasii ŭ dadzieny momant budzie «surjoznaj pamyłkaj».
Pavodle jaho słoŭ, «niama nijakaha sensu zdymać sankcyi, pakul nie budzie dasiahnuty mir».
«Na žal, my ŭsio jašče dalokija ad hetaha», — dadaŭ Šolc.
Prezident Ukrainy Uładzimir Zialenski na pasiadžeńni samitu taksama zajaviŭ, što, pavodle jaho infarmacyi, Rasija ciapier rychtujecca da novych nastupaŭ na troch napramkach.
«Pavodle dadzienych našaj raźviedki, Rasija rychtujecca da novych nastupaŭ na Sumskuju, Charkaŭskuju i Zaparožskuju vobłaści. Jany zaciahvajuć pieramovy i sprabujuć uciahnuć ZŠA ŭ biaskoncyja biessensoŭnyja dyskusii pra falšyvyja «ŭmovy», kab vyjhrać čas, a potym pasprabavać zachapić jašče bolš ziamiel», — skazaŭ Zialenski.
Jon taksama zaklikaŭ jeŭrapiejskich lidaraŭ raspracavać kankretny ahulny płan razhortvańnia sił krain-partnioraŭ va Ukrainie.
«Nam patrebien adzin dakładny płan, ź jakim my ŭsie pahodzimsia i jaki pačniom uvasablać u žyćcio na asnovie tych varyjantaŭ, što ŭžo byli abmierkavanyja z vami i dastupnyja dla vas», — prapanavaŭ jon.
Ciapier čytajuć
U Kijevie za špijanaž aryštavali biełaruskuju žurnalistku Inu Kardaš. Kažuć, z 2015 hoda jana pracavała na KDB19
Kamientary
Na vidavoku zrazumieła Tramp - k° Štaty pry im buduć słuchać pierakazvać majsy bajki cara horocha vładzimira sołomona Praz 4 hady kiravańnia ZŠA " ni ačuniajut"
Zdolnyja ?? Pabačym