Byłoha kamandujučaha 58-j hvardziejskaj armijaj Ivana Papova sud pryznaŭ vinavatym u machlarstvie i prysudziŭ jaho da piaci hadoŭ kałonii i štrafu ŭ pamiery 800 tysiač rasijskich rubloŭ (kala 10 tysiač dalaraŭ). Jaho taksama pazbavili hienieralskaha zvańnia.
Ivana Papova sudzili pa abvinavačvańni ŭ machlarstvie sa słužbovym padłoham.
Jaho zatrymali 17 maja 2024 hoda — spačatku Papova aryštavali, u lipieni jaho pieraviali pad chatni aryšt. Pa viersii śledstva, hienierał pradaŭ 1700 ton mietałavyrabaŭ na sumu zvyš 130 młn rasijskich rubloŭ (kala 1,5 młn dalaraŭ), jakija pryznačalisia dla budaŭnictva ŭmacavańniaŭ na Zaparožskim kirunku.
Dziaržabvinavačańnie prasiła pazbavić Ivana Papova voli na termin 6 hadoŭ. Vinu Papoŭ nie pryznaŭ. Były kamandujučy 58-j armijaj prasiŭ zamianić jamu turemny termin słužbaj na vajnie z Ukrainie, adnak dazvołu pakul nie atrymaŭ.
U 2023 hodzie Papoŭ kamandavaŭ 58-j ahulnavajskovaj armijaj Paŭdniovaj vajennaj akruhi i kiravaŭ rasijskaj abaronaj na Zaparožskim napramku. Hienierała spačatku pachvalili za adbivańnie kontrudaru ŭkrainskaj armii, a zatym raptoŭna źniali.
Tady ž u sietcy źjaviŭsia zapis razmovy Papova z sasłužyŭcami. Na aŭdyja rasijski hienierał zajaviŭ, što jaho źniali za «praŭdu». Pa jaho słovach, jon raspavioŭ načalniku Hienštaba Valeryju Hierasimavu ab prablemach z zabieśpiačeńniem i paskardziŭsia na adsutnaść ratacyi vajskoŭcaŭ na pieradavoj. Hierasimaŭ u adkaz nibyta abvinavaciŭ Papova ŭ panikiorstvie i paabiacaŭ dałažyć pra razmovu Uładzimiru Pucinu.
Papova spačatku pieraviali ŭ Siryju, a ŭ mai 2024 hoda zatrymali.
Ivan Papoŭ byŭ vielmi papularny ŭ rasijskaj armii, jon byŭ patencyjna zdolny ŭznačalić armiejskuju apazicyju režymu Pucina.
Kamientary