U pasłańni biełaruskaha pradstaŭnika ŭ ES Uładzimira Siańko Brusel abvinavačvajecca ŭ ekstremiźmie.
Ambasadar Biełarusi ŭ Jeŭrapiejskim Sajuzie Uładzimir Siańko napisaŭ list, adrasavany kiraŭnictvu ES.U svaim pasłańni spadar Siańko abvinavačvaje ES u nievykanańni abaviazalnictvaŭ, palitycy padvojnych standartaŭ i ekstremiźmie.
List pačynajecca zhadkami ab rašeńni ES adyści ad palityki izalacyi Biełarusi. Jano było pryniataje nieŭzabavie paśla hruzinska-rasijskaj vajny žniŭnia 2008 hoda. Pry hetym, što praŭda, pradstaŭnik Biełarusi nie zhadvaje ab 12-ci patrabavańniach ES.
«Na žal, niekatoryja našy partniory ŭ ES, i asabliva ŭ Jeŭrapiejskim Parłamiencie prajaŭlajuć niehatoŭnaść pryniać fiłasofiju roŭnaha i prahmatyčnaha padychodu da kantaktaŭ ź Biełaruśsiu. Jany nie hatovyja vyjavić palityčnuju advahu i spynić cisk, pavučańni i tykańnie palcami, jakija dakazali svaju niepraduktyŭnaść»-- piša Uładzimir Siańko.
Što praŭda, u pasłańni znajšłosia miesca i dla pazityŭnych zhadak ab supracoŭnictvie ES i Biełarusi – hałoŭnym čynam u śfiery enerhietyki, sielskaj haspadarki i ekałohii. «U hetych śfierach dyjałoh praciakaje paśpiachova» – zaznačaje ŭ liście da ES U.Siańko.
Prablemy z pravami čałavieka ŭ Biełarusi tradycyjna nazvanyja ŭ pasłańni «nacyjanalnymi rysami i asablivaściami krainy», jakija nie zaminajuć patrabavać «roŭnaha dyjałohu».
Asablivaja ŭvaha nadadziena Jeŭranestu — asamblei deputataŭ parłamientaŭ krainaŭ ES i jaho susiedziaŭ. Jaje inicyjataraŭ – parłamienckuju asambleju Uschodniaha Partniorstva U.Siańko abvinavačvaje ŭ pravakacyi i dziejańniach z pazicyj palityčnaha ekstremizmu. Majecca na ŭvazie namier zaprasić na mierapryjemstva pradstaŭnikoŭ apazicyi. Spadar Siańko nazyvaje taki padychod ES «niesurjoznym i škodnym», a taksama abvinavačvaje Jeŭrasajuz u biezadkaznaści i ŭ «pieraškodach na šlachu ŭmacavańnia niezaležnaści maładoj biełaruskaj dziaržavy».
«Nie ŭsie zadavalniaje našych partnioraŭ u Bruseli, ale važna pryznać, što bazavyja čakańni Biełarusi ad ES taksama dalokija ad vykanańnia. Heta tyčycca amal usich śfier našaha supracoŭnictva – ad palityki i ekanomiki, da asabistych kantaktaŭ. My dahetul čakajem realnych vynikaŭ»– takimi słovami zakančvajecca pasłańnie biełaruskich uładaŭ jeŭrapiejskim čynoŭnikam.
Ciapier čytajuć
Jak siońnia žyvuć Kuźniečyki, jakija amal dva hady chavalisia ŭ pasolstvie Šviecyi, kab nie trapić u kipciury siłavikoŭ?3
Kamientary