Lavončyk pra Mielnikavu: Jość infarmacyja adnosna jaje mahčymaha maršrutu
Suzasnavalnik fondaŭ By_Help i Bysol Alaksiej Lavončyk havoryć, što maje peŭnuju infarmacyju pra maršrut źnikłaj śpikierki Kaardynacyjnaj rady Anžaliki Mielnikavaj u Vialikabrytanii. «Biełsat» raspytaŭ u Lavončyka, jak iduć pošuki i kolki hrošaj atrymałasia naźbirać na źviestki pra Mielnikavu.
Alaksiej Lavončyk adznačaje, što papiarednija źviestki polskaha boku śviedčać, što Anžalika Mielnikava vylecieła ŭ Vialikabrytaniju. Tamu razam ź nievialikaj kamandaj jon sprabuje zrazumieć, kudy jana dalej mahła ruchacca adtul.
«U nas jość infarmacyja adnosna jaje mahčymaha dalejšaha maršrutu, ale jana na ŭzroŭni «skazała davieranaja krynica, ale niama nijakich dokazaŭ hetamu». Tamu my nie budziem pakul davać hetuju infarmacyju, kab nie było śpiekulacyj», — raskazvaje Lavončyk.
Ciapier jon sprabuje atrymać infarmacyju pra Mielnikavu praz znajomych i svajakoŭ, jakija žyvuć u Vialikabrytanii.
«Sprabujem zrazumieć, moža, jana znachodzicca niedzie tam. Ale heta pryvatnaja inicyjatyva, tamu jana vielmi marudna ruchajecca.
I my sprabujem zachavać hramadskuju ŭvahu, jakaja ŭžo pryciahnutaja da hetaj temy. Tamu ja padaŭ dźvie zajavy ŭ Brytanii na vyšuk Anžaliki. Ci buduć jany pryniatyja i ci budzie sapraŭdny vyšuk, nieviadoma, ale my budziem sprabavać pryciahnuć uvahu jašče i brytanskich žurnalistaŭ da hetaj spravy. I tut treba ŭžo źviartać uvahu na heta jak na hramadskuju prablemu. Bo asoba, jakaja źjaŭlajecca nie apošniaj u demakratyčnym ruchu, źnikaje i pavodle ŭskosnaj infarmacyi, jakuju padajuć palaki, źnikaje ŭ Brytanii, bo ŭ Brytanii jaje śled hublajecca», — adznačaje Lavončyk.
Raniej jon abviaściŭ hrašovuju premiju dla tych, chto moža padać dakładnuju infarmacyju ab Mielnikavaj.
«Heta hrošy jakija źbirajucca biełarusami anłajn. Jany buduć padvojenyja adnym pryvatnym donaram, ź jakim u mianie jość damoŭlenaść i jaki maje karani ŭ Biełarusi i vielmi cikavicca biełaruskaj tematykaj. Finalnuju sumu my abvieścim na dniach i budziem spadziavacca, što z vyniku my atrymajem niejkuju infarmacyju.
U nas było 2900 jeŭra na kaniec minułaha tydnia. Heta aznačaje, što ŭ nas 5800 jeŭra z ulikam padvajeńnia. My chacieli zakryć zbor u paniadziełak, ale ja spadziajusia, što my možam sabrać bolš hrošaj, kab heta była bolš važkaja ličba, kab čałaviek, jaki vałodaje niejkaj infarmacyjaj, ale, moža, baicca jaje raskryć, mieŭ bolšuju finansavuju matyvacyju», — kaža Lavončyk.
Jon miarkuje, što ź Mielnikavaj stałasia niešta drennaje — ci jaje zabili, ci šantažujuć biełaruskija śpiecsłužby. Ale naŭrad ci jana ŭ źniavoleńni ŭ Biełarusi.
«Što śviedčyć pra toje, što jaje ŭ ich u rukach niama — kali jana źnikła, prapahandysckija kanały stali publikavać pasty z namiokami «chutka ŭsio daviedajeciesia» i pościć jaje zdymki nibyta z dopytu, ale heta byli fota «Biełsata». Uličvajučy, što prapahandysty vielmi lubiać vykładać infarmacyju, kali jana ŭ ich jość, to jany b chutčej za ŭsio vykłali jaje aktualnaje fota», — kaža Lavončyk.
Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.
7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.
8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.
10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma.
14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.
Hubarevič zaniaŭ adnu z pasad Mielnikavaj u KR, ale śpikieram nie staŭ. Piatruchin aburany biezalternatyŭnym hałasavańniem
Łukašenka prakamientavaŭ źniknieńnie Anžaliki Mielnikavaj
«My jamu daviarajem». Čamu źnikłuju Mielnikavu zamianiŭ mienavita eks-vajskoviec Paciechin?
U fondu, kudy prychodzili hrošy dla Kaardynacyjnaj rady, źjaviŭsia novy kiraŭnik zamiest źnikłaj Mielnikavaj
Ci pahražaje ŭzłom akaŭnta Mielnikavaj tym, chto hałasavaŭ na vybarach u Kaardynacyjnuju radu? Adkazvaje Libier
Kamientary