Maršrutčyk hadami padmanvaŭ davierlivych žančyn i vyciahnuŭ ź ich amal 70 tysiač rubloŭ
48-hadovy žychar Maładziečanskaha rajona šmat hadoŭ pracavaŭ kiroŭcam maršrutki «Minsk-Niaśviž-Kleck-Siniaŭka», a paralelna prajaviŭ siabie jak sapraŭdny majstar uździejańnia na ludskija pačućci. U vyniku jaho achviarami stali piać davierlivych žančyn, jakija ahułam stracili amal 70 tysiač rubloŭ, paviedamlaje Śledčy kamitet.
Historyja pačałasia amal 10 hadoŭ tamu, u 2016 hodzie. Kiroŭca maršrutki, jaki vyklikaŭ davier da siabie źniešnaściu i padviešanym jazykom, mahična ŭździejničaŭ na niekatorych pasažyrak. Jon pradstaŭlaŭsia im byłym śviatarom, raskazvaŭ pra trahičnuju hibiel siamji ŭ aŭtakatastrofie, a taksama pra svaju hanarovuju misiju — dabračynnuju dziejnaść u dziciačym chośpisie ŭ Baraŭlanach.
Paśla raskazvańnia hetych historyj afłajn kamunikacyja pierachodziła ŭ virtualnuju prastoru. Padčas pierapisak kiroŭca prajaŭlaŭ uvahu i kłopat, pryznavaŭsia ŭ simpatyjach i navat lubovi, ale nikoli nie pierachodziŭ miežy dazvolenaha. A paśla pačynalisia prośby ab finansavaj dapamozie: to na pachavańnie dziciaci z chośpisa, to na terminovuju apieracyju baćku ŭ Hiermanii, to na reabilitacyju ŭsio taho ž svajaka ŭ Maskvie.
Davierlivyja žančyny addavali machlaru apošniaje. Adna z achviar, žančyna z mužam-invalidam i dvuma niepaŭnaletnimi dziećmi, straciła bolš za 16 tysiač dalaraŭ, druhaja addała ŭsie svaje aščadžeńni, nazapašanyja hadami, — 7500 dalaraŭ ZŠA — na «ramont aŭtamabila». Treciaja aformiła na svajo imia kredytnuju kartu «Chałva» i pieradała jaje mužčynu. Paśla joj pryjšłosia załazić u daŭhi, kab raźličycca z bankam.
Čaćviortaj žančynie ašukaniec pieradaŭ prośbu ab dapamozie ad imia jaje byłoha sužyciela, pierakonvajučy žančynu sabrać bujnuju sumu. Paśla hetyja hrošy byli addadzienyja jak zadatak za dom, jaki mužčyna źbiraŭsia kupić u hetaha samaha sužyciela.
Apošniaj paciarpiełaj jon raskazaŭ pra płany adkryć svoj maršrut, ale dla realizacyi biznesu nie chapała hrošaj na kuplu mikraaŭtobusa. Žančyna pavieryła i ŭziała dla jaho kredyt u banku na 5800 rubloŭ. Pieršyja miesiacy mužčyna spraŭna płaciŭ pracenty, a potym źnik, pakinuŭšy jaje sam-nasam z abaviazkam.
Kali machlarskija schiemy raskrylisia, pradprymalny maršrutčyk sprabavaŭ schavacca i niejki čas jamu heta paśpiachova ŭdavałasia. Adnak u śniežni 2024 hoda šancavać jamu pierastała. Adnojčy ŭviečary, padčas zvyčajnaj pravierki dakumientaŭ, jahony aŭtamabil byŭ spynieny supracoŭnikami DAI. Mužčynu zatrymali i pieradali śledčym orhanam.
Usiaho ŭ jahonyja ašukanskija sietki trapili 5 žančyn, machlar zavałodaŭ ich hrašyma na ahulnuju sumu zvyš 68 tysiač rubloŭ. Hrošy jon traciŭ na arendu kamfartabielnaha žylla, kuplu darahich hadžetaŭ, absłuhoŭvańnie prestyžnaha aŭtamabila i ŭvohule niabiednaje isnavańnie.
Dziejańni 48-hadovaha kiroŭcy maršrutki kvalifikavanyja śledčymi Niaśvižskaha rajonnaha adździeła Śledčaha kamiteta pa č. 4 art. 209 (machlarstva, ździejśnienaje ŭ asabliva bujnym pamiery) Kryminalnaha kodeksa Biełarusi.
Ciapier čytajuć
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary
[Zredahavana]