Pahladzicie, jak raskošna žyła Bondarava ŭ stalicy za 30 rubloŭ. Ciapier nie budzie
Paśla adličeńnia z univiersiteta Volha Bondarava straciła i prava na pakoj u studenckim internacie. Danosčycy, jakaja chvaliłasia sacyjalnymi pryvilejami, što davała joj dziaržava, ciapier daviadziecca šukać novaje miesca žylla.
U 2022 hodzie danosčyca pastupiła na fiłałahičny fakultet Biełaruskaha dziaržaŭnaha piedahahičnaha ŭniviersiteta, dzie da apošniaha času vučyłasia na biudžecie na dzionnym adździaleńni pa śpiecyjalnaści «Biełaruskaja mova i litaratura». Pry zaličeńni žycharka Hrodna atrymała miesca ŭ internacie, jaki raźmiaščajecca ŭ studenckaj vioscy ŭ Piatroŭščynie.
26 sakavika 2025 hoda Bondarava była asudžana na 13 sutak administracyjnaha aryštu pavodle «ekstremisckaha» artykuła. Jak paviedamili «Lusterku» ŭ dekanacie fiłfaka BDPU, danosčycu, jakaja dva tydni praviała na Akreścina, adličyli z univiersiteta.
Heta značyć, što jana aŭtamatyčna straciła prava na miesca ŭ studenckim internacie i budzie vymušanaja abo šukać novaje žytło ŭ stalicy, abo viarnucca ŭ Hrodna.
Raniej Volha Bondarava žyła ŭ vielmi kamfortnych umovach, jakija abychodzilisia joj usiaho ŭ 30 rubloŭ za miesiac (tak jana raskazvała ŭ 2022-m), i navat chvaliłasia svaim žytłom u videaroliku na svaim jutub-kanale. Źniać rolik pra svoj internat jaje padšturchnuła videa, u jakim krytykavalisia tyja ŭmovy, što prapanujucca inšaharodnim studentam.
«Biesić. Biesić hetaje zmaharjo, što pastajanna ŭsim niezadavolenaje, pastajanna šukaje, da čaho pryčapicca, da samych drobiaziaŭ. Nie padabajecca tut, u Biełarusi — čamadan, vakzał, Lvoŭ. Ci Varšava. Ci Vilnia. Žyvicie tam, płacicie nie 30 rubloŭ u miesiac za internat, a 300 jeŭra», — aburałasia danosčyca na čužyja skarhi.
«Ja chaču pakazać svoj pakoj, dzie ja žyvu. U mianie niama nijakich suviaziaŭ — ja prosta pryjechała, pastupiła i pasialiłasia».
Volha Bondarava pakazała prastornyja kalidory svajho internata i ŭtulny błok na dva pakoi z ułasnaj kuchniaj, tualetam i vannym pakojem. Na źmiejeviku ŭ vannym pakoi ŭ jaje sušyŭsia łaźnievy ručnik z emblemaj AMAPa.
Danosčyca była zadavolenaja dalikatnym ramontam i tym, što ŭ błoku pry zasialeńni ŭžo była ŭsia patrebnaja abstanoŭka i technika, u tym liku chaładzilnik na kuchni.
«Usio prosta cudoŭna. Jašče raz paŭtarusia: heta nie za šalonyja hrošy, heta ŭsio — častka dziaržaŭnaj sistemy abarony studentaŭ».
«Dziaržava robić maksimum z taho, na što, napeŭna, zdolnaja, i nie prymušaje brać kredyty na adukacyju. Nie — dziaržava daje biaspłatnuju adukacyju. Dziaržava daje mahčymaść atrymać i dadatkovuju adukacyju, i prafaryjentacyju, i prapanuje zabaŭlalnyja prahramy, plus vialikija źnižki dla studentaŭ, vielmi šmat paznavalnych mierapryjemstvaŭ, roznych kanfierencyj, kruhłych stałoŭ, konkursaŭ», — śćviardžała Bondarava.
Razžałavanaja kamunistka nie ŭličyła, što ŭsie jaje staličnyja dabroty i sacyjalnyja pryvilei apłačany dziaržavaj z kišeni padatkapłacielščykaŭ, bolšaść ź jakich, miarkujučy pa 2020 hodzie, źjaŭlajucca tymi sami «zmaharami», jakija vystupajuć suprać režymu Łukašenki i jakich tak šalona nienavidzić sama Bondarava.
Bondarava na svajoj škury źviedała, jak lohka ŭ biełaruskaj byccam by sacyjalnaj sistemie stracić usio. Ni ŭ Varšavie, ni ŭ Vilni nie isnuje «ekstremisckich materyjałaŭ», za łajk ci repost jakich možna trapić na sutki, jak nie isnuje i praktyki adličeńnia za administracyjnyja pravaparušeńni. U Biełarusi ž ty nie maješ nijakich harantyj, navat kali šmat hadoŭ vykazvaješ svaju łajalnaść režymu.
«Naša Niva» — bastyjon biełaruščyny
PADTRYMAĆ-
Italjaniec pierajechaŭ u biełaruskuju viosku i pačaŭ piačy sapraŭdnuju picu na drovach
-
«90 čałaviek vyhnali pad piakučaje sonca i trymali tam try hadziny. Ja paŭtarała tolki adnu malitvu: niachaj im usio vierniecca»
-
Ci chopić sioleta €2000, kab adpačyć na mory? Što adbyvajecca z cenami na letni adpačynak
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary
Chutčej za ŭsio jana pryvałakła jaho z saboj. Z łaźni. Dzie jaki-niebudź amapaviec joj addaŭ svoj ručnik.
Što na heta skaža jaje muž?