Jak prachodzić ujezd u Łatviju pa novych praviłach. Raskazvajuć vidavočcy

Nahadajem: z 1 vieraśnia 2025 hoda biełarusam (i hramadzianam niekatorych inšych krain), jakija nie majuć łatvijskaj vizy ci DNŽ Łatvii, nieabchodna pierad pajezdkaj u krainu zapoŭnić elektronnuju ankietu. Jak heta zrabić, my pisali raniej.

U pamiežnych čatach nazirajecca niervovaść. Niekatoryja vandroŭniki čakajuć, što im pryjdzie list z adnaznačnym adkazam: dazvalajuć im ujechać u Łatviju ci nie. Ale sistema pracuje inačaj.

Paśla zapaŭnieńnia ankiety nieabchodna dačakacca dvuch listoŭ na elektronnuju poštu. Pieršy pryjdzie amal adrazu: jon prosta paćvierdzić, što ankieta padadziena. Tam ža na ŭsialaki vypadak paznačana: kab vypravić pamyłku ŭ adpraŭlenaj ankiecie, treba zapoŭnić novuju — unieści źmieny ŭ pieršuju niemahčyma.

Druhi list pavinien pryjści ciaham 48 hadzin. U im budzie paćviardžeńnie, što elektronnaja dekłaracyja zarehistravana, i jaje numar. Hety numar treba zachavać, kab mieć pry sabie.

Pavialičyć

U liście taksama paznačana: «Źviarnicie ŭvahu, što dekłaracyja maje vyklučna infarmacyjny charaktar i nie źjaŭlajecca dazvołam na ŭjezd». Mienavita heta fraza i pužaje ludziej.

Ale treba razumieć: i raniej šenhienskaja viza nie harantavała, što vas abaviazany pavinny puścić u krainu. Kančatkovaje rašeńnie prymaŭ pamiežnik — jon mieŭ prava admović, kali, naprykład, ličyŭ, što realnyja mety pajezdki nie supadajuć z tymi, pad jakija vizu vydavali.

Paśla taho, jak vy atrymali druhi list ź infarmacyjaj pra rehistracyju dekłaracyi, možna jechać u Łatviju.

Pakul, jak pišuć u pamiežnych čatach, prablem praz dekłaracyju nie ŭźnikaje.

U tych, chto zajazdžaŭ u Łatviju ź inšych krain Jeŭrasajuza, pra dekłaracyju nie pytalisia. Ale paviedamlacca, što niekatoryja pieravozčyki dasyłajuć biełarusam, jakija nabyli kvitki, naprykład, ź Vilni ŭ Ryhu, napamin pra nieabchodnaść zapoŭnić svoječasova ankietu.

Na miažy Biełarusi i Łatvii pra ankietu pytajucca, ale pakul taksama ŭsio davoli miakka. «Pra dekłaracyju tolki spytali, zapaŭniali ci nie», — napisaŭ adzin z udzielnikaŭ tematyčnaha čata.

Inšy raspavioŭ, što łatvijskija pamiežniki pry im prapuskali navat tych, chto zapoŭniŭ ankietu ŭsiaho za try hadziny da płanavanaha ŭjezdu: «Ale na mytni skazali, što tolki ciapier prapuściać, bo pastanaŭleńnie tolki nabyło moc i idzie prycirka prahramy. Ale, pa słovach pamiežnicy, dalej abaviazkova treba budzie zapaŭniać za 48 hadzin i raniej pierad kožnym pierasiačeńniem. U inšym vypadku — niepadačy ci niezapaŭnieńnia — budzie administratyŭka».

Raniej paviedamlałasia, što čałavieka, jaki nie zapoŭniŭ elektronnuju dekłaracyju, moža čakać štraf da 2000 jeŭra i departacyja. 

• 3
• 5
• 1
• 10
• 0
• 1
• 0
• 1