«Этэрнаўт»: аргенцінскі Netflix выпусціў шматзначны серыял пра апакаліпсіс

Апошнім часам кіношнікаў цягне на тэму апакаліпсісу. Поўнаметражкі накшталт «Ціхае месца: Дзень першы», серыялы «Апошнія з нас» і «Сховішча» — толькі фрагменты вялікага трэнду, які нарадзіўся праз пандэмію і кліматычны крызіс.

Ва ўсіх развагах пра апакаліпсіс Аргенціна звычайна выглядае шчаслівым выключэннем. Яна далёка ад ядзерных краін, вырошчвае шмат збожжа, не ўдзельнічае ў канфліктах, мае багата вады і файны клімат — каму выжываць, як не ім?

І тым не менш, «Этэрнаўт» (El Eternauta), новы серыял ад Netflix, якраз апавядае пра апакаліпсіс у Аргенціне, ды яшчэ і робіць гэта захапляльна. Крытыкі ўжо ацанілі: напрыклад, на буйной кінаплатформе IMDb серыял мае рэйтынг 7,7 балаў з 10, а на сайце Rotten Tomatoes «Этэрнаўт» набраў 93% ухвалення ад крытыкаў.

У цэнтры гэтай гісторыі знаходзіцца Хуан Сальва, звычайны жыхар Буэнас-Айрэса, які бавіць час увечары разам з сябрамі. На двары лета, але ў горадзе раптоўна распачынаецца вялікі снегапад. Хуан з сябрамі бачаць у вокны — кожны, хто трапляе пад снег без абароны, гіне за хвіліну. 

Застаецца замкнуцца дома, але як гэта рабіць, калі запасы хутка скончацца і недзе там, у горадзе, засталіся блізкія? Хуан надзявае процігаз і выбіраецца ў горад, дзе знаходзіць іншых жывых.

Павялічыць

Павялічыць

Аргенцінцы, якія перажылі апакаліпсіс, даведваюцца, што гэта толькі пачатак новага жыцця, і дапамогі не будзе. Компасы перастаюць працаваць, то-бок магнітнага поля Зямлі больш няма, і снег не спыняецца. Тым часам людзі за лічаныя гадзіны ператвараюцца ў ворагаў адно аднаму, бо чаго не зробіш дзеля выжывання?

Сапраўдныя ворагі, аднак, з’явяцца бліжэй да сярэдзіны серыяла. Гэта іншапланетнікі — снегапад быў толькі пачаткам іх уварвання на Зямлю. І тут асобны дзякуй стваральнікам «Этэрнаўта» за тое, што не ператварылі гэтую гісторыю ў стэрэатыпнае апавяданне пра монстраў з комікса, у цэнтры серыяла застаюцца людзі і іх пачуцці.

«Этэрнаўта» знялі па аднайменным коміксе канца 50-х, які атрымаў статус культавага ў Лацінскай Амерыцы. Яшчэ тады – і асабліва пазней, калі ў Аргентыне ўсталявалася дыктатура — комікс зрабіўся сімвалам барацьбы з аўтарытарызмам. 

Бо што робіць Хуан? Гэта не супергерой з амерыканскім пашпартам у стылі Бруса Уіліса, які ратуе ўсю планету. Гэта просты чалавек, такі ж, як мы з вамі, які проста хоча бяспекі для родных і сяброў, але гатовы дапамагаць і незнаёмым. Яго Буэнас-Айрэс — не тое месца, куды прылятаюць тысячы ратаўнікоў, ён вымушаны ратаваць сябе сам, бо дапамогі не будзе, і дзяржава не можа прапанаваць нічога талковага.

Павялічыць

«Этэрнаўт» — гэта яшчэ і антываенны праект, і ўсё праз тое, якая будучыня выйшла ў яго стваральнікаў. Гэта не тая гісторыя, дзе чалавецтва аб'ядналася пасля смяротнай пагрозы і пабудавала ўтопію. Хуан Сальва вымушаны бясконца змагацца, і на месца адных ворагаў прыходзяць іншыя — на іншапланетніках усё не скончыцца. І гэта заўжды не змаганне за вялікія ідэалы, а зразумелая кожнаму абарона блізкіх, што не менш дастойна, але бліжэй да рэальнасці.

Гэтая трагічная барацьба простага чалавека, у якой няма надзеі і няма відавочнага сэнсу — нібыта алюзія на ўсе войны і дыктатуры. Дарэчы, яна тлумачыць і само слова «этэрнаўт», якім Эктар Аэстэрхельд, стваральнік комікса-першакрыніцы, назваў Хуана: eterno перакладаецца з іспанскай як «вечны», nauta — традыцыйны суфікс для абазначэння падарожнікаў, як у слове «астранаўт».

Этэрнаўт — вечны падарожнік, таму што яго барацьба не мае канца. Такая ж бясконцая барацьба шматлікіх людзей у розных кутках света за дастойнае жыццё, праўду, волю, проста за сябе. І за тое, каб у цяжкіх умовах не згубіць сябе, таму што апакаліпсіс — толькі пачатак.

• 3
• 0
• 0
• 0
• 1
• 0
• 0
• 0