Na abied padała atrutnyja hryby. Žančynu ŭ Aŭstralii sudziać za zabojstva traich svajakoŭ
Aŭstralijka, jakuju abvinavačvajuć u pryhatavańni atručanaha abiedu, pryznała, što źbirała dzikija hryby, chłusiła palicyi i źniščyła dokazy. Pra heta zajavili ŭ sudzie horada Morvieł, piša Bi-bi-si — Ukraina.
U Viarchoŭnym sudzie štata Viktoryja raspačaŭsia sudovy praces nad 50-hadovaj Eryn Patersan. Jaje abvinavačvajuć u pryhatavańni stravy z atrutnymi hrybami, što pryviało da śmierci ludziej. Adnačasova abarona nastojvaje, što hetaja «trahiedyja» była prosta «žudasnym niaščasnym vypadkam».
Eryn Patersan abvinavačvajuć u zabojstvie traich svajakoŭ i zamachu na zabojstva jašče adnaho čałavieka. Abvinavačańnie miarkuje, što ŭ siabie doma ŭ lipieni 2023 hoda Eryn pryhatavała abied, na jakim naŭmysna atruciła ludziej. Heta zdaryłasia, kali žančyna pryhatavała kłasičnuju stravu brytanskaj kuchni ź jałavičynaj i hrybami — Bif-vielinhtan.
Spadarynia Patersan nie pryznaje viny. Jaje advakaty zajaŭlajuć, što jana «panikavała», kali vypadkova nakarmiła atručanaj stravaj ludziej, «jakich ščyra lubiła».
Hetaja historyja pačałasia z taho, što Hejł i Don Patersany pryjechali naviedać svaich unukaŭ i zastalisia na abied u domie svajoj niaviestki Eryn Patersan u miastečku Leanhata — za dźvie hadziny jazdy na paŭdniovy ŭschod ad Mielburna.
Ź imi była siamja Uiłkinsanaŭ — Chizer (siastra Hejł) i jaje muž Ien.
Usie čaćviora — pavažanyja členy supolnaści susiedniaha miastečka Karumabura, dzie Ien słužyć pastaram u miascovaj baptysckaj carkvie.
Na praciahu niekalkich dzion paśla abiedu ŭ balnicy pamierli: byłyja śviokry Patersan — Don i Hejł Patersany, abodvum było pa 70 hadoŭ, a taksama siastra Hejł — Chizer Uiłkinsan, joj było 66 hadoŭ.
Adziny, chto vyžyŭ paśla abiedu, — miascovy pastar i muž Chizer — Ien Uiłkinsan. Jaho lačyli ŭ balnicy niekalki tydniaŭ.
U sudzie adznačyli, što niama sumnievaŭ u tym, što ŭ stravie Bif Vielinhtan byli atrutnyja hryby (muchamory śmiertanosnyja) i mienavita jany stali pryčynaj atručvańnia i śmierci haściej.
Sudździa Krystafier Bił patłumačyŭ: «Klučavoje pytańnie, ci sapraŭdy jana mieła namier zabić abo pryčynić vielmi ciažkuju škodu».
Prakurorka Nanet Rodžers adkryła sudovy praces zajavaj, što spačatku spravu razhladali jak masavaje charčovaje atručvańnie.
Adnak, bok abvinavačańnia nastojvaje, što nasamreč Patersan «naŭmysna atruciła» haściej z namieram ich zabić. Jana zaprasiła haściej pad vyhladam taho, što ŭ jaje vyjaŭleny rak. Jana vydumała chvarobu, ustanaviŭ sud.
Nanet Rodžers paviedamiła, što Eryn Patersan sama chadziła pa dzikija hryby pablizu svajho doma ŭ Leanhacie. U hetym miescy, pavodle dadzienych pryrodaznaŭčaha sajta, raśli śmiertanosnyja hryby. A paśla abiedu, śćviardžaje abvinavačańnie, jana chacieła schavać ślady.
U pryvatnaści, jana nibyta zmaniła palicyi pra pachodžańnie hryboŭ, zajaviŭšy, što kupiła ich u azijackaj kramie ŭ Mielburnie i nikoli nie źbirała dzikija hryby.
Taksama, pavodle viersii abvinavačańnia, jana vykinuła sušyłku dla ježy, jakuju vykarystoŭvała dla pryhatavańnia stravy.
«Vy možacie spytać: «Jaki matyŭ?» Mahčyma, navat paśla zakančeńnia suda my nie daviedajemsia adkaz», — zajaviła prakurorka.
Jana patłumačyła, što abvinavačańnie nie abaviazana dakazvać najaŭnaść matyvu.
Čakajecca, što śviedčańni daduć: pastar, jaki vyžyŭ — Ien Uiłkinsan, były muž abvinavačanaj Sajman Patersan, miedyki, jakija lačyli haściej, i palicejskija.
Abarona, adkryvajučy svaju spravu, nahadała prysiažnym, što jany pakul nie pačuli nivodnaha dokazu, i zaklikała zachoŭvać niepraduziataść.
Advakat Kolin Miendzi adznačyŭ, što pavodziny Eryn Patersan paśla abiedu nie varta adnaznačna traktavać jak dokaz viny: «Ci mohuć ludzi niešta skazać abo zrabić u panicy, što vyhladaje drenna?».
«Pazicyja abarony — jana zapanikavała, bo była ašałomlenaja tym, što čatyry blizkija ludzi ciažka atrucilisia ježaj, jakuju jana pryhatavała. Troje pamierli», — adznačyŭ advakat.
Pavodle jaho słoŭ, Patersan nie mieła namieru nikoha atrucić.
«Jana nie žadała nikomu zła. Toje, što adbyłosia, — trahiedyja, žudasny niaščasny vypadak», — ličyć juryst.
Prakuratura taksama ŭpieršyniu na sudzie raskazała pra padziei, što papiaredničali abiedu.
U 2023 hodzie Patersan była ŭ pracesie razvodu z mužam Sajmanam Patersan, jaki prachodziŭ davoli mirna.
Sajman jašče niejki čas spadziavaŭsia na prymireńnie. Jon chacieŭ pryjści na abied, ale ŭ apošni momant admoviŭsia. Mužčyna śćviardžaje, što adčuŭ źmienu ŭ adnosinach z byłoj žonkaj i peŭny dyskamfort u znosinach.
Heta zasmuciła Patersan, jakaja padkreśliła, što prykłała šmat namahańniaŭ da pryhatavańnia abiedu.
U sudzie paviedamili, što Patersan padavała haściam ježu na šerym posudzie, a sabie — na inšaj, karyčnieva-aranžavaj talercy. Adzin z haściej navat spytaŭ, ci chapaje ŭ jaje posudu.
Paśla malitvy i žartaŭ padčas trapiezy hości pačali havaryć pra toje, jak Eryn mieła b raspavieści dzieciam pra «rak». Nasamreč chvoraj jana nie była.
Paśla abiedu ŭžo toj ža nočču ŭsim haściam stała błaha. Na praciahu sutak usie čaćviora trapili ŭ balnicu ź ciažkimi simptomami.
Donald Patersan, jaki źjeŭ svaju porcyju i častku porcyi žonki, skazaŭ lekaru, što jaho vanitavała 30 razoŭ za niekalki hadzin.
Siamja Uiłkinsanaŭ pytałasia, ci Eryn Patersan taksama ŭ balnicy, bo jana jeła toje samaje. Jana prychodziła, skardziłasia na samaadčuvańnie, ale nie pahadžałasia na špitalizacyju.
Adzin z daktaroŭ, zaniepakojeny jaje stanam, navat źviarnuŭsia ŭ palicyju.
Taksama adznačałasia, što Patersan admaŭlałasia vieści dziaciej da lekara, chacia jany jeli reštki miasa — praŭda, hryby, pavodle jaje słoŭ, adtul zabrali.
«U mnohich ludziej mohuć być dumki abo zdahadki, ale jany nie hruntujucca na dokazach», — zajaviŭ abaronca, źviartajučysia da prysiažnych.
Kamientary