«U jaho adno lusterka kaštuje 44 000». Kaho pryznajuć vinavatym u sutyknieńni Bentley i hruzavika na MKAD?
24 krasavika na MKAD, u rajonie źjezdu z Kižavatava, adbyłasia avaryja. I choć transpartnyja srodki sutyknulisia na nievialikaj chutkaści, nastupstvy takoha DTZ akazalisia značnymi — u pramym sensie darahimi. Bo sutyknulisia Bentley i hruzavy DAF. Pra zdareńnie Onlíner raspavioŭ čytač Siarhiej, jaki śćviardžaje, što kiravaŭ furaj DAF.
— Ranica, hadzina pik, usie jechali vielmi pavolna. Kiroŭca Bentley vyrašyŭ abjechać usich — jon ruchaŭsia pa abočynie. U mianie jość dvoje śviedkaŭ, dy i na zapisie rehistratara heta vidać. Na źjeździe z vulicy Kižavatava na MKAD hety Bentley padrezaŭ BMW (u hetaj mašynie byŭ rehistratar, kiroŭca daŭ mnie videa) i trapiŭ mnie ŭ «ślapuju» zonu, — paviedamiŭ nam Siarhiej.
— Ja padjazdžaju da pierasiačeńnia, baču BMW, baču, jak jon mnie mihaje farami, maŭlaŭ, prajazdžaj. Usio, ja jedu, zboku nikoha nie baču, dy i nie pavinna tam nikoha być. Ale ja pačynaju ruch — i voś što adbyvajecca. Bentley prajechaŭ tam, dzie jon prajechaŭ, i apynuŭsia ŭ pałasie razhonu i tarmažeńnia, sprava ad hruzavika.
Ci mieŭ kiroŭca hruzavika — a my viedajem, što ŭ hruzavikoŭ sapraŭdy jość značnyja zony tak zvanaj ślapoj zony, jakaja nie prahladajecca ŭ lusterkach — mahčymaść ubačyć Bentley pa pravym baku — heta pytańnie.
Praviły darožnaha ruchu:
p. 84 — zabaraniajecca ruch transpartnych srodkaŭ pa abočynach, za vyklučeńniem šerahu vypadkaŭ, praduhledžanych Praviłami;
p. 59 — pry pierastrajeńni kiroŭca pavinien sastupić darohu transpartnym srodkam, jakija ruchajucca ŭ spadarožnym kirunku bieź źmieny napramku ruchu.
Na miesca DTZ vyklikali supracoŭnikaŭ DAI. Videa jany prahladali.
— 5 maja mianie vyklikali da načalnika DAI na razhlad. Ja pryjšoŭ ź videa, z numarami telefonaŭ śviedkaŭ. Načalnik skazaŭ mnie, što śviedkaŭ užo apytali, i ja paśla ź imi źviazvaŭsia — sapraŭdy, apytali. Mianie taksama apytali, nijakaha rašeńnia ŭ toj dzień nie pryniali, spravu nakiravali na dadatkovuju pravierku. Znoŭ vyklikali 12 maja — vypisali mnie štraf u dzieviać bazavych vieličyń (378 rubloŭ), abviaścili, što ŭ DTZ vinavaty ja, bo nibyta nie zaŭvažyŭ Bentley, — raskazvaje čytač.
Štraf — heta adno. A voś škoda ŭ DTZ — zusim inšaje. I kampiensuje jaje vinavaty, to-bok škoda pakryvajecca za košt strachavoj vypłaty, bo adkaznaść kiroŭcaŭ pavinna być zastrachavanaja. Ale nie zaŭsiody sumy strachavoj vypłaty (navat maksimalnaj pavodle limitu) dastatkova, kab pakryć naniesienuju škodu. Zvyčajna heta DTZ, dzie aŭtamabil atrymlivaje vidavočna surjoznyja paškodžańni abo adbyvajucca zdareńni z paciarpiełymi. Ale ŭ vypadku z aŭtamabilami takich marak, jak Bentley, dastatkova i lohkaha ŭdaru na małoj chutkaści, kab užo kazać pra davoli bujnyja sumy.
— Kali mianie pryznajuć vinavatym, dyk u mianie prablema, — kanstatuje Siarhiej. — Jurysty toj firmy, dzie ja pracuju kiroŭcam, jeździli na acenku paškodžańniaŭ hetaha Bentley i skazali mnie, što adno lusterka hetaj mašyny kaštuje 44 000 rubloŭ. Z ulikam znosu, mahčyma, budzie krychu mienš, ale ŭsio ž suma istotnaja. I zrazumieła, što limitu vypłat pa majoj zvyčajnaj strachoŭcy nie chopić. To-bok kali ja zastanusia vinavatym, dyk sumu škody, jakuju nie pakryje strachoŭka, kampanija potym spahonić ź mianie.
— U Bentley paškodžanyja lusterka, kryło i dvoje dźviarej — prynamsi, heta toje, što nazvali jurysty majoj firmy, jakija jeździli na acenku. Jość pytańnie pa mołdynhach: nibyta sprabujuć pakinuć staryja, ale mašynu paviazuć ramantavać u servis, i nie vyklučana, što mołdynhi ŭsio ž buduć mianiać, i za ich taksama pryplusujuć vielmi vialikija hrošy, — praciahvaje surazmoŭca.
Siarhiej kaža, što źbirajecca abskardžvać rašeńnie DAI.
— Ja spačatku dumaŭ nie zabirać paśviedčańnie, jeździć pa tałonie. Ale ja dalnabojščyk, časta jezdžu ŭ Rasiju — mnie pravy patrebnyja. Jurysty skazali, što lepš zabrać pravy, apłacić štraf, a potym zajmacca abskardžańniem. Ja tak i zrabiŭ. Zapytaŭ u DAI matyvirovačnuju častku: budziem ź jurystami składać zajavu ŭ sud, budziem sprabavać abskardzić, — adznačaje jon.
Kamientary